Magpabiling Andam Alang sa Malipayong Umaabot
“MAGPABILING andam,” miawhag si Jesus. (Lucas 12:40) Kon kita magpabiling andam, sa dihang si Kristo moabot “uban ang gahom ug dakong himaya,” kita malipayong makasanong sa iyang sugo: ‘Tindog nga tul-id ug ihangad ang inyong mga ulo, tungod kay ang inyong kagawasan nagakaduol na.’—Lucas 21:27, 28.
Unsang matanga sa kagawasan? Aw, ang matang sa kagawasan nga natagamtam ni Noe ug sa iyang pamilya—oo, latas sa kataposan niining kalibotana! “Ang kalibotan nagataliwan,” misulat si apostol Juan, “apan siya nga nagabuhat sa kabubut-on sa Diyos magapabilin hangtod sa hangtod.”—1 Juan 2:17.
Diha sa bag-ong kalibotan ni Jehova, tagamtamon sa yutan-ong mga ginsakpan sa Hari, si Jesu-Kristo, ang kinabuhing walay kataposan. “Ang mga matarong mismo magapanunod sa yuta,” nag-ingon ang Bibliya, “ug sila magapuyo niini sa walay kataposan.” (Salmo 37:29) Pagkakatingalahang umaabot ang gisaad sa Diyos alang sa iyang katawhan! “Ang Diyos mismo magauban kanila,” ang iyang Pulong nag-ingon. “Iyang pahiran ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa.” Kini maoy usa ka tinuod nga tagna!—Pinadayag 21:3, 4.
Bisan pa, aron matagamtam kini nga umaabot, ikaw kinahanglang molihok. Ang pagbaton ug kahibalo mao ang unang kinahanglanon. Ang Bibliya nagpatin-aw: “Kini nagakahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.”—Juan 17:3.
Kinahanglang makigtigom usab ikaw nga regular duyog sa uban nga nagpangita niini nga kahibalo, sama sa giawhag sa apostol: “Tagdon nato ang usag usa aron sa pagpasibot sa paghigugma ug sa maayong mga buhat, nga dili talikdan ang atong mga panagkatigom . . . ug labi pa gayod nga ingon samtang inyong nakita nga ang adlaw nagakaduol na.” (Hebreohanon 10:24, 25) Sa pagkatinuod, ang katawhan ni Jehova nagpakakita nga ang adlaw sa kaluwasan ngadto sa bag-ong kalibotan sa Diyos nagkahaduol na gayod, ug busa sila nailhan sa ilang tingob nga pagpakigtigom.
Mikomento bahin sa usa ka panagkatigom diha sa dakong estadyum, ang Sunday Telegraph sa London nagtaho: “Walay makita nga subong panagway nga maoy naandan niadtong nagamantala nga ‘Haduol na ang Kataposan.’ Mahimong kana ang ilang pagtuo. Kasamtangan ang tanan daw nalipay diha sa malinawon, matarong, Diyosnon apan masadyang paagi.” Ang mantalaan midugang: “Kon ang presenteng kahikayan sa kalibotan tinuod man gayod nga mahugno, ang mga Saksi sa Twickenham daw andam na kaayo sa pag-organisar ug usa ka bag-ong kahikayan.”
Ang pagpabiling andam nagkahulogang magpabiling okupado, nga nagahimo sa usa ka buluhaton nga sama niadtong gihimo ni Noe, kinsa nag-alagad sa mga adlaw una pa ang Lunop ingong “usa ka magwawali sa pagkamatarong.” (2 Pedro 2:5) Ang pagpabiling andam nagkahulogan usab sa pagpakigbahin “sa balaang mga buhat sa panggawi ug mga buhat sa diyosnong pagkamahinalaron.” Ikaw gidapit, oo, giawhag, sa pagpakig-uban sa katawhan ni Jehova sa ‘pagpaabot ug kanunayng ginahuptan nga duol sa hunahuna ang pagkaanaa sa adlaw ni Jehova.’—2 Pedro 3:11, 12.