Kini Bang Dulaa Alang Kanimo?

“DEPENDE sa panglantaw sa usa, ang dula sa kompiyuter nga Doom maoy makapakuba sa dughan nga pinusilay nga nagdala sa mga dula sa kompiyuter ngadto sa usa ka bag-ong ang-ang sa teknikal nga kaugmaran o pagpatuyang sa dayag nga kapintasan nga nagdala sa mga dula sa kompiyuter ngadto sa labi pa ka ubos nga moral nga sukdanan kay sukad masukad.” Mao kanay gisulat ni Peter Lewis sa lindog nga “Personal nga mga Kompiyuter” sa The New York Times. Siyempre, daghang dula sa kompiyuter maoy takoban lamang sa kapintasan, dugoon nga dinaghang pagpamatay, o bisan dayag nga pornograpiya. Ang bag-ong gidugang​—Doom II—​gidahom nga mahimong labing himalitan bisan pag mobili kini ug $69.95. Mao ba kini ang matang sa dula nga angay sa mahigugmaon-sa-kalinaw nga mga Kristohanon? Ang padayong paghubit ni Lewis makatabang tingali kanimo sa pagdesisyon.

“Ang magdudula magpakaaron-ingnong usa ka isog nga Marine nga giasayn sa usa sa mga bulan sa Mars sa dihang ang industriyal nga aksidente nag-abli ug agianan paingon sa Impiyerno. . . . Ang Marine kinahanglang momaneobra latas sa makuting mga pasilyo, . . . nga padayong magapanukmag, magapamusil, magaasal ug magagabas sa mga demonyo ug kanhing mga tawo. . . .

“Ang mga kaugmaran sa Doom II dali rang sumaryohon: Mas daghang demonyo, mas daghang hagip-ot nga mga agianan, mas daghang hinagiban ug mas dugoon.”

Nga nagkomento bahin sa usa ka kombensiyon sa kompiyuter sa Las Vegas, Nevada, ang The New York Times nag-ingon: “Ang labing dayag nga bag-o karong tuiga mao ang multimedia nga pornograpiya . . . Kini nagdani sa pipila sa dagkong mga panon sa komperensiya.”

Ang magsusulat sa Bibliya nga si Santiago nag-ingon: “Ang kaalam gikan sa itaas maoy una sa tanan putli, unya makigdaiton, makatarunganon, andam mosunod, puno sa kaluoy ug maayong mga bunga.” (Santiago 3:17) Mga ginikanan, nasusi ba ninyo ang mga dula sa kompiyuter sa balay nga ginagamit sa inyong mga bata di pa dugay? Kinahanglan pa ba kaming mosulti ug dugang?