Kon Nganong Wala Mahadlok sa Pagbutyag
AGIG paghandom, mahimong ikaingon nga ang panagbangi tali sa mga Saksi ni Jehova ug Nazismo, o Nasyonal nga Sosyalismo, dili gayod kalikayan. Ngano? Tungod sa hugot nga pagpamugos sa Nazi nga nagkasumpaki sa tulo ka pangunang pinasukad-sa-Bibliya nga mga pagtulon-an sa mga Saksi. Kini mao: (1) Si Jehova nga Diyos mao ang Labawng Soberano. (2) Ang matuod nga mga Kristohanon neyutral sa politika. (3) Banhawon sa Diyos kadtong nagpamatuod nga matinumanon kaniya hangtod sa kamatayon.
Kining pinasukad-sa-Bibliya nga mga pagtulon-an nagtino sa hugot nga baroganan sa mga Saksi ni Jehova batok sa dili-diyosnong mga pamugos sa Nazi. Busa, maisogon nilang gibutyag ug giyagyag ang Nazismo sa pagkadaotan niini.
Ang mga Saksi ni Jehova midumili sa pagbayaw kang Hitler. Sila midumili tungod kay ilang gipasidungog ang ilang kaluwasan ngadto sa Diyos ug nagpahinungod sa ilang mga kinabuhi ngadto kaniya lamang. Ang Bibliya nag-ingon bahin kang Jehova: “Ikaw lamang ang Labing Hataas ibabaw sa tibuok nga yuta.”—Salmo 83:18.
Sa pagkamatuod, ang “Heil Hitler” nagpasabot nga si Hitler lamang ang makahatag ug kaluwasan. Busa ang mga Saksi dili mahimong magmaunongon sa Diyos ug sa samang panahon magbayaw sa bisan kinsang tawo. Ang ilang mga kinabuhi maingon man ang ilang pagkamaunongon angay lamang sa Diyos.
Ang mga Saksi ni Jehova adunay dayag nga mga sumbanan sa pagdumili sa pagsunod sa sayop nga mga gipangayo ni Hitler. Pananglitan, sa dihang ang unang-siglong mga apostoles ni Jesus gisugo sa paghunong sa pagwali sa maayong balita bahin kang Kristo, sila midumili. Matud pa nila: “Kinahanglang among sugton ang Diyos ingong magmamando inay kay sa mga tawo.” Ang Bibliya nag-ingon nga tungod sa ilang hugot nga baroganan, ang mga awtoridad ‘nagbunal kanila, ug nagmando kanila nga mohunong na sa pagsulti pinasukad sa ngalan ni Jesus.’ Bisan pa, ang mga apostoles midumili nianang sugo nga nagbatok sa Diyos. “Sila nagpadayong walay hunong sa pagpanudlo ug sa pagpahayag sa maayong balita.”—Buhat 5:29, 40-42.
Daghang unang mga Kristohanon ang nangamatay tungod kay ilang gisunod ang Diyos inay ang mga tawo. Daghan ang nangamatay sa mga arena tungod kay sila midumili, sa pagkamatuod, sa pagbayaw kang Cesar pinaagi sa paghatag ug usa ka buhat sa pagsimba kaniya. Apan alang sa maong mga tawo kadto maoy usa ka dungog ug usa ka kadaogan sa pagpamatuod nga matinumanon ngadto sa Diyos bisan hangtod sa kamatayon, sama sa usa ka maisog nga sundalo nga andam magpakamatay alang sa iyang nasod.
Sanglit usa lamang ka kagamhanan ang gipaluyohan sa mga Saksi ni Jehova, ang Gingharian sa Diyos, gilantaw sila sa uban ingong subersibo. Apan dili gayod kana tinuod. Nagsundog sa mga apostoles ni Jesus, “sila dili bahin sa kalibotan.” (Juan 17:16) Sila neyutral sa politika. Tungod sa ilang pagkamaunongon sa Diyos, sila nagabantay sa mga balaod sa ilang tagsatagsa ka tawhanong mga kagamhanan. Sa pagkamatuod, sila sulondan sa ilang ‘pagpasakop sa labaw nga mga awtoridad.’ (Roma 13:1) Sila wala gayod magpasiugdag rebelyon batok sa bisan unsang tawhanong kagamhanan!
