Gikan sa Among mga Magbabasa
Sundalo nga Nahimong Kristohanon Ang akong mga mata napuno sa mga luha sa nagbasa ako sa artikulong “Gibansay sa Pagpatay, Karon Ako Nagatanyag ug Kinabuhi.” (Septiyembre 8, 1994) Usa ka taga-Palestina nga nagtawag sa usa ka Hudiyo nga “igsoon”—diha lamang sa organisasyon ni Jehova makaplagan ang maong panaghiusa!
K. T. O., Malaysia
Imong Timbre Salamat sa makaiikag nga artikulong “Imong Timbre—Imong Pirma.” (Mayo 22, 1994) Ang akong bana ug ako nagtuon sa Bibliya uban sa usa ka Budhistang monghe gikan sa Taiwan. Siya mikomento bahin sa pagkatukma gayod sa artikulo! Dayon iyang gisulatan ang iyang inahan sa Taiwan ug gisultihan nga padalhan kami ug timbre nga may ngalan namo nga gikulit diha niana. Kami nalipay!
K. J., Tinipong Bansa
Kalaay Mao pay pagbasa nako sa seryal nga “Makalaay ba ang Imong Kinabuhi? Makausab Ka Niana!” (Enero 22, 1995), ug sultihan ko kamo nga dako gayod ang natabang niini kanako. Wala ko maghunahuna sa akong kaugalingon nga gilaayan, apan ako wala gayod matagbaw sa akong kinabuhi tungod sa akong balikbalik nga rotina. Ang artikulo nagpatan-aw kanako sa mga butang diha sa bug-os bag-ong kahayag.
S. V., Tinipong Bansa
Canary Islands Human nabasa ang Nobyembre 22, 1994, nga artikulong “Ang Canary Islands—Maayong Klima, Makabibihag nga Talan-awon,” buot ko nga ipahayag ang akong apresasyon alang niana ug alang sa susamang mga artikulo sa Pagmata! Kini nagpadako sa among pagsabot ug pagpabili sa atong matahom nga yuta ug sa nagkadaiyang mga linalang ni Jehova. Salamat sa pagdala kanamo niining makapalipay nga “mga panaw.”
D. G., Tinipong Bansa
Mga Misyonaryo Giapresyar ko pag-ayo ang inyong maayo kaayong seryal nga “Mga Misyonaryo—Mga Ahente sa Kahayag o sa Kangitngit?,” ilabina ang bahin sayis, “Paghimog Tinuod nga mga Disipulo Karong Adlawa.” (Disyembre 22, 1994) Ang among kongregasyon nakabatog dagkong kaayohan sa pagbuhat uban sa usa ka misyonaryong magtiayon nga nabansay sa Gilead. Ang ilang maalamong tambag ug kadasig nakaimpluwensiya kanako sa paghimo sa bug-os panahong ministeryo nga akong karera.
J. K., Botswana
Pakigbisog Batok sa Nazismo Ako natandog sa artikulong “Wala Kami Mosuportar sa Gubat ni Hitler.” (Oktubre 22, 1994) Kini naundan sa usa ka letrato bahin sa “Solemneng Deklarasyon” sa unom ka obispo nga taga-Austria sa pagsuportar sa Nazismo. Ang usa niadto nga obispo mao mismo ang mikompirma kanako niadtong 1928 sa dihang ako usa pa ka estudyanteng Heswita. Nahimuot ako sa maong “kompirmasyon” nga naggikan sa usa kinsa wala mahibalo kon unsaon sa paglig-on sa iya mismong Kristohanong pagtuo! Ang maong gubat nagputol sa akong koneksiyon uban sa Iglesya Katolika. Mibiya usab ako sa akong yutang natawhan. Bisag ako naningkamot sa dili pag-apil sa gubat sa akong kaugalingong paagi, ako walay kaisog nga sama nianang sa mga Wohlfahrts. Nahinumdom gihapon ako sa duha ka Saksi ni Jehova nga midumili sa pagdalag armas. Sila dihadiha gipamatay. Nakadayeg ako sa maong mga tawo.
P. K., Chile
Mga Batan-on Nangutana Salamat sa artikulong “Mga Batan-on Nangutana . . . Sa Unsang Paagi Akong Mapauswag ang Akong mga Ilisan?” (Enero 22, 1995) Kini nakapalihok kanako ug giareglar ang naghuot ko nga aparador. Kada adlaw ako maglisod sa pagpangitag isul-ob, bisan pa sa daghang sinina. Apan tungod sa inyong tabang, mas masayon na karon ang pagpili kon unsay isul-ob.
T. B., Hawaii
Salamat sa maayo kaayong mga ideya nga makita sa mga artikulong “Mga Uso—Unsa ang Pangdani Niini?” ug “Mga Uso—Angay ba Akong Mosunod Niini?” (Nobyembre 22 ug Disyembre 8, 1994) Ingong usa ka Kristohanong ansiano, ako moadmiter nga dili kanunay masayon ang paglikay sa pagpugos sa akong mga sukdanan ngadto sa uban. Apan ang inyong mga tudling pulong sama sa “pagtagad sa mga pagbati ug mga tinamdan sa uban” ug “paglikay sa mga estilo sa bisti ug pamatasan nga mahimong lantawon sa uban ingong hingapin” makapalihok gayod sa mga tawo.
D. Č., Croatia