Sa Dihang Mohampak ang Katalagman

GITIMAN-AN ang ika-20ng siglo ug dagkong mga katalagman, ug ang kadaghanan niini maoy hinimog-tawo. Apan, ang pipila dili. Nagtagna bahin sa atong mga adlaw, si Jesu-Kristo nag-ingon: “Ang nasod motindog batok nasod ug gingharian batok gingharian, ug aduna unyay mga kakulang sa pagkaon ug mga linog sa nagkalainlaing dapit.” (Mateo 24:7) Tinuod, tawo ang mabasol sa mga gubat ug mga kagutom, apan dili siya mao ang responsable sa mga linog. Sa samang paagi, samtang ang malaglagong mga lunop gipahinabo sa buhat sa tawo, siya dili ang mabasol sa mga linog. Dili usab sayop sa tawo ang mga bagyo o ang mga pagbuto sa bolkan.

Bisag unsa pay hinungdan niini, ang kinaiyanhong mga katalagman nagpakita sa pagkagamay sa tawo, sa iyang kawalay gahom atubangan sa dagkong mga puwersa sa kinaiyahan. Kining yutaa, nga atong pinuy-anan, sagad mobati nga lig-on kaayo ug solido. Apan sa dihang kini mauyog sa linog, malunopan sa nagbahang mga tubig, o mapalid sa kusog kaayong paghampak sa hangin nga daw sama ka kusga sa usa ka pagbuto, kanang maong pagbating malig-on mawagtang.

Ang kinaiyanhong mga katalagman nakapahinabog dakong kadaot ug daghang kapildihan sa kinabuhi sa ika-20ng siglo. Kini ba mahimong malikayan? Aduna bay mahimo aron makunhoran ang malaglagong mga epekto? Ingong mga indibiduwal, unsay atong mahimo sa pagpanalipod sa atong kaugalingon? Kita ba bug-os nga walay mahimo sa dihang mohampak ang katalagman? Ang katawhan ba kanunayng mahimong biktima niining paagiha? Hisgotan sa sunod nga mga artikulo kining mga pangutanaha.