Imong Umaabot—Unsa Kaha?
ANG pagtuon bahin sa genome sa tawo daghan nag gikabutyag bahin sa potensiyal nga mga sakit nga mahimong maagoman sa usa ka tawo sa ngadtongadto. Apan komosta man ang bahin sa posibleng pagtambal ug gani ang pagsanta nianang mga sakita?
Kon mas daghan ang makat-onan sa mga tigdukiduki bahin sa mga genome sa mga tanom, mga hayop, ug mga tawo, mas dako ang posibilidad nga makaugmad ug mga tambal ug mga terapiya sa pagtambal sa mga sakit, nag-ingon ang The Times sa London. Bisan pa, sumala sa taho sa magasing Industry Week, ang mga siyentipiko nagpasidaan tungod kay kining maong proseso “mahimong makapalangan sa paghiling ug 20 hangtod 50 ka tuig.” Kining maong kahimtang, sumala sa propesor sa biokemiko nga si Charles Cantor, maghimo sa usa ka tawo nga “halos . . . hinikawan sa paglaom.” Apan dili angay nga maingon niana.
Ang Bibliya tin-awng nagsaad nga taposon ang tanang sakit. “Pahiran [sa Diyos] ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa,” pahayag sa Pinadayag 21:4. Mahimo kaha kini sa mga espesyalista sa genetika pinaagi sa gitawag sa magasing The Christian Century nga “genetikong co-creation”? Ang katumanan sa mga saad sa Bibliya wala magdepende sa pagkahingpit sa Human Genome Project, sa bisan unsang “genetikong co-creation,” o, kaha, sa hinayhinay nga pag-uswag sa atong kalikopan. Hinunoa, ang pagkasegurado niini bug-os nga nahasandig sa aktibong gahom sa Diyos, ang iyang balaang espiritu.
Pagsumpo sa Pagpanunod ug Kalikopan
Mga tulo ka libo ka tuig sa miagi, nag-ingon ang usa ka hari sa Israel: “Makalilisang ug kahibulongan uyamot ang pagbuhat kanako.” Bisan tuod si David walay nahibaloan bahin sa Human Genome Project sa karon, iyang giawit kini sa pagdayeg sa Diyos: “Ang imong mga mata nakakita gani dihang bag-o pa akong turok nga binhi, ug sa imong basahon nasulat ang tanang bahin.”—Salmo 139:14, 16.
Sa unsang paagi nasayod kining karaang hari nga ang iyang pagtubo ingong usa ka bag-ong turok nga binhi sa sulod sa tagoangkan sa iyang inahan nagsunod sa “nahisulat” nga mga instruksiyon? Miangkon mismo si David: “Ang espiritu ni Jehova namulong pinaagi kanako, ug ang iyang pulong diha sa akong dila.” (2 Samuel 23:2) Oo, ang aktibong gahom sa Maglalalang, ang balaang espiritu, nagdasig sa pagsulat ni David.
Dili ba may leksiyon dinhi nga wala tagda sa daghang tawo karon o, sa labing menos, naglangan sa pagtagad? Bisan tuod ang napanunod ug ang kalikopan sa usa ka sukod naghimo kanato kon kinsa kita, ang balaang espiritu sa Diyos kusganong makaapektar kanato, gani nagababag sa ubang mga impluwensiya.
Tagda ang kaso ni Ian. “Ako nerbiyoso kaayo nga bata kaniadto,” siya mipahayag. “Ang akong amahan usahay nerbiyoso kaayo, ug karon ang akong gagmayng mga anak nga lalaki nerbiyoso sad. Sa batabata pa ako, kulbaanon kaayo ako. Dili ako makasulti nga dili mayungit ug magbungabunga, ug dayon misugod akog gamit ug alkoholikong mga ilimnon agig sulbad. Napakalma ako niini, o maoy akong pagtuo. Sa pagkatinuod, ang pag-inom nagpasamot sa akong nerbiyos.” Sa dihang misugod ug tuon sa Bibliya si Ian uban sa mga Saksi ni Jehova, iyang naamgohan nga mihunong siya sa pagsalig sa alkohol aron makontrolar ang iyang nerbiyos. “Abi nako ug igo na ang akong kaugalingong gahom sa pagbuot, ug sa pagkatinuod miundang akog inom sulod sa usa ka tuig. Apan,” siya miangkon, “dili ako makadugay nga dili moinom.”
“Usa niana ka adlaw,” siya mipadayon, “naglakaw ako sa dalan nga nagpaulan nga naghunahuna nga magpadayon ako sa paglakaw hangtod ako mamatay. Daghang higayon na nga ako miundang ug mibalik sa pag-inom. Dayon naamgohan ko nga naningkamot ako sa pagbuntog sa akong suliran sa pag-inom sa akong paagi, dili sa paagi ni Jehova. Busa misugod ako ug ampo samtang naglakaw, nga miingon kang Jehova, sa aktuwal, nga ako nang buhaton ang mga butang sumala sa iyang paagi, nga mihangyo kaniya nga hatagan niya ako sa iyang balaang espiritu aron mopalig-on kanako.” Kadto maoy mga napulo na ka tuig sa miagi. Komosta na si Ian karon?
“Manlimbasog gihapon ako aron makontrol ang akong kahuyangan,” siya miangkon, “ug nakakat-on ako sa pagsandig sa bug-os kang Jehova aron makapadayon.” Unsay gipasidunggan ni Ian sa iyang kalamposan? “Nakahinumdom ako sa akong unang asaynment sa pagbasa sa Bibliya human nakabalik sa kongregasyon sa mga Saksi ni Jehova. Kadto mao ang Salmo 116, nga gisugdan niini: ‘Nahigugma ako, tungod kay gipatalinghogan ni Jehova ang akong tingog, ang akong mga pangaliyupo.’ Sa tungatunga sa maong salmo, akong nabasa: ‘Unsa man ang akong ibayad kang Jehova tungod sa tanan niyang kaayo kanako?’ [Sal bersikulo 12] Sama kadto ug usa ka tumbanang-bato nga nagtabang kanako aron makabalik sa usa ka matang sa pagkahimong normal.” Karon si Ian motambag sa tanan nga anaa sa samang kahimtang: “Ayawg limbongi ang imong kaugalingon.” Siya midugang: “Sa dihang sa kataposan giatubang ko ang akong mga suliran ug miampo alang sa balaang espiritu ni Jehova sa paglig-on sa akong desisyon, misugod ako paglampos.”
Si Ian, uban sa halos lima ka milyon pang mga Saksi ni Jehova, nagsalig sa balaang espiritu nga motabang kaniya sa pagsubay sa dalan nga gilaraw diha sa labing importanteng basahon sa instruksiyon, ang Bibliya. Tugoti ang mga Saksi sa inyong lokalidad nga magtudlo kanimo sa tin-aw, dili komplikado, simpleng mensahe niini—bahin sa Gingharian sa Diyos, sa iyang langitnong kagamhanan diha sa mga kamot sa binanhawng si Kristo Jesus. Wagtangon niining maong ahensiya sa dili madugay ang tanang lama sa daot nga mga genetiko ug mohatag sa katawhan ug paraisong kalikopan nga pagapuy-an sa walay kataposan. Ikaw mahimo usab nga makapuyo didto!