Nasuko Kaayo ang mga Klerong Anglikano sa Ordinasyon sa mga Babaye
SINULAT SA KORESPONSAL SA PAGMATA! SA BRITANYA
NIADTONG Nobyembre 1992, giaprobahan sa Katibuk-ang Sinodo sa Church of England ang plano sa pag-ordinar sa mga babaye ingong mga pari. Tungod niana, mga 150 ka nagbagolbol nga mga klerigong Anglikano ang nagpadayag sa ilang plano sa pagluwat sa 1995. Ang kadaghanan kanila naglaraw sa pagbalhin sa Romano Katolikong Iglesya. Usa ka dakog katungdanang klerigo nagtinguha sa pagdala sa iyang tibuok parokya—lakip na sa tinukod nga simbahan mismo! Ang The Sunday Times sa London nakalantaw nang daan nga ang ordinasyon sa unang grupo (nga sa ulahi gihimo niadtong Marso 1994) mahimong “labing kontrobersiyal nga seremonyas sulod sa 450-ka-tuig nga kasaysayan sa Church of England.”
Nganong nayugot ang daghang klerigo? Ang pipila yanong mibati nga dili husto nga mangatungdanan ang mga babaye ingong mga pari. Ang uban nahadlok nga ang desisyon sa sinodo makadaot sa dili pa dugayng mga paningkamot sa paghiusa sa Church of England uban sa mga relihiyong Katoliko ug Ortodokso. Sa pagkatinuod, usa ka tigpamaba sa Batikano nagpahayag nga ang papa mismo naglantaw nga ang desisyon sa Church of England maoy “usa ka dakong babag sa tanang paglaom nga magkahiusa pag-usab.”
Ugaling, ang indibiduwal nga mga parokya sa Church of England mahimo pang mobotar sa pagbabag sa mga babayeng pari. Sila makadesider pa gani sa dili pagdawat sa ilang obispo ug ipuli ang nagapanawng klerigo kinsa, sumala sa New York Times, “naghatag ug espirituwal nga pag-atiman sa mga tawong dili modawat niini gikan sa mga babayeng pari.”
Pagkalahi gikan sa tambag ni Pablo ngadto sa unang-siglong mga Kristohanon nga “kamong tanan magapamulong diha sa panag-uyon, ug nga angayng walay panagkabahin taliwala kaninyo, apan nga kamo unta sibong magkahiusa diha sa samang kaisipan ug diha sa samang dalan sa panghunahuna.” (1 Corinto 1:10) Samtang nagkainit ang kontrobersiya, daghang sakop sa parokya ang naghimog ilang kaugalingong mga desisyon. “Kami daw wala na gayoy bisan unsang butang nga pagatuohan pa dinhi sa Church of England,” miingon ang usa ka babaye. “Kalipay ug kahupayan lamang ang akong gibati sa pagbiya.”