Ang Akong Malamposong Pagpangita sa Kahulogan sa Kinabuhi
TUIG 1951 kadto. Panonpanon sa mga tawo naglinya diha sa mga dalan sa pagtan-aw sa daghang iladong mga bituon sa entablado ug sa pelikula samtang ang nagparadang mga limousine nagpaingon sa Fine Arts Theatre sa Beverly Hills, California. Ang okasyon mao ang unang pagsalida sa A Place in the Sun, nga gibase sa bantog nga nobela nga An American Tragedy sa akong ig-agaw nga si Theodore Dreiser. Kini maoy usa sa malig-ong salmot sa Paramount Pictures alang sa Academy Award sa maong tuig ug gidireher ni George Stevens, usa sa ilang kinamaayohang mga direktor. Gidala kini sa tulo ka inilang mga bituon sa maong panahon, si Elizabeth Taylor, Montgomery Clift, ug Shelley Winters. Nganong ako atua didto sa usa niadtong dagkong mga limousine, nga miagi sa mga panon sa nanagsinggit nga mga tawo? Ug nganong gibati ko nga wala-sa-lugar sa maong palibot? Mobalik kita sa sinugdan aron masayran kon sa unsang paagi mitungha kining tanan.
Ako natawo sa usa sa labing makahuloganong mga yugto sa tibuok kasaysayan—Oktubre 1914. Sa ika-20ng adlaw sa maong bulan sa mga alas kuwatro imedya sa hapon, sa among balay sa Seattle, Washington, ako gihimugso pinaagi sa tabang sa doktor.
Niadtong panahona ang among pamilya nagpuyo sa Alki Beach diha sa usa ka seksiyon nga gitawag Bonair. Sa wala madugay midako ang among pamilya ngadto sa lima, nga naglakip sa akong mga ginikanan, akong magulang nga lalaki ug manghod nga lalaki, ug ako. Kami nagpuyo diha sa dako, maanindot nga balay nga nag-atubang sa baybayon, nga naghatag ug matahom kaayong talan-awon diin malantawan sa usa ang mga barko ug mga piri nga nagngadto-nganhi sa katubigan sa Puget Sound tali sa dakbayan sa Seattle ug sa ubang mga siyudad diha sa agianan sa mga barko.
Human mahugno ang stock market niadtong 1929, ang kahimtang sa ekonomiya nadaot pag-ayo nga among gibugti ang among balay sa Alki Beach alang sa usa ka tindahan ug pagkaon diha sa seksiyon sa Highland Park sa Seattle, nga naghatag kanamog diyutayng kahinguhaan sulod sa katuigan sa Depresyon.
Niadtong 1938 namatay ang akong inahan, nga nagbiya sa akong amahan nga nag-inusara sa pagpalakaw sa tindahan. Ako miduyog kaniya sa negosyo, ug gihimo namo kining usa ka modernong tindahag pagkaon. Wala magdugay kami adunay mauswagong negosyo.
Unya kalit nga giatake ang Pearl Harbor niadtong Disyembre 7, 1941, ug wala madugay human niadto akong nakaplagan ang akong kaugalingon nga nag-atubang sa tawag sa pagkasundalo ug sa Gubat Kalibotan II. Kinahanglan namong ibaligya ang negosyo, nga nagtagana sa akong amahan ug gamayng salapi nga panginabuhian, ug ako miboluntaryo sa kasundalohan mga pipila ka adlaw lang una pa ako gitawag sa pagkasundalo. Ang pagsulod sa kasundalohan nakatugaw sa akong konsensiya, sa tinud-anay, ug ako nahinumdom nga hilabihang nakaampo sa Diyos nga dili unta ako makapatay ug tawo. Human sa pangunang pagbansay, ako giasayn diha sa Transportation Corps. Sa kadugayan ako gitudlo nga ikaduhang tinyente.
Akong Pakig-uban Kang Theodore Dreiser
Sa pagkakaron 1945 na, ug ako giasayn sa Port of Embarkation sa Los Angeles, diin ako nag-alagad ingong guwardiya sa kargamento sa mga barko nga giabangan sa kasundalohan sa paghatod sa mga suplay ug pipila ka mga sundalo sa mga dapit sa Pasipiko. Sa matag asaynment ako usahay moduaw sa akong ig-agaw nga si Theodore Dreiser ug sa iyang asawa, si Helen. Sila may dakong balay sa West Hollywood ug maabiabihon kaayo kanako niining mga okasyona. Si Dreiser mausisaon kaayog hunahuna ug buot masayod kon unsay akong mga hunahuna sa mga dapit nga akong naadtoan.
