Mga Panagna Bahin sa Kataposan sa Kalibotan

“Sulod sa libolibong katuigan nanagna ang mga propeta sa kalaglagan nga ang kalibotan hapit nang matapos.”​—Premonitions: A Leap Into the Future.

NIADTONG 1033, mga 1,000 ka tuig lamang pagkamatay ni Kristo, ang mga molupyo sa Burgundy, Pransiya, nangalisang sa hilabihan tungod kay gitagna nga ang kalibotan matapos niadtong tuiga. Ang mga gipaabot nga kataposan sa kalibotan misamot sa dihang nahitabo ang usa ka talagsaong gidaghanon sa malaglagong mga unos ug liti ug grabeng kagutom. Daghan kaayong tawo ang nagpakita sa ilang paghinulsol sa publiko.

Pipila ka dekada una pa niini, samtang nagkaduol ang ikausa ka libo ka tuig gikan sa pagkatawo ni Kristo (sumala sa kronolohiya nga gidawat sa maong panahon), daghan ang nagtuo nga ang kataposan sa kalibotan haduol na. Ang mga buhat sa arte ug kultura sa mga monasteryo sa Uropa giingong halos mihunong na. Si Eric Russell miingon diha sa iyang librong Astrology and Prediction: “‘Sanglit nakakita nga haduol na ang kataposan sa kalibotan’ maoy komon nga mga pulong nga makita diha sa mga testamento nga gihimo niadtong ikaduhang katunga sa ikanapulong siglo.”

Si Martin Luther, nga maoy nagsugod sa Repormasyong Protestante niadtong ika-16 nga siglo, nanagna nga ang kataposan sa kalibotan haduol na sa iyang panahon. Sumala sa usa ka awtoridad, siya miingon: “Alang kanako, nakaseguro ako nga ang adlaw sa paghukom haduol na kaayo.” Laing magsusulat nag-ingon: “Pinaagi sa paglangkit sa mga hitabo sa kasaysayan uban sa mga tagna sa Bibliya nakapahayag si Luther sa pagkaduol sa kataposang kalaglagan.”

Niadtong ika-19ng siglo, si William Miller, nga sagad maoy gihatagag kredito nga maoy nagtukod sa Adventist Church, nanagna nga si Kristo mobalik tali sa Marso 1843 ug Marso 1844. Tungod niini, nagdahom ang pipila niadto nga sila pagadad-on ngadto sa langit.

Dili pa dugay, usa ka relihiyon nga naggikan sa Ukraine nga gitawag nga Great White Brotherhood nanagna nga ang kalibotan matapos sa Nobyembre 14, 1993. Sa T.B.A., usa ka ebanghelisador nga nagsangyaw diha sa radyo, si Harold Camping, miingon nga ang kataposan sa kalibotan moabot niadtong Septiyembre 1994. Dayag, kini nga mga panagna sa mga petsa alang sa kataposan sa kalibotan sayop.

Nagpahinabo ba kini sa mga tawo sa dili na pagtuo nga matapos ang kalibotan? Wala. “Ang pag-abot sa usa ka bag-ong milenyo sa tuig 2000,” miingon ang U.S.News and World Report sa Disyembre 19, 1994, “nagpabaha ug mga tagna bahin sa kataposan sa kalibotan.” Ang magasin nagtaho nga “halos 60 porsiento sa mga Amerikano nagtuo nga ang kalibotan matapos sa usa ka panahon sa umaabot; halos tulo sa usa ka bahin niini nagtuo nga kini matapos sulod sa pipila ka dekada.”

Nganong daghan kaayo ang mga tagna bahin sa kataposan sa kalibotan? Aduna bay maayong katarongan sa pagtuo nga kini matapos?