Hinunoa, adunay usa ka linya nga dili matabok sa bisan unsang mga kahimtang. Kini mao ang linya tali sa katungdanan sa mga Saksi ni Jehova ngadto sa tawo ug sa ilang katungdanan ngadto sa Diyos. Sila naghatag kang Cesar, o mga awtoridad sa kagamhanan, ang angay kang Cesar apan sa Diyos ang angay alang Kaniya. (Mateo 22:21) Kon adunay bisan kinsa nga magpangayo kanila sa angay nga ihatag sa Diyos, kana nga pagsulay mapakyas.
Komosta kon hulgaon ug kamatayon ang usa ka Saksi? Aw, ang mga Saksi ni Jehova adunay dili matarog nga pagsalig sa katakos sa Diyos sa paghatag kanila ug kinabuhi. (Buhat 24:15) Busa ang mga Saksi adunay samang tinamdan sa tulo ka batan-ong mga Hebreohanon sa karaang Babilonya. Sa dihang gihulga sa kamatayon diha sa nagdilaab nga hudno, ilang gisultihan si Haring Nabucodonosor: “Kon mao kana, ang among Diyos nga among ginaalagaran makahimo sa pagluwas kanamo. . . . Angay mong hisayran, Oh hari, nga ang imong mga diyos dili mao ang among ginaalagaran, ug kami dili mosimba sa larawan nga bulawan nga imong gipatindog.”—Daniel 3:17, 18.
Busa, sumala sa gipadayag na sa sinugdan, sa dihang misugod si Hitler sa pagsaka sa iyang pedestal nga nagtudlo sa iyang kaugalingon ingong diyos, usa ka gubat sa mga pagtulon-an ang dili kalikayan. Ang Third Reich, nga nakahulbot na sa espada, nakakaplag sa kaugalingon nga nag-atubang sa gamay kaayong pundok sa mga Saksi ni Jehova kinsa nanumpa sa pagkamaunongon ngadto sa matuod nga Diyos, ang Labing Makagagahom, si Jehova. Bisan una pa nagsugod ang gubat, hinunoa, nadesisyonan na ang sangpotanan.
[Kahon sa panid 5]
Matinumanon Hangtod sa Kamatayon
SI Wolfgang Kusserow maoy usa niadtong gipatay tungod kay siya nagpabiling matinumanon sa Diyos ug midumili sa pagsuportar sa Nazismo. Sa wala pa siya punggotig ulo sa Marso 28, 1942, iyang gisulatan ang iyang mga ginikanan ug mga igsoon: “Karon, ingong inyong ikatulong anak nga lalaki ug igsoon, talikdan ko na kamo ugma sa buntag. Ayaw kasubo, kay moabot ra ang panahon nga magkauban kita pag-usab. . . . Pagkadako unya sa atong kalipay nianang panahona, sa dihang kita magkita pag-usab! . . . Karon kita gibulag, ug ang matag usa kanato kinahanglang mobarog sa pagsulay; unya kita pagagantihan.”
Sa hapit na siyang patyon sa Enero 8, 1941, si Johannes Harms misulat sa iyang kataposang sulat ngadto sa iyang amahan: “Ang akong silot nga kamatayon gibasa na ug ako kinadenahan sa adlaw ug gabii—ang mga lama (sa papel) maoy gikan sa mga posas . . . Minahal kong amahan, sa espiritu gitawag ko ikaw, pagpabiling matinumanon, sama sa akong pagsulay sa pagpabiling matinumanon, ug unya magkita ra kita pag-usab. Hunahunaon ko ikaw hangtod sa akong kataposan.”