Gikan sa Among mga Magbabasa
Maisogong Batan-on Ako 15 anyos, ug buot ko kamong pasalamatan sa Enero 22, 1995, nga artikulong “Ang Pagtuo ni Joshua—Usa ka Kadaogan sa mga Katungod sa Kabataan.” Pagkamakapatandog ang pagbasa mahitungod sa usa ka bata nga sama nako ug pangedaron nga may ingong pagtuo ug gugma kang Jehova! Ang pagbasa niining artikuloha nakapaamgo kanako nga kinahanglan nakong isipon ang akong relasyon uban kang Jehova nga labi pang hinungdanon.
M. S., Tinipong Bansa
Ako 16 anyos ug nalisdan sa pagkaplag ug panahon sa pagbasa sa tanan natong mga magasin. Apan akong nabasahan ang artikulo bahin kang Joshua, ug wala pa ako sukad matandog pag-ayo sa bisan unsang butang. Ang iyang baroganan batok sa pagpaabuno ug dugo maoy lig-on kaayo! Dili ko kapugngan ang paghilak. Naamgohan nako karon nga kinahanglang basahon nako ang tanan nga nagagikan sa organisasyon ni Jehova kutob sa akong maarangan.
T. S., Britanya
Ako usa ka Anglikano, apan malingaw ako sa pagbasa ug Pagmata! Dili ko kapugngan ang paghilak gumikan sa naagoman ni Joshua ug sa samang panahon pagdayeg sa Diyos nga adunay mga tawo nga may ingong pagtuo Kaniya.
P. O., Nigeria
Ako usa ka 17-anyos nga bug-os-panahong ministro, ug ako nag-antos sa sakit nga nagpahinabog grabeng anemia. Ang akong doktor buot nga moreseta ug dugo, apan akong gidumala kining sulirana. Akong nabasa ang artikulo sa makadaghang higayon, ug matag panahon nga basahon ko kana naghatag kini kanako ug dugang nga kaisog.
I. L. M., Brazil
Bisan ang kamatayon sa mga minahal wala gayod makatandog kanako sa punto nga mohilak. Apan nakahilak ako samtang gibasa nako ang kasinatian ni Joshua. Ang iyang pagtuo, kaisog, ug integridad nakatandog kanako.
T. M., Zimbabwe
Pagkatulog Dulog sa Bata Namatikdan namo sa inyong Hulyo 22, 1994, nga isyu ang kinutlo nga nagtaho sa panukiduki ni Dr. James McKenna. (“Pagpaniid sa Kalibotan”) Kini nagsugyot nga ang mga inahan nga matulog dulog sa ilang mga bata makapakunhod sa SIDS (Sudden Infant Death Syndrome). Ang New Zealand Cot Death nga pagtuon nagpakita nga adunay dakong pag-uswag sa riyesgo sa SIDS kon kauban sa ginikanan ang bata sa katre sa dihang sila natulog.
Dr. S. L. T., New Zealand
Salamat niining maong impormasyon. Di pa dugay gitin-aw ni Dr. McKenna ang iyang baroganan ug miila sa mga kapeligrohan sa wala-tuyoang pagkatuok sa bata sa dihang ang inahan matulog dulog sa iyang anak. (Itandi ang 1 Hari 3:19.) Busa kadaghanang doktor dili modasig nga matulog dulog sa bata sa usa ug nagsugyot nga pakatulgon ang masuso sa kuna nga walay mga unlan o baga nga mga habol.—ED.
Putyukan Kontra Kompiyuter Kinahanglan ko gayong ipahayag ang akong mga pasalamat sa artikulong “Putyukan Kontra Kompiyuter.” (Pebrero 8, 1995) Ang artikulo nakatandog pag-ayo nako. Ang atong Dakong Maglalalang naghimo bisan sa gagmayng mga linalang sama sa putyukan nga mahimong kahibulongan ug talagsaon.
C. K., Alemanya
Autismo Daghang salamat sa artikulong “Autismo—Pagsagubang sa mga Hagit sa Usa ka Makalilibog nga Sakit.” (Pebrero 8, 1995) Adunay batang lalaki sa among kongregasyon nga may autismo, ug ako nahimong suod kaayo kaniya. Ang artikulo nakatabang kanako sa pagsabot sa autismo. Karon nasayod ako nga makatabang ako pinaagi lamang sa paggugol ug panahon uban kaniya ug sa iyang inahan.
A. F., Hapon
Ang among anak babaye walay autismo, apan aduna siyay susamang mga kinaiya. Nalipay kami nga inyong gipahibalo ang mga tawo bahin sa mga suliran nga nabatonan sa daghang bata. Makapadasig kaayo sa dihang ang mga tawo magtratar sa maong mga bata ingong mga tawo nga angayang mabuhi. Ang mga komento sama sa ‘Naluoy ko nimo’ o ‘Dili gayod nako mahimo ang imong mahimo’ maoy dili makapalig-on. Ang among anak babaye malipayon, ug usahay ang among ubang mga anak maghatag kanamo ug labawng kapit-os. Wala namo basoli ang iyang pagkahimugso.
L. H., Tinipong Bansa