Kon sa Unsang Paagi Ikaw Mabuhing Walay Kataposan
SANGLIT ang lawas sa tawo tin-awng adunay katakos alang sa mas hataas nga kinabuhi kay sa ginatagamtam sa mga tawo karon, ang uban nagbutang sa ilang pagsalig sa siyensiya sa pagdiskobre kon sa unsang paagi kita mabuhing walay kataposan. “Sa dihang atong mabatonan ang mas kompletong kahibalo bahin sa mga kemikal sa lawas ug kon unsay reaksiyon niini sa usag usa,” si Dr. Alvin Silverstein misulat, “atong mabadbad ang kahulogan sa kinabuhi. Atong masabtan . . . kon sa unsang paagi matigulang ang tawo.”
Uban sa unsang sangpotanan? Kini motultol sa “usa ka bag-ong panahon sa kasaysayan sa tawo,” matod pa ni Silverstein. “Wala na unyay ‘tigulang’ nga mga tawo, kay ang kahibalo nga magpahinabo sa pagbuntog sa kamatayon magdala usab ug walay kataposang-pagkabatan-on.”
Mahimo ba kini sa tawo? “Ayawg ibutang ang imong pagsalig diha sa mga dungganon, ni diha sa anak sa yutan-ong tawo, nga kaniya walay kaluwasan,” nag-agda ang Bibliya. “Mogula ang iyang gininhawa, sa yuta siya mobalik; nianang maong adlaw mahanaw ang iyang mga hunahuna.” (Salmo 146:3, 4) Ang tawo dili makatudlo, ni makatul-id, sa dala-sa-pagkatawong depekto nga mosangpot sa pagkatigulang ug kamatayon, sama sa atong nakita. Ang atong Maglalalang lamang ang makahimo niana.
Apan, katuyoan ba gayod sa Diyos nga ang tawo mabuhing walay kataposan sa yuta?
Ang Katuyoan sa Diyos
Diin papuy-a ni Jehova nga Diyos ang unang tawhanong magtiayon? Diha sa usa ka yutan-ong paraiso. Ug sila gisugo sa “pagsanay ug sa pagdaghan ug pun-on ang yuta ug magagahom niini.” (Genesis 1:28) Oo, ang katuyoan sa Diyos mao nga, sa ngadtongadto, ang tibuok yuta pagapuy-an sa matarong tawhanong pamilya nga mag-usa sa pagpuyo diha sa pakigdait ug kalipay.—Isaias 45:18.
Bisan tuod ang silot nga kamatayon gipahamtang kang Adan tungod sa iyang pagsupak, ang orihinal nga katuyoan sa Diyos alang sa tawo nga mabuhing walay kataposan diha sa Paraisong yuta wala mausab. (Genesis 3:17-19) “Gisulti ko na kini,” nag-ingon ang Diyos, “buhaton ko usab kini.” (Isaias 46:11; 55:11) Gipakita sa Diyos nga ang iyang katuyoan wala mausab labot sa yuta sa dihang siya miingon: “Ang mga matarong magapanunod sa yuta, ug sila magapuyo diha niana sa walay kataposan.”—Salmo 37:29.
Ingong atong Maglalalang, ang Diyos anaa sa kahimtang sa pagtul-id sa depekto nga nagpahinabo sa tawo nga matigulang ug mamatay. Diha sa unsang basehanan nga buhaton niya kini? Sanglit kana nga depekto napanunod gikan sa unang tawo, si Adan, ang Diyos nagtagana ingong usa ka halad lukat sa hingpit tawhanong kinabuhi sa iyang Anak, si Jesu-Kristo, “aron nga ang tanan nga magapasundayag ug pagtuo kaniya dili malaglag kundili makabaton ug kinabuhing walay kataposan.”—Juan 3:16; Mateo 20:28.
