“Lakaw Ngadto sa Hulmigas”

“TALAGSAONG MGA HULMIGAS”​—kadtong katingalahang ulohan migula sa milabayng pila ka tuig diha sa usa ka artikulo sa mantalaan bahin sa dali nga pagpanukod ug Kingdom Hall sa mga Saksi ni Jehova. Unsay nakapukaw sa maong ulohan? Dili lisod sabton kon tan-awon nimo ang usa ka letrato nga gikuha gikan sa itaas sa lugar nga gitukoran. Usa ka subtitulo sa mao gihapong artikulo sa mantalaan nag-ingon: “Lima ka gatos ka mga Saksi ni Jehova diha sa lugar nga gitukoran​—usa ka katingalahang bungdo sa hulmigas.”

Husto ang pagtandi, tingali labaw pa kay sa naamgohan sa reporter. Matuod, gikan sa itaas, ang pipila ka gatos ka tawo nga nagkapagkapag libot sa lugar nga gitukoran kaamgid sa mga hulmigas diha sa bungdo sa mga hulmigas. Apan niining bahina ang kaamgiran labaw pa sa dagway lamang. Ngano man? Seryosong gitagad sa mga Saksi ni Jehova ang tambag sa Proverbio 6:​6, nga nag-ingon: “Lakaw ngadto sa hulmigas . . . ; tan-awa ang mga paagi niini ug magmaalamon.” Sa unsang paagi ang usa mahimong maalamon pinaagi sa pagpaniid sa mga hulmigas?

Kon atong tan-awon, ang mga hulmigas daghag mahimo. Ang ensiklopedia sa Bibliya nga Insight on the Scriptures nag-ingon: “Dili lamang talagsaon ang ilang kinaiyanhong pagpangandam alang sa umaabot kondili usab ang ilang kamalahutayon ug determinasyon, nga kasagarang nagapas-an o maangatong nagbutad ug mga butang nga duha ka pilo ang gibug-aton kay sa ilang kaugalingong timbang, nagbuhat tuman sa ginhawa aron matapos ang ilang partikular nga trabaho, ug dili mosibog bisag sila matumba, madalin-as, o maligid sa titip nga kimba.”a

Sa susama, samtang ang mga Saksi ni Jehova dili magbira ug duha ka pilo nga gibug-aton sa ilang timbang sa lawas ug mga materyales sa pagtukod, kasagarang makurat kanila ang ilang mga silingan sa kadako sa ilang mahimo diha sa ilang mga proyekto sa pagtukod sa mubo lamang nga panahon. Sagad nga makita nga kalit lang manindog ang ilang mga Kingdom Hall gikan sa haligi ug matapos sa duha o tulo lamang ka adlaw!

Sa unsang paagi nahimo nila kining tanan? Pinaagi sa pagsundog sa hulmigas sa laing hinungdanong bahin. Ang Insight on the Scriptures nag-ingon bahin sa mga hulmigas: “Matinabangon kaayo, ampingan nilang hinlo kanunay ang ilang mga salag ug nagpakitag kabalaka sa ilang kaubang mga trabahante, usahay tabangan ang nangasamdan o gikapoyng mga hulmigas balik sa salag.” Ang gihisgotang reporter sa ibabaw daw nakadayeg sa samang matinabangong espiritu taliwala sa mga Saksi, nga nagbatbat “sa dakong paningkamot nga giduyogan ug pahiyom diha sa relaks nga palibot sa mga 80 ka propesyonal nga naghawas sa matag sanga sa pagpanukod ug gisuportahan sa 400 ka boluntaryo.”

Bisan pa, ang tanang kuging trabaho ug kooperasyon nga gibutang sa mga Saksi ni Jehova sa pagtukod sa ilang mga Kingdom Hall maoy pagtilaw-daan lamang sa mahitabo sa sulod niadtong maong mga tigomanan sa mga tuig nga mosunod. Didto sila magpadayon sa kuging pagtrabaho ug pagtambayayongay sa pagtrabaho, magaorganisar sa ilang buluhaton sa pagpanudlo ug pagwali ug sa pagpresentar sa ilang mga tigom nga makapalig-on ug edukasyonal. Labaw pa nga hinungdanon, sila naningkamot sa pagpakita sa samang matang sa mahigugmaong kabalaka alang sa usag usa nga gipakita ni Jesus ngadto sa iyang mga sumusunod sa dihang dinhi pa siya sa yuta.​—Juan 13:​34, 35.

Kon nakakita ka na ug usa ka Kingdom Hall sa mga Saksi ni Jehova ug nahibulong kon unsay nagakahitabo sa sulod, mainiton namo kamong dapiton sa pagduaw ug sa pagtan-aw sa inyong kaugalingon. Among ikapasalig kaninyo ang usa ka mainit nga pag-abiabi ug matulon-anong pagduaw.

[Mga footnote]

[Picture on page 31]

Usa ka dali nga pagkatukod nga Kingdom Hall sa Aurillac, France

[Picture Credit Line on page 31]

Mga dibuho sa linya: Hulmigas ni Paraon. Lydekker