Mga Luha sa Kinaiyahan

SAYO kadto sa kabuntagon, ug ang hangin mabugnaw ug linaw. Ang matag dahon ug gihay sa sagbot migilakgilak sa gagmayng mga tulo, nga nangidlapkidlap sa unang kahayag sa adlaw. Sa usa ka bahin, daw ingon sa ang katanoman nagpatulog mga luha sa kalipay sa pagsugat sa pagsilang sa adlaw. Dili ikahibulong nga ang yamog nagdasig sa mga magbabalak​—ug sa mga letratista.

Ugaling, labaw pa ang ginahimo sa yamog kay sa pagrepresko sa tawhanong espiritu. Kining katingalahan sa atmospera, nga kasagaran sa tibuok planeta gawas sa mga rehiyon sa polo, maoy usa ka habol sa nagasustentog-kinabuhing kaumog. Ingon niana pagkadesinyo ni Jehova nga Diyos ang atmospera nga kon mobugnaw na sa panahon sa gabii ubos sa pipila ka mga kahimtang, kini modangat sa nailhang ang punto sa pagkahimong yamog. Kini mao ang temperatura diin ang hangin dili na makahawid sa kaumog niini ug ideposito kini diha sa mga ibabaw nga mas mabugnaw kay sa hangin sa palibot. Pinaagi sa ilang mga dahon, ang giuhaw nga mga tanom nahibaloan nga mosupsop ug tubig nga ingon ka daghang tubig sa ilang gibug-aton, nga ang kadaghanan niini ilang ipagawas pinaagi sa ilang mga gamot aron ipondo diha sa yuta.

Sa kayutaan sa Bibliya, diin tagdugay ang ting-init, ang yamog usahay halos mao lamang ang bugtong tinubdan sa tubig alang sa mga tanom. Busa sa Bibliya, ang yamog sagad gilangkit sa abot sa mga pananom​—ug ang kakulang sa yamog, sa kagutom.

Ang yamog usab adunay dugang personal nga kahulogan. Diha sa iyang panamilit nga awit ngadto sa katawhan sa Diyos, si Moises misulat: “Ang akong instruksiyon motulo ingon sa ulan, ang akong pulong modaligdig ingon sa yamog, ingon sa mga taligsik sa ibabaw sa sagbot ug ingon sa mga alindahaw sa ibabaw sa katanoman.” (Deuteronomio 32:2) Si Moises nagpahayag ug mga pulong nga nagahatag-kinabuhi sama sa yamog. Sanglit siya mao ang labing mapainubsanon sa mga tawo, tino nga siya kanunayng malumo ug matinagdanon sa iyang pagpanulti usab. (Numeros 12:3) Sama sa yamog o taligsik, ang iyang mga pulong nagalig-on nga dili mohatag ug kadaot.

Sa sunod higayon nga ikaw mahibulong sa matahom nga yamog sa kabuntagon​—ang kaugalingong mga luha sa kinaiyahan​—hayan buot mong mamalandong sa kahibulongang kaalam sa Maglalalang sa yamog.