Mga Batan-on Nangutana . . .

Nganong ang Tanan Magminyoay na Gawas Kanako?

“Nangandoy akong magminyo na unta. Unya magmalipayon ako.”​—Cheryl.a

KINAIYANHON lamang nga gustong magminyo. Gihatagan sa Diyos ang lalaki ug babaye ug kinaiyanhong pagkaibog sa kaatbang nga sekso. Ug iyang gitukod ang kaminyoon ingong permanenteng bugkos tali sa lalaki ug babaye.​—Genesis 1:​27, 28; 2:​21-24.

Nan, masabot nga mobati ka tingaling morag maluya o sinalikway kon wala ka pa maminyo​—ilabina kon daghan na sa imong katalirongan naminyo na. Ang maayog-tuyo nga mga higala makadugang sa pagpit-os. “Ako 24 anyos ug dalaga, ug sa pagkakaron wala akoy gikadeyt,” matod ni Tina. “Daw nabalaka kaayo ang tanan nga wala ako maminyo nga misugod na ako sa pagkahimong sensitibo kaayo bahin niana. Gipabati nila ako sama sa usa ka dalagang tigulang o sama nga aduna akoy apan.”

Alang sa pipila ka mga tawo ang pagkadi-minyo mosugod sa pagkahimong daw sama sa usa ka paril, usa ka dili-mabuntog nga babag, nga nag-ulang kanila gikan sa kalipay. Sa matag tuig nga molabay, morag laing lut-od sa mga tisa ang gipatong sa ibabaw nianang maong paril. Ang usa ka batan-on mahimong magsugod sa pagbati nga siya dili gayod matahom o dili-tilinguhaon. Matod sa usa ka dalagita sa Italya nga ginganlag Rosanna: “Sagad mobati akong nag-inusara ug walay-silbi; morag wala akoy purohan nga maminyo.” Ang batan-ong mga lalaki mahimong makabaton sa samang mga pagbati. Pananglitan, si Frank misugod pagbati nga ang tanan niyang mga higala nahimong mas madanihon ug eksperyensiyado human sila naminyo. Siya misugod sa paghunahuna kon ang kaminyoon mohimo sa susama alang kaniya.

Nakaplagan ba nimo ang imong kaugalingon nga naghunahuna sa samang mga hunahuna? Kon ikaw di-minyo, naghunahuna ka ba usahay nga aduna kay apan o kon ikaw ba tingali gitakda sa kinabuhing di-minyo hangtod sa hangtod?

Kaminyoon​—Tumotumo Kontra Kamatuoran

Una sa tanan, susihon nato ang popular nga pagtuo nga ang kaminyoon awtomatikong magbukas sa ganghaan ngadto sa kalipay. Tinuod nga ang kaminyoon makadugang ug sagad nagdugang sa kalipay sa usa. Bisan pa niana, ang pagminyo lamang dili makapahimong malipayon sa usa. Bisan ang kinamaayohang mga kaminyoon mopahinabog usa ka sukod sa ‘kasakitan sa unod.’ (1 Corinto 7:28) Ang kalipay sa kaminyoon modangat lamang pinaagi sa padayong pagsakripisyo sa kaugalingon ug kakugi. Makaiikag, ang labing bantogang tawo nga nabuhi sukad, si Jesu-Kristo, maoy di-minyo. May si bisan kinsa ba nga makatawag niyang dili-malipayon? Wala gayod! Ang iyang kangaya naggikan sa pagbuhat sa kabubut-on ni Jehova.​—Juan 4:34.

Ang laing tumotumo mao nga ang kaminyoon maoy garantisadong tambal sa kamingaw. Dili kana garantisado! Mimulo ang usa ka minyong Kristohanong lalaki: “Ang akong asawa wala pa makasugid kanako sa iyang pagbati o may makahuloganong pakig-estoryahay kanako, wala gayod sukad!” Sama usab ug reklamo ang pipila ka Kristohanong mga asawa nga ang ilang mga bana napakyas sa pagpakigkomunikar o nga sila mas interesado sa ilang mga trabaho o mga higala kay kanila. Ikasubo, ang pagkahimong minyo apan mamingawon kasagaran kaayo.