Sa ingon si Jesu-Kristo maoy nagpuli, sa aktuwal, sa orihinal nga Adan ingong atong amahan, o maghahatag-ug-kinabuhi. Tungod niana diha sa Bibliya si Jesus gitawag nga “ang kataposang Adan.” (1 Corinto 15:45) Busa imbes hukman nga mamatay ingong mga anak sa makasasalang Adan, ang masinundanong mga tawo mahimong isipon nga takos sa pagdawat sa walay kataposang kinabuhi ingong mga anak sa ilang “Amahan nga Walay Kataposan,” si Jesu-Kristo.—Isaias 9:6.
Siyempre, “ang Hari sa kadayonan” ug “ang Amahan sa atong Ginoong Jesu-Kristo” mao si Jehova nga Diyos. (1 Timoteo 1:17; Pinadayag 15:3; Colosas 1:3) Bisan pa si Jesu-Kristo, gawas nga gitagana ingong atong “Amahan nga Walay Kataposan” ug “Manluluwas,” mao usab ang “Prinsipe sa Pakigdait.” (Lucas 2:11) Ingong hawas sa iyang Amahan, gamiton ni Kristo ang awtoridad isip prinsipe sa pagdalag pakigdait sa yuta.—Salmo 72:1-8; 110:1, 2; Hebreohanon 1:3, 4.
Ubos sa pagmando ni Jesu-Kristo, ang yutan-ong Paraiso nga nawala ipasig-uli. Kini mahitabo, miingon si Jesus, “sa paglalang-pag-usab, sa dihang ang Anak sa tawo molingkod sa iyang mahimayaong trono.” (Mateo 19:28) Ang matinumanong mga sumusunod ni Kristo—nga ang tanan kanila maoy 144,000—magmando uban kaniya sa Paraisong yuta. (2 Timoteo 2:11, 12; Pinadayag 5:10; 14:1, 3) Milyonmilyon ang makabenepisyo gikan nianang matarong nga pagmando pinaagi sa pagtagamtam sa kinabuhi sa yuta diha sa Paraiso. Lakip kanila mao unya ang kriminal nga namatay tapad ni Jesus ug kinsa gisaaran ni Jesus: “Ikaw mahiuban kanako sa Paraiso.”—Lucas 23:43.
Busa, bisan ang dili matarong nga mga nangamatay pagabanhawon ug pagahatagan ug higayon nga makuwalipikar alang sa kinabuhing walay kataposan sa yuta. (Buhat 24:15) Matahom kaayong pagkabatbat sa Bibliya ang pagkawala sa sakit, pagkatigulang, ug kamatayon, nga nag-ingon: “Ang Diyos mismo mouban kanila. Ug iyang pahiran ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa. Ang kanhing mga butang mitaliwan na.”—Pinadayag 21:3, 4.
Kon sa Unsang Paagi Mabuhing Walay Kataposan
Segurado nga gusto nimong malakip niadtong magapanunod sa yuta ug magapuyo diha niini sa walay kataposan. Kon mao, kinahanglan nga makab-ot nimo ang mga kinahanglanon aron mabuhing walay kataposan sa Paraiso. Sa pag-ampo ngadto sa iyang langitnong Amahan, gipahayag ni Jesu-Kristo ang usa ka pangunang kinahanglanon, nga nag-ingon: “Kini nagakahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.”—Juan 17:3.
Ang mga Saksi ni Jehova malipay sa pagtabang kanimo nga makabaton niining nagahatag-kinabuhi nga kahibalo. Pangutana lamang kanila ug sila andam, nga walay bayad, sa pagduaw sa kombenyenteng panahon ug pakighisgot kon sa unsang paagi ang katuyoan sa Diyos magtuboy sa katawhan ngadto sa espirituwal ug pisikal nga kahingpitan. Makasalig ka nga ang atong labing gamhanang Maglalalang bug-os nga makahimo sa pagtul-id sa depekto nga dala sa pagkatawo nga maoy hinungdan sa pagkatigulang ug kamatayon. Ang panahon nagsingabot, ug kini haduol na, sa dihang dili na unya mubo kaayo ang kinabuhi. Panalanginan ni Jehova ang iyang katawhan ug “kinabuhing walay kataposan.”—Salmo 133:3.
[Hulagway sa panid 10]
Ubos sa harianong pagmando ni Kristo, ang pagkatigulang ug kamatayon pagabuntogon