Siyempre, si Dreiser nasayod usab nga ako ig-agaw sa Kongresistang si Martin Dies sa Texas, tsirman sa Dies Committee, ang mag-uuna sa Un-American Activities Committee. Daghan sa mga magsusulat ug ubang mga propesyonal sa industriya sa pelikula gimaltrato tungod kay misimpatiya sa Komunista, ug si Dreiser wala makalingkawas niini, sanglit siya nahibaloan nga misimpatiya sa mga Ruso. Busa sa usa sa akong unang mga pagduaw, siya nangutana kanako: “Ikaw ba samag panglantaw sa imong ig-agaw, si Martin Dies?” Gipasaligan ko siya nga ako walay koneksiyon kang Martin o sa bisan unsa sa iyang mga tumong sa politika, nga naghimo sa akong relasyon kang Dreiser nga mas malinawon.
Human misurender ang Hapon, niadtong Septiyembre 2, 1945, mihukom ako sa pagpabilin una sa kasundalohan, tungod kay ako makakitag daghang makaiikag nga mga dapit sa kalibotan. Wala magdugay mitaas ang akong ranggo nga nahimong unang tinyente ug giasayn ingong opisyal nga tagdumala sa tindahan sa militar sakay sa usa sa mga barko nga daghag tropa. Samtang didto sa Hapon, mibakasyon ako ug mibiyahe sa tibuok Hapon gikan sa Yokohama ngadto sa Hiroshima, diin gipayhag sa bomba atomika ang siyudad.
Sa buntag nga miabot ako sa Hiroshima, nakita ko ang mga tawo nga nangatulog gihapon diha sa mga parke tungod sa kakulang ug puy-anan. Dili na isulti pa, gibati ko ang labihang kagil-as sa paglakawlakaw didto, sanglit dayag nga halos tanan nga akong nakahibalag namatyan ug mga paryente ug mga higala niadtong grabeng kalaglagan. Ang labihang kasubo nga akong nakita sa ilang mga nawong, ingon man ang tinuod o hinanduraw nga pagdumot diha sa ilang mga mata alang kanamong nakauniporme, maoy butang nga makapasakit sa kasingkasing.
Misugod Ako sa Akong Pagpangita sa Kahulogan
Tungod sa Hiroshima ug sa daghang kaso sa sakit ug kakabos nga akong nakita, misugod ako sa pagpangatarongan sa kahulogan sa kinabuhi. Ang pagsakay ug mga barko diha sa dagat nakahatag ug daghang panahon sa pagpamalandong bahin sa maong mga butang. Usahay, makig-estorya ako sa kapilyan sa barko sa pagsusi kon siya makatubag ba sa pipila sa akong mga pangutana labot sa mga inhustisya sa kinabuhi. Walay usa sa mga kapilyan ang adunay bisan unsang makapatagbaw nga mga tubag.
Si Theodore Dreiser namatay niadtong Disyembre 1945, human nakagugol ug tibuok kinabuhing pagpangita sa kahulogan sa kinabuhi. Sa iyang mubong sinulat nga nag-ulohang “My Creator,” siya sa kataposan miadmiter nga siya mas halayo sa kasulbaran niadtong panahona kay sa sinugdan. Si Helen Dreiser, ang iyang nabalo nga asawa, nga ako usab nga ig-agaw, nagsulat sa kasaysayan sa iyang kaugalingong kinabuhi, nga nag-ulohang My Life With Dreiser. Siya nag-awhag kanako sa pag-adto sa Hollywood aron tabangan siya sa pag-edit sa iyang manuskrito ug sa pagdumala sa pipila ka mga palakaw sa negosyo uban sa lainlaing mga ahente maylabot sa publikasyon sa mga sinulat ni Theodore, nga gipatik sa daghang nasod. Busa sa Disyembre 1947, mibiya ako sa kasundalohan ug misugod sa pagpuyo sa dakong balay ni Dreiser sa West Hollywood.
Apan wala ako mohunong sa akong pagpangita sa kahulogan sa kinabuhi. Si Helen Dreiser nangita usab ug espirituwal nga pagsabot sa kinabuhi, ug busa misugod kami sa pagduaw sa lainlaing mga grupo, nga nagpangitag usa ka butang nga makataronganon. Walay usa sa mga grupo ang adunay makapatagbaw nga mga tubag.