Unya anaa kadtong nag-isip sa kaminyoon ingong kaikyasan sa mga suliran sa pamilya. Matod sa usa ka batan-ong minyong babaye: “Sa akong pagtuo angay unta nga hatagan ako ug higayon sa akong mga ginikanan nga mohamtong. Apan wala nila ako tugti nga makatrato o maglulinghayaw . . . Kon gihatagan pa lang unta ako sa akong mga ginikanan ug higayon, sa akong hunahuna dili unta ako maminyo sa edad nga 16 anyos. Apan buot kong ipakita kanila nga ako hamtong na.”

Tingali bation nimo nga ang kinabuhi sa balay mapig-oton ra kaayo. Apan ang kaminyoon nagdalag mga responsabilidad nga makalimite pag-ayo sa personal nga kagawasan sa usa. Hunahunaa kon unsay nalangkit sa paghupot ug trabaho, pagbayad sa mga balayranan, pag-ayo-ayo sa balay ug sa kotse, pagluto, pagpanglimpiyo, pagpanglaba, ug tingali bisan pagpadako ug kabataan! (Proverbio 31:​10-31; Efeso 6:4; 1 Timoteo 5:8) Daghang batan-on ang nakurat sa dihang nag-atubang niining maong mga responsabilidad sa mga hamtong.

Ang pipila nagtuo usab nga ang kaminyoon maoy sekreto nga mahimong popular. Apan walay garantiya nga ang uban magtinguha nga makig-uban kanimo​—o sa imong kapikas—​tungod lang kay minyo ka. Ang mga tawo makagusto kanimo kon ikaw buotan, manggihatagon, ug dili-hakog, minyo ka man o di-minyo. (Proverbio 11:25) Ug bisan pag ang pagkahimong minyo mas magpasayon sa paghaom uban sa minyong mga higala, kinahanglang hinumdoman sa bana ug asawa nga sila maoy “usa ka unod.” (Genesis 2:24) Ang ilang pangunang kabalaka maoy sa unsang paagi magkasinabot sila sa usag usa​—dili sa ilang mga higala.

Andam Nang Magminyo?

Siyempre, bisan pag makita nimo ang pagkamakataronganon niining mga puntoha, usahay tingali mobati ka gihapon ug kaluya. Usa ka karaang panultihon nagpahayag niana sa ingon niini: “Ang pagpaabot nga napalangan makapaguol sa kasingkasing.” (Proverbio 13:12) Pananglitan, ang batan-ong si Tony nakakaplag sa iyang kaugalingon sa kahimtang nga halos wala nay paglaom tungod kay siya di-minyo. Misugod siya pagbati nga siya andam sa pagpakigminyo kang bisan kinsa. Usa ka dalagita nga ginganlag Sandra sa susama maluya matag panahong may masayran siya bahin sa nagakaugmad nga paghigugmaay; maghunahuna siya kon kanus-a moabot ang iyang panahon.

Sa dili pa nimo tugotan ang imong kaugalingon nga mawad-an ug paglaom, pangutan-a ang imong kaugalingon, ‘Andam na ba gayod akong magminyo?’ Sa prangka, kon ikaw tin-edyer, ang tubag lagmit maoy dili gayod! Sa Tinipong Bansa, kadaghanang kaminyoon sa mga tin-edyer mabungkag sulod sa lima ka tuig.b Siyempre, ang pipila ka mga batan-on tingali sa linain hamtong na bisan batan-on pa ug makapalampos sa kaminyoon. Apan wala kana magpasabot nga angay ka nga magminyo. Sa pagkamatinud-anon nakonsiderar ba nimo kon ikaw andam na sa pagpas-an sa mga responsabilidad sa kaminyoon?

Ang matinud-anong pagsusi sa kaugalingon mahimong magpadayag ug pipila ka mga butang. Pananglitan, unsa ikaw ka hamtong ug responsable? Makatigom ka ba ug salapi, o gastohon nimo dayon kini inigkadawat nimo niini? Bayran ba nimo ang imong mga balayranan sa tukmang panahon? Makaarang ka ba sa paghupot ug trabaho o sa pagdumalag panimalay? Ikasabot mo ba ang uban, sama sa mga kauban sa trabaho ug mga ginikanan, o kanunay kang nakig-away kanila? Kon mao, imong makita nga ang maayong pagsinabtanay uban sa usa ka kapikas sa kaminyoon mahimong malisod kaayo.

Kon ikaw tin-edyer pa, lagmit madiskobrehan nimo nga nagkinahanglan ka pa ug pipila ka mga tuig nga kasinatian aron makab-ot ang pagkahamtong ug kalig-on nga gikinahanglan sa pagkahimong usa ka maayong bana ug maayong asawa. Ang pagkaamgo niining maong kamatuoran hayan motabang kanimo sa pagpasibo sa imong mga pagdahom ug panglantaw sa kaminyoon ingong posible sa umaabot. Tingali makatabang kini kanimo nga mahimong labi pang ‘makapiho diha sa kasingkasing’ bahin sa imong di-minyo nga kahimtang, labing menos sa pagkakaron.​—1 Corinto 7:37.

Tukmang Pagpangandam

Apan, unsa na man kon nagtuo ka nga ikaw saylo na sa “pagbuswak sa pagkabatan-on” ug gibati nimo nga andam ka nang magminyo? Makapaluya kon diyutay ra ang potensiyal nga mga kapikas sa kaminyoon o kon ikaw isalikway matag panahon nga magpahayag ka ug interes sa usa ka tawo. Apan nagpasabot ba gayod kini nga ikaw dili-tilinguhaon? Dili gayod. Si Haring Solomon wala molampos sa pagpangulitawo sa usa ka dalaga nga iyang gihigugma​—ug siya usa sa labing adunahan, labing maalamon sa mga tawo nga nabuhi sukad! Ang suliran? Ang kasingkasing sa dalaga wala gayod makiling sa pagbaton ug romantikong mga pagbati kaniya. (Awit ni Solomon 2:7) Sa susama, tingali wala ka pa makahibalag ug usa ka tawo nga tinuod nga magkaangay kamo.

Gibati ba nimo nga ngil-ad ka ra kaayo ug dagway nga dili makadanig tawo? Tinuod, ang maayong hitsura adunay iyang mga bentaha, apan dili kana ang labing hinungdanon. Kon hunahunaon nimo ang mga magtiayon nga imong nailhan, dili ba tinuod nga taliwala kanila maoy mga tawo nga lainlain ug mga gitas-on, porma, ug sukod sa pagkamadanihon? Gawas pa, ang usa ka tawo nga tinuod nga mahadlokon sa Diyos labing maghunahuna kon sama sa unsa ka sa “natagong pagkatawo sa kasingkasing.”​—1 Pedro 3:4.

Siyempre, dili gayod nimo pasagdan ang imong pisikal nga panagway; makataronganon lamang nga himoon nimo ang imong labing maarangan nga matahom tan-awon. Ang naglago nga sinina ug pamostura makahatag sa uban ug sayop nga paghunahuna bahin kanimo.c Dugang pa, ang dili-maayong mga arte sa pagpakigsulti o mga apan sa imong personalidad makawala sa gana sa uban sa dili ka pa nila masinati. Ang usa ka hamtong nga higala o usa ka ginikanan makasulti nimo kon gikinahanglan ang pipila ka mga kausaban niining bahina. Ang kamatuoran tingali masakit, apan ang pagdawat niana makatabang kanimo sa paghimog mga kausaban ug sa ingon mahimong labi pang madanihon sa uban.​—Proverbio 27:6.

Hinunoa, sa kataposan ang imong katakos, o bili, ingong tawo dili ipasukad sa kon ikaw minyo o dili. Ang tinuod nga bililhon mao ang paglantaw sa Diyos kanimo, ug siya “nakakita kon unsa ang kasingkasing.” (1 Samuel 16:7) Busa ang imong kabalak-an mao ang pagbaton sa pag-uyon ni Jehova ug dili ang pagminyo. Ayaw tugoti ang naulahi nga maoy mangibabaw sa imong mga hunahuna ug kabildohay. Mainampingong bantayi ang imong kaubanan, pagpilig musika, ug lulinghayaw.

Tinuod, ang tinguha nga maminyo tingali dili mawala, apan ayaw kalisang. Pagbaton ug pailob. (Ecclesiastes 7:8) Inay lantawon ang imong pagkadi-minyo ingong tunglo, pahimusli pag-ayo ang kagawasan nga gitanyag sa pagkadi-minyo ug ang mga kahigayonan nga gihatag niini sa pag-alagad sa Diyos nga walay kababagan. (1 Corinto 7:​33-35, 38) Moabot ra ang tukmang panahon nga maminyo ka​—lagmit gani mas sayo pa kay sa imong gihunahuna.

[Mga footnote]

[Hulagway sa panid 26]

Sayon ang pagbati nga sinalikway sa dihang ang mga katalirongan sa usa magminyoay na