Gikan sa Among mga Magbabasa

Relihiyon ug Gubat Buot kong ipahayag ang akong apresasyon sa Oktubre 22, 1994, nga seryal nga “Sa Dihang ang Relihiyon May Ginadapigan sa Gubat.” Bisag ako nakaagi sa panahon sa pagpamatay sa mga Serbiano sa Croatia, ako gamay pa kaayo nga mahinumdom niana. Kining komplikado ug makapasubong situwasyon sa ingon nakapabalaka pag-ayo kanako. Giapresyar ko ang inyong paagi sa pagpatin-aw sa papel sa relihiyon ug ang walay-hunong nga mga paningkamot niini sa pagpasamot sa pagkabahinbahin ug pagdumot taliwala niining mga grupoha sa nasod.

M. K., Tinipong Bansa

Ako natandog sa artikulong “Wala Kami Mosuportar sa Gubat ni Hitler.” Maayo kaayo kining pagkasulat nga ako halos nakahilak. Ako 15 anyos, ug ako nadasig sa pagkasayod nga bisan unsa ka gamay sa paglutos nga akong maagoman diha sa tunghaan o sa buluhatong pagsangyaw, ako makabuntog ra niini.

A. M., Tinipong Bansa

Wala ako makapugong sa pagpatulog pipila ka mga luha tungod sa mga paglutos nga giatubang sa pamilya ni Wohlfahrt. Ang ilang mga pagsulay naghimo sa akong diyutayng kalugda nga daw gamay ra kaayo. Ang artikulo nagdasig kanako sa pagpadayon sa paglahutay, kay nasayod nga ingong mga Kristohanon, kita mahimong makaatubang ug susamang pagsupak samtang kining sistemaha modangat sa kataposan niini.

M. S., Tinipong Bansa

Mga Paningkamot sa Pagtabang Ako nabalaka bahin sa mga Saksi ni Jehova sa Rwanda. Kay nabasa ang artikulong “Pag-atiman sa mga Biktima sa Trahedya sa Rwanda” (Disyembre 22, 1994), ako nahibalo na karon bahin sa mga kalisod nga ilang ginaagoman. Ang artikulo nag-ingon nga daghan ang nangamatay didto. Ang nakatabang kanako sa pagbatig maayo mahitungod niini mao ang pagkabaton ug paglaom nga makahimamat kanila sa Paraiso. Kasamtangan, ako nag-ampo alang sa akong mga isigkamagtutuo sa Rwanda.

J. D., Hapon

Ang Idlas nga Lobo Salamat sa daghang matudloon ug sagad makalingaw nga mga artikulo nga inyong gipatik bahin sa kalalangan ni Jehova. Ang artikulong “Usa ka Idlas nga Linalang​—Gidumtan ug Gimahal” bahin sa Canis lupus (Septiyembre 8, 1994) makaiikag kaayo. Apan ang letrato sa unang panid sa artikulo, ang hayop daw gamay kaayo nga mahimong usa ka lobo.

S. W., Alemanya

Among gipabilhan ang obserbasyon niining hait-ug-panan-aw nga magbabasa. Nadiskobrehan nga ang daw aninong dagway sa pagkatinuod gipasukad sa letrato sa usa ka coyote, dili sa usa ka lobo. Pasayloa kami sa sayop.​—ED.

Satanismo Nakita ko nga ang kasagarang paglarawan ug pangatibuk-ang ideya bahin sa musikang heavy-metal sa tibuok ninyong seryal nga “Ang Pangdani sa Satanismo” (Septiyembre 22, 1994) makahahadlok. Samtang tinuod nga adunay mga banda nga mohaom niining kasagarang paglarawan, ang inyong artikulo napakyas sa paghisgot sa ubang positibong mga mensahe sa musikang heavy-metal.

C. C., Tinipong Bansa

Bisan pa tingalig tinuod nga dili tanang musikang heavy-metal ang direktang nagpasiugda sa Satanismo. Bisan pa niana, ang makalilisang nga panagway ug paggawi bisan sa pangunang mga banda sa heavy-metal ilado. Ingon man ang dugay nang kalangkitan niining matanga sa musika sa mga droga ug kapintasan. Tungod niining mga kamatuorana, kami mibating obligado sa pagpasidaan sa mga magbabasa bahin sa pagpalangkit sa bisan unsang porma niini nga musika.​—ED.

Ang tanan nga inyong gisulat tukma. Ang among kinamagulangang anak nga babaye gipadako ingong usa ka Kristohanon. Apan unya siya misamot sa pagkarebelyoso. Among nadiskobrehan nga siya nakig-uban sa mga batan-on nga namati sa musikang heavy-metal. Iyang tagoan ang mga teyp nga heavy-metal ug mamati sa mga awit inigkagabii diha sa headphone. Ang pipila sa mga pulong maoy mga awit nga sataniko! Nadiskobrehan namo sa ulahi ang satanikong mga simbolo nga gitago sa iyang lawak. Sa kadugayan siya milayas sa among balay ug nagpadayong patay sa espirituwal. Ug kining tanan nagsugod sa musikang heavy-metal.

D. B., Tinipong Bansa