Sa ulahi, samtang didto kami sa Gresham, Oregon, nga miduaw sa inahan ni Helen, ako gipailaila sa usa sa mga Saksi ni Jehova nga manunogtog ug de-koryenteng organ sa pipila ka dagkong mga hotel sa Portland. Kami nagkahisgotay labot sa relihiyon, ug daghan sa mga butang nga iyang gisulti daw makataronganon. Sa dihang gisugyot niya nga usa sa ilang mga ministro moduaw inigbalik namo sa Los Angeles, ako miuyon dayon.
Sa dihang mibalik sa Los Angeles, kami giduaw dayon sa usa sa mga Saksi ni Jehova. Iyang gihikay kanamo ang usa ka senemanang pagtuon sa Bibliya uban sa laing Saksi ug iyang asawa, diin ang duha mga payunir (bug-os panahong mga ministro). Dili maayo ang pagsugod sa among pagtuon tungod sa pipila sa akong daang mga ideya, apan kini sa wala madugay nawala pinaagi sa maayong pagpangatarongan sa Bibliya.
Sayo kadto sa 1950, ug dihay dakong interes sa mga sinulat ni Dreiser niadtong panahona. Ang Paramount Pictures nagproseso sa paghimog salida sa sine sa mga bersiyon sa duha ka labing iladong mga nobela ni Dreiser: An American Tragedy, nga pagatawgong A Place in the Sun, nga gisalida niadtong 1951, ug Sister Carrie, nga sunod gisalida ubos sa ulohang Carrie sa bersiyon sa pelikula. Kini nga mga pelikula maoy mga salmot sa Paramount alang sa Academy Award sa duha ka tuig nga sunodsunod. Busa usa kadto ka importanteng tuig ni Helen, ug kay natapos niya ang manuskrito nga nag-ulohang My Life With Dreiser, siya migikan paingon sa New York City, diin siya makigkita sa mga opisyales sa World Publishing Company, nga maoy mopatik sa iyang manuskrito.
Ako Nakombinsir nga Akong Nakaplagan ang Kahulogan sa Kinabuhi
Samtang wala siya, nagpadayon ako sa akong pagtuon sa Bibliya, nga sa kadugayan nakakat-on kon sama sa unsa ang paggula sa balay-ug-balay nga nakighisgot mahitungod sa Bibliya. Sa panahong mipauli si Helen Dreiser gikan sa New York, natino ko nga sa kataposan akong nakaplagan ang kahulogan sa kinabuhi, nga akong gipangita. Apan pagkadako sa kakurat sa dihang gipahibalo ni Helen nga siya dili na interesado nga magpadayon sa pagtuon sa Bibliya! Dayag nga ang iyang mga kaila sa New York nagkombinsir kaniya nga ang iyang nakat-onan gikan sa Bibliya dili popular sa kalibotan. Siya prangkang miingon: “Gidili niini ang tanang butang.” Busa siya midumili na sa pagtuon sa Bibliya uban kanamo.
Niining tungora tin-aw nga dili uyon sa kamatuoran nga ako magpabilin pa sa army reserve. Ako determinado nga magpabawtismo ingong usa sa mga Saksi ni Jehova. Usa ka linaing bawtismo ang gihikay alang kanako sa balay sa usa ka Saksi nga may swimming pool. Kay nakapahinungod kang Jehova, ako nabawtismohan niadtong Agosto 19, 1950. Ako misulat dayon sa kasundalohan nga nagpahibalo kanila nga sanglit ako usa na ka ordinadong ministro, ako dili na makahimo sa pag-alagad sa army reserve. Bisag ang akong pagretiro sa sinugdan gidumilian, pipila ka bulan sa ulahi, gihatagan akog dungganong pagluwat.
Kasamtangan, hapit nang ipasalida sa Paramount Pictures ang A Place in the Sun, ug si Helen ug ako gidapit sa usa ka pribadong panihapon nga gihikay ni George Stevens, ang direktor. Kami gisultihan nga ang unang pagpasalida sa kalibotan pagahimoon sa Fine Arts Theatre sa Beverly Hills, ug ang mga kahikayan gihimo nga inig-abot namo sa sinehan, si Helen, ingong asawa sa awtor, mohatag ug pakigpulong pinaagig hookup sa radyo sa nasod. Kini maoy hinungdanon kaayong gabii sa akong ig-agaw, ug gidahom nga ubanan ko siya. Busa sa natudlong oras, miabang kamig limousine, ug nga postorawo kaayo, mipaingon kami sa sinehan. Hinayhinay kaming miagi diha sa mga panon sa mga tawo, nga naglinya sa dalan nga naglaom nga makakita sa pipila ka inilang mga bituon sa pelikula nga gidahom nga moabot alang sa pagsalida.
Unsay akong gibati sa akong bahin niadtong magarbohong pasundayag? Sa panahong milabay, nakakita akog mga okasyon nianang matanga diha sa mga pelikula ug naghunahuna kon unsay bation nga mahiuban sa mga tawo nga maoy sentro sa atensiyon. Apan ning higayona, kay nakabaton ug kahibalo sa kamatuoran, gibati ko nga wala-sa-lugar. Tingali gibati ko ang dili-pag-uyon ni Jehova sa maong mga butang tungod sa giingon sa Bibliya sa 1 Juan 2:16: “Ang mapagawalong pagpasundayag sa kahinguhaan sa kinabuhi sa usa . . . wala magagikan sa Amahan, kundili nagagikan sa kalibotan.” Dali kaayong makita nga ang maong pangidlap ug kamadanihon dili uyon sa akong bag-ong Kristohanong paagi sa kinabuhi. Bisag ako nalingaw sa nindot kaayong salida sa sine, nahupayan ako sa dihang kini natapos na.
Wala madugay human niadto, si Helen Dreiser naistrok nga nakaparalisar sa usa ka bahin sa iyang lawas. Ang ikaduhang istrok naghimo kaniyang dili na gayod makaatiman pa sa mga palakaw sa negosyo. Ang iyang manghod nga babaye nga si Myrtle Butcher miaplay alang sa permiso nga maoy moatiman kaniya ug buot niyang dalhon siya ngadto sa iyang kaugalingong balay sa Gresham, Oregon. Wala nako tutuli ang aplikasyon, sanglit gibati ko nga kini maoy sa ikaayo ni Helen, nga nagkinahanglan ug dakong pag-atiman, nga ikatagana sa iyang igsoong babaye. Busa ako niining panahona wala nay trabaho. Unsay akong buhaton? Ako may pagsalig sa saad ni Jesus sa Mateo 6:33: “Nan, padayong pangitaa nga una ang gingharian ug ang iyang pagkamatarong, ug kining tanang ubang mga butang idugang kaninyo.”
Sanglit niining panahona ang akong kaugalingon na lamang ang akong atimanon, ang akong amahan namatay sa pipila ka bulan nang miagi, buot kong mag-alagad kang Jehova nga bug-os panahon. Halos dihadiha, ako gigantihan ug usa ka tanyag sa trabahong partaym, nga naghatag kanako sa akong gikinahanglan lamang sa pagsugod sa pag-alagad kang Jehova ingong usa ka bug-os panahong magsasangyaw sa maayong balita sa Gingharian sa Diyos. Sama sa giingon ni Jesus nga maoy situwasyon, si Jehova nag-atiman kanako niining tanan sa kapin sa 42 ka tuig nga ako diha sa iyang bug-os panahong pag-alagad.
Sa ting-init sa 1953, mitambong ako sa akong unang internasyonal nga kombensiyon sa mga Saksi ni Jehova, sa Yankee Stadium sa New York City, ug pagkamakapalipay nga kasinatian ang misangpot! Ako niadtong panahona hapit nang makatapos sa akong unang tuig ingong usa ka payunir, ug samtang ako malipayon kaayo sa buluhatong pag-ebanghelyo, ako nagtinguha sa pagkab-ot sa labaw pang pakigbahin sa pag-alagad sa Gingharian. Dili pa dugay nag-aplay ako alang sa bug-os panahong pag-alagad sa punoang mga buhatan sa Sosyedad, ug karon niining kombensiyona ako miaplay usab alang sa misyonaryong pagbansay sa Watchtower Bible School of Gilead. Wala madugay human mibalik sa Los Angeles, pagkadako sa akong kakurat nga nakadawat ug pagdapit sa pag-alagad sa punoang mga buhatan sa Sosyedad, nga gitawag ug Bethel!
Uban sa di-masabtang mga emosyon misulod ako sa Bethel niadtong Oktubre 20, 1953, nga naghunahuna kon sama sa unsa unya kini ug kon kaha ako magmalipayon didto ingon sa akong pagpayunir. Apan sa milabay nga tibuok 41 ka tuig sa akong pag-alagad sa Bethel, wala gayod ako kas-a magbasol sa paghimo niana nga desisyon. Ang daghang pribilehiyo nga akong natagamtam samtang ania dinhi sa Bethel naghatag kanakog dakong kangaya ug kalipay nga dili ko gayod masinati sa bisan haing matang sa pag-alagad sa Gingharian.
Niadtong 1955, si Helen Dreiser namatay, ug ako gitudlo ingong usa ka magdudumala ug sa kadugayan nahimong piniyalan sa iyang kabtangan. Sa pagsusi sa iyang testamento, gibilin ni Theodore Dreiser ang tanan niyang kabtangan ngadto sa iyang asawa, ug ang pagdumala sa iyang kabtangan naglakip sa mga katungod sa tanan niyang nabatonang katungod sa mga sinulat. Gisultihan ako ni Helen nga si Dreiser usa ka regular nga tigbasa ug Bibliya, ug sa pagsusi sa iyang librarya, akong nakita nga usahay siya mohimog mga nota diha sa panaplin sa iyang Bibliya bahin sa kapiliang hubad sa usa sa ubang mga hubad sa Bibliya.
Si Dreiser ug ang mga Saksi ni Jehova
Siyempre, ako walay nahibaloan bahin sa mga Saksi ni Jehova sa dihang nag-estoryahay kami ni Dreiser, apan akong nasayran sa ulahi nga siya nahibalo sa neyutral nga baroganan sa mga Saksi ni Jehova. Diha sa iyang libro nga nag-ulohang America Is Worth Saving, iyang gidayeg sila tungod sa ilang baroganan bahin sa isyu sa pagsaludar sa bandera. Si Dreiser dili mahadlok sa pagbaton ug malig-ong baroganan bahin sa butang nga iyang gituohan, ug kon may nahibaloan pa ako sa Bibliya sama sa akong nahibaloan karon, lagmit kaayo nga kami adunay makaiikag kaayong panagsultihay.
Sa pagtan-aw ug balik sa kapin sa 45 ka tuig sukad nga ako nagsugod sa pagtuon sa Bibliya uban sa mga Saksi ni Jehova, sa katim-os akong ikasulti nga nakaplagan ko gayod ang kahulogan sa kinabuhi nga akong gipangita. Ang akong mga pangutana maylabot sa mga inhustisya sa kinabuhi tanan natubag pinaagi sa pagkakat-on nga ang diyos ug magmamando niining kalibotana mao si Satanas nga Yawa, inay kay ang mahigugmaon, labing gamhanang Diyos, si Jehova. (Juan 14:30; 2 Corinto 4:4; 1 Juan 4:8) Ug pagkadakong hinungdan sa pagkalipay ang pagkakat-on nga ang Gingharian sa Diyos natukod na sa mga langit niadtong Oktubre 1914 ug sa pagkasayod nga kini sa dili madugay mopuli sa pagmando sa yuta ug magwagtang sa tanang mga buhat sa Yawa!—1 Juan 3:8; Pinadayag 20:10.
Kasamtangan, ang pagkaila sa Soberano Ginoong Jehova, ang pagbatog personal nga relasyon uban kaniya, ug ang pagbatog makahuloganong kinabuhi diha sa iyang pag-alagad sa Gingharian mahimong ipakasama sa perlas nga nakaplagan sa usa ka magpapatigayon diha sa iyang mga biyahe. Ang maong perlas taas ug bili nga iyang gibaligya dayon ang tanang butang nga nabatonan niya ug gipalit kini.—Mateo 13:45, 46.
Kay nakabaton sa maong bahandi, giapresyar ko ang mga pulong sa salmistang si David: “Nga makapuyo ako sa balay ni Jehova sa tanang mga adlaw sa akong kinabuhi, aron sa pagtan-aw sa katahom ni Jehova ug sa pagpabili sa iyang templo.” (Salmo 27:4)—Sumala sa giasoy ni Harold Dies.
[Hulagway sa panid 20]
Ang pagsulod sa kasundalohan nakatugaw sa akong konsensiya, sa tinud-anay
[Hulagway sa panid 23]
Pag-alagad sa Bethel sukad sa 1953