Makasalig Ka sa Diyos

BUG-OS kang makasalig sa Diyos ug sa iyang Pulong, ang Bibliya. Human sa tibuok-kinabuhing pagsalig sa Diyos, usa ka tawo, nga kapin sa 100 ka tuig ang panuigon, mihatag niining maong katarongan sa iyang pagsalig: “Tan-awa!” siya miingon, “karong adlawa ako moadto sa dalan sa tibuok nga kayutaan, ug kamo mahibalo sa bug-os ninyong mga kasingkasing ug sa bug-os ninyong mga kalag nga walay usa ka pulong sa tanang maayong mga pulong nga gisulti ni Jehova nga inyong Diyos kaninyo nga napakyas. Kining tanan nahitabo kaninyo. Walay usa ka pulong niana nga napakyas.”​—Josue 23:14.

Kining tawhana, si Josue, usa ka lider sa karaang Israel, nakasinati sa bug-os nga pagkakasaligan sa Diyos ug sa iyang Pulong. Ang tanan nga gisaad sa Diyos sa Israel natuman. Kon mahibalo ka ug dugang mahitungod sa Maglalalang ug sa iyang Pulong, maugmad nimo kanang samang pagsalig. Usa ka ulahing magsisimba sa Diyos, si Haring David, mipahayag niana niining paagiha: “Kadtong nahibalo sa imong ngalan magasalig kanimo, kay ikaw dili gayod magabiya niadtong nagapangita kanimo, Oh Jehova.”​—Salmo 9:10.

Dili Ka Gayod Pakyason sa Diyos

Kon labaw pa nimong ‘mailhan ang ngalan sa Diyos’ ug kon unsay kahulogan sa maong ngalan​—iyang mga katuyoan, mga kalihokan, ug mga hiyas​—mas mosalig ka pa kaniya. Siya usa ka kasaligang Higala nga dili gayod magpakyas kanimo o dili motuman sa iyang saad. Ug ayaw pabugnaw sa kasalingkapaw niadtong nangangkon nga iyang mga hawas ug unya nagmaluibon sa uban. Ang mga tawo nga sama niana gipaila sa Bibliya ingon nga dili kasaligan. Ang relihiyosong mga salingkapaw mosulti ug usa ka butang apan mobuhat sa kaatbang. Ingon sa gipasidaan ni apostol Pedro, ilang gipahimuslan ang ilang mga panon. Si Pedro misulat: “Gumikan niini abusaran ug sulti ang dalan sa kamatuoran. Usab, uban ang hakog nga kaibog sila magpahimulos kaninyo pinaagig mini nga mga pulong.”​—2 Pedro 2:2, 3.

Ang maong mga tawo wala maghawas sa Diyos. Wala nila tahora ang iyang Pulong. Nganong dili nimo susihon mismo ang kaugalingong talaan ug pamatuod sa Diyos ingon sa gipadayag sa Bibliya? ‘Apan,’ mangutana ka tingali, ‘nganong labi pa akong mosalig sa Bibliya kay sa ubang basahon?’ Tinuod nga dihay dili maihap nga relihiyosong mga panglimbong latas sa kasaysayan, apan lahi ang Bibliya. Tagda ang mosunod nga mga katarongan sa pagsalig sa Bibliya.

Mga Katarongan sa Pagsalig sa Bibliya

Makasalig ka sa Bibliya tungod kay ang mga saad ug mga tagna niini kanunayng matuman. Aniay usa lang ka pananglitan. Bisan daw dili katuohan sa nabihag nga Israel, si Jehova nga Diyos, ang awtor sa Bibliya, misaad nga sila iyang hatagag kagawasan gikan sa pagkabihag sa gamhanang Babilonya ug ipasig-uli sila ngadto sa Jerusalem. Morag wala kadtoy paglaom tungod kay ang Babilonya mao ang nagamandong gahom sa kalibotan sa maong panahon ug bug-os nga naglaglag sa Jerusalem. Apan mga duha ka gatos ka tuig una pa niana, ginganlan pa gani ni Jehova ang Persianong magmamandong si Ciro nga maoy mopukan sa Babilonya ug magpagawas sa Iyang katawhan ug mitagna kon sa unsang paagi mapakyas ang mga panalipod sa suba sa Babilonya. Mabasa nimo ang asoy sa Isaias 44:24–45:4.

Ang librong Nangatarongan Gikan sa Kasulatan misaysay kon sa unsang paagi ang saad natuman: “Si Ciro wala pa matawo sa dihang gisulat ang tagna. . . . Sa detalye ang tagna natuman sugod sa 539 W.K.P. Gipasimang ni Ciro ang katubigan sa Subang Eufrates ngadto sa usa ka artipisyal nga lanaw, ang mga ganghaan sa suba sa Babilonya sa kadanghag wala masira panahon sa piyesta sa siyudad, ug ang Babilonya napukan ngadto sa mga Medianhon ug mga Persianhon ilalom ni Ciro. Human niadto, gihatagag kagawasan ni Ciro ang nadestiyerong mga Hudiyo ug gipapauli sila sa Jerusalem uban sa sugo sa pagtukod pag-usab sa templo ni Jehova didto.”a Ang matag saad nga sama niini nga gihimo sa Diyos, matag tagna nga anaa sa Bibliya, sa walay sipyat natuman.

Ang laing pananglitan sa natuman nga tagna mao ang kamatuoran mismo nga ang pagsalig nagakamenos sa atong siglo. Ang Bibliya nagtagna niini ingong ilhanan sa panahon nga atong gikinabuhian, tungod kay nagtawag kini sa yugto nga nagsugod sa Gubat sa Kalibotan I niadtong 1914 nga “kataposang mga adlaw” ug nag-ingon nga magpahinabo kinig “makuyaw nga mga panahong lisod sagubangon.” Kini nagpahibalo nga sa atong adlaw ang mga tawo maoy “mga mahigugmaon sa kaugalingon, . . . mapasiatabon-sa-kaugalingon, mapahitas-on, . . . dili-mapasalamaton, dili-maunongon, walay kinaiyanhong pagbati, dili ikasabot sa bisan unsa, mga tigbutangbutang, . . . mga mabudhion, gahig-ulo, managburot sa garbo.” Ug kini usab nagtagna: “Ang mga tawo nga tuman-kadaotan ug mga impostor mosamot pa kangil-ad.” (2 Timoteo 3:1-4, 13) Mao gayod kana ang atong nakita sa atong panahon.

Makasalig ka sa Bibliya tungod kay kini bug-os nga matuod. Walay usa sukad nga milampos sa paghagit sa pagkatinuod sa Bibliya. Ang iladong siyentipiko nga si Sir Isaac Newton miingon: “Nakakaplag ako ug mas tinong mga ilhanan sa pagkatinuod sa Bibliya kay sa bisan unsang sekular nga kasaysayan.” Walay palsipikasyon dinhi sama sa “mga talaadlawan” ni Hitler! Ug unsay kalainan sa Bibliya gikan sa ubang karaang mga sinulat? Ang The Bible From the Beginning nag-ingon: “Sa gidaghanon sa karaang MSS. [mga manuskrito] nga nagpamatuod sa usa ka sinulat, ug sa gidaghanon sa katuigan nga milabay tali sa orihinal ug sa nagpamatuod nga MSS., ang Bibliya nagpahimulos ug tinong bentaha ibabaw sa klasikal nga mga sinulat [niadtong kang Homer, Plato, ug uban pa]. . . . Ang tanang klasikal nga MSS. maoy diyutay lamang kon itandi sa Biblikanhong mga manuskrito. Walay karaang basahon nga napamatud-an pag-ayo sama sa Bibliya.” Ang tanan bahin sa Bibliya nagpunting sa bug-os nga katinuoran niini.

Makasalig ka sa Bibliya tungod kay kini tukma kaayo sa tanan niining mga pamulong. Ang Bibliya nag-ingon nga ang Diyos “nagabuklad sa amihan sa dapit nga walay sulod, nga nagabitay sa yuta sa wala.” (Job 26:7) Inay sublion ang mahandurawong mga teoriya niadtong panahona, sama sa ang yuta gisangga sa mga elepante, gipamulong sa Bibliya ang dugay nang naestablisar nga siyentipikanhong kamatuoran​—nga ang yuta “nagabitay” sa wanang. Dugang pa niana, kapin sa duha ka libo ka tuig una pa sa panahon ni Columbus, ang Bibliya tin-awng nag-ingon nga ang yuta lingin.​—Isaias 40:22.

Makasalig ka sa Bibliya tungod sa pagkamatinud-anon ug pagkamadayganon niini. Ang mga magsusulat sa Bibliya wala magpalsipikar sa bisan unsa. Bisan sa dihang ang ilang giingon mipabanaag ug daotan kanila, sa ilang kaubanan, ug sa ilang mga magmamando, sila matinud-anong nagtaho sa mga panghitabo. Sa iyang ebanghelyo si apostol Mateo, pananglitan, dayag nga midawat nga ang mga apostol ni Jesu-Kristo usahay mipakitag kakulang sa pagtuo, nag-awayay alang sa pagkainila, ug nagbiya gani kang Jesus sa dihang gidakop siya.​—Mateo 17:18-20; 20:20-28; 26:56.

Ang laing talagsaong katarongan sa pagsalig sa Bibliya mao nga ang tambag sa Bibliya kanunayng napamatud-ang praktikal ug makaayo sa dihang ang mga tawo may igong pagsalig niana nga ipadapat kana. (Proverbio 2:1-9) Ang tambag sa Bibliya sukwahi kaayo sa subsob huyang nga mga tambag sa “mga eksperto” bahin sa pagsagubang sa mga suliran sa kinabuhi. Mahitungod sa mga kolumnista nga nagtanyag sa maong mga tambag diha sa daghang nasodnong mga mantalaan, ang The Sunday Times sa London nangutana: “Ang libolibo bang tawo matag tuig nagsugid sa ilang mga hunahuna ug mga pagbati ngadto niining mga kolumnista nga basta nagtambag nga walay pagpamalandong?” Ang mga magsusulