Gikan sa Among mga Magbabasa

Dili-Maayong Pamatasan Sa akong mahinumdoman, ako nagpakita ug dili-maayong pamatasan. Diha gani ing mga panahon nga mapasigarbohon ako nga napakyas sa pagsultig mga pulong nga nagpakitag kortesiya ug konsiderasyon, sama sa “Salamat,” “Palihog pasayloa ko,” ug “Gikasubo ko.” Unya akong nabasa ang artikulong “Ang Pagkadaot sa Maayong Pamatasan” ug ang mga bahin sa Bibliya nga gikutlo didto. (Hulyo 22, 1994) Akong nahibaloan nga ang Diyos kanunayng nagapakita ug maayong pamatasan sa dihang nagapakiglabot niadtong ubos kaniya, nga sagad nagadugang ug “palihog” sa iyang mga hangyo. Natingala kaayo ako sa pagkakita niini diha sa Bibliya. Kini nakapalihok kanako nga maningkamot sa pagsundog sa Diyos. Daghang salamat kaninyo.

M. E., J., Nigeria

Giapresyar gayod nako ang artikulo. Suod nga nalangkit sa maayong pamatasan mao ang pagtahod sa mga katungod ug kabtangan sa uban. Usahay sa dihang modapit ka ug mga higala, ang ilang mga anak mobati nga sila makahimo sa buot nila​—nga mosulod ngadto sa lainlaing mga lawak, nga mangutingkay sa mga hunos ug sa mga repriheredor, ug uban pa.

G. W., Tinipong Bansa

Hinungdanon ang matag tudling-pulong sa artikulo. Mao gayod kanay akong gikinahanglan sa pagtudlo sa akong duha ka batan-ong anak nga lalaki. Akong nakat-onan nga may daghang detalye mahitungod sa maayong pamatasan nga wala nako ikatudlo sa akong mga anak. Karon akong nahibaloan kining maanindot nga mga detalye ug kon unsaon pagpadapat niini.

P. H., Tinipong Bansa

Mga Subwey sa Moscow Di pa dugay nabasa nako ang “Maanindot nga mga Palasyo sa Ilalom sa Yuta sa Moscow.” (Hunyo 22, 1994) Kanunay gayod akong nangandoy nga mobiyahe gawas sa nasod, ug akong nakaplagan nga ang pagbasa sa maong mga artikulo nagpabati kanako nga atua didto.

J. H., New Zealand

Ako miduaw sa Moscow samtang nagtambong sa usa ka bag-ohayng kombensiyon sa mga Saksi ni Jehova. Migugol ako ug taas nga panahon sa pagsakay sa Metro. Wala ako makaamgo niadtong tungora nga akong nakita ang usa sa labing matahom ug mahinungdanong mga subwey sa kalibotan. Busa nalingaw gayod ako sa pagbasa sa artikulo.

P. M., Pinlandia

Mga Snayper? Sa artikulong “Akong mga Panumdoman Ingong Manalaysay sa Militar,” ang magsusulat mibatbat sa pagsulod sa Paris tapos sa paghatag kagawasan niini sa kataposan sa Gubat sa Kalibotan II. (Abril 22, 1993) Giangkon niya nga siya gipusil sa Alemang mga snayper ug nga gibiyaan niya ang iyang dyip sa makadaghan aron motago​—ug nga kini nahitabo sa labing inila nga dalan sa Paris! Ang Paris wala gayod “mahatagig kagawasan” kondili gisurender nga walay away sa Alemang komander nga si Dietrich von Choltitz, kinsa milihok supak sa mga mando.

A. W., Italya

Ang awtor nag-asoy sa iyang personal nga kasinatian, usa ka paghandom nga gipalig-on sa ubang mga nakasaksi ug mga historyano. Pananglitan, ang librong “Liberation,” sa militaryong historyano nga si Martin Blumenson, miila nga bisan tuod si von Choltitz misupak sa mga mando ni Hitler sa pagsunog sa Paris sa bug-os, ang grabeng awayay nahitabo tali sa mga sundalong Aleman ug sa mga sundalo sa Pransiya ug T.B. sa mga adlaw una siya mosurender. Bahin sa awayay diha sa Champs Élysées​—“ang labing inilang dalan sa Paris”—​kini usab gipamatud-an sa ubang mga historyano. Tan-awa ang “Six Armies in Normandy​—From D-Day to the Liberation of Paris,” ni John Keegan​—ED.

Medikal nga Panaglalis Ako 12 anyos. Akong gibasa ang artikulong “Dili mga Madyikero ni mga Diyos.” (Mayo 8, 1994) Ako nalipay nga nakakita ug usa ka Kristohanong batan-on sama kanako nga maisogong miatubang sa mga doktor ug mga siruhano sa ospital ug ‘milikay sa dugo.’​—Buhat 15:20.

P. M. H., Tinipong Bansa

Ako 19 anyos. Napalig-on gayod ang akong pagtuo pinaagi sa pagbasa sa kasinatian ni Mercy Uwasi! Kini nagpaamgo kanako sa kamatuoran nga ang pagkamaunongon kang Jehova wala magdepende sa edad sa usa kondili sa halalom nga gugma alang kaniya. Kini naghimo kanakong mas determinado pa sa paghupot sa akong pagkamaunongon kang Jehova.

S. M., Habagatang Aprika