Gikan sa Among mga Magbabasa

Burnout Salamat sa seryeng “Nag-antos Ka ba sa ‘Burnout’?” (Enero 8, 1995) Bisan tuod nag-alagad ako ingong usa ka payunir, sulod sa mga bulan ako mibati ug kaluya ug kulang sa motibasyon. Ang artikulo naghatag kanako ug pipila ka punto nga akong ipadapat sa personal, ilabina ang sugyot nga likayan ang pagpanaway sa uban.

M. S., Alemanya

Alang kanako kini maoy talagsaong mga artikulo tungod kay sa kataposan naila ko na ang akong suliran. Ako usa ka asawa, inahan sa upat ka anak, ug daghag buluhaton sa panimalay. Ikasubo, diyutay lang nga apresasyon ang nadawat nako gikan sa akong pamilya. Miarang-arang ang akong gibati sa pagkasayod nga kini usa ka komon nga suliran taliwala sa sensitibong mga tawo. Ayaw gayod kamo paghunong sa pagpatik ug mga artikulong sama niini!

J. M., Italya

Nakasinati ako ug kakapoy, kakulang sa kadasig, kawalay-mahimo, kawalay-paglaom, ug dili-maayong lawas. Human mabasa ang artikulo, akong nasabtan ang mga hinungdan nga mitultol niining maong mga pagbati. Buot kong masayran ninyo nga maayo kaayo ang bation nga masabtan ug masayod nga si Jehova ug ang iyang organisasyon may igong kahangawa nga mosulat ug makapadasig nga mga artikulo.

Z. L., Tinipong Bansa

Ang burnout may dakong kalabotan sa pag-undang nako sa akong pag-alagad sa Bethel ug sa ulahi sa pag-undang nako sa akong pagpayunir. Hapit na unta akong moundang sa pag-alagad ingong ansiano! Nasabtan na nako karon kon diin ako napakyas sa pagpakigsulti sa miaging mga panahon. Miuswag na ako niining bahina, ug ang akong tinamdan miarang-arang.

E. R., Tinipong Bansa

Makapadasig ang pagkasayod nga ang ubang Kristohanong mga ministro nakaagwanta niining sulirana ug nga sila nakabuntog niana.

C. L., Switzerland

Dili-Minyong mga Inahan Salamat sa artikulong “Mga Batan-on Nangutana . . . Sa Unsang Paagi ang Dili-Minyong mga Inahan Makapahimulos sa Labing Maayo sa Ilang Kahimtang?” (Oktubre 8, 1994) Inyong giila nga ang pagmabdos nahitabo gumikan sa sayop nga buhat. Apan inay mosaysay pag-ayo bahin niini ug magpasamot sa gibati sa babaye, kamo nagtanyag ug praktikal, makatabang nga mga giya.

J. D., Tinipong Bansa

Nahimo akong nag-inusarang inahan napulo ka tuig kanhi. Apan uban sa tabang ni Jehova ug sa akong Kristohanong mga ginikanan, maayo ang akong nahimo. Human mograduwar gikan sa tunghaan, ako nag-alagad ingong bug-os-panahong ministro sulod sa unom ka tuig ug naminyo sa usa ka Kristohanong lalaki nga nag-alagad karon ingong ansiano. Nakabenepisyo ako pag-ayo gikan sa kaluoy ug kalulot ni Jehova ug magamit nako ang akong kasinatian sa pagtabang sa uban.

A. M., Tinipong Bansa

Dili nako kapugngan ang akong mga luha samtang ako nagbasa sa artikulo. Nasinati nako ang mao gayong kahimtang nga inyong gibatbat. Karon nga ako Kristohanon na, nalipay ako nga nakamatuto sa akong anak babaye uban ang kaalam.

C. R. S., Brazil

Paghagok Ang artikulong “Mohagok Ka Ba?” (Septiyembre 8, 1994) nagpasidaan sa posibleng kapeligrohan sa paghagok. Apan inyong gipasabot nga kon ikaw hilabihang mohagok, ikaw adunay apnea sa pagkatulog. Dili gayod ingon niana kanunay. Ang kiling sa paghagok mahitabo samtang kita magakatigulang. Mahitabo usab kini gumikan sa mga alerhiya ug mga suliran sa sinus. Apan kon ang hilabihang paghagok duyogan sa mga yugto sa paghunong sa pagginhawa, nga sundan sa paghangos o pagpangusmo, ug mahitabo ang pagduka sa maadlaw o ang kakapoy, ang apnea sa pagkatulog lagmit maoy hinungdan. Ang labing komon nga tambal mao, dili ang pagdisdis, kondili ang kahimanan nga naggamit ug hangin sa paghupot sa mga agianan sa hangin nga walay-babag panahon sa pagkatulog.

C. S., Tinipong Bansa

Among giapresyar kining maong mga komento ug gikasubo namo nga ang among artikulo wala masabti. Ang medikal nga mga awtoridad mouyon nga ang panagsang paghagok dili abnormal. Maingon sa tanang medikal nga mga suliran, ang pagpahiling sa usa ka doktor gikinahanglan aron matambalan sa tukmang paagi.​—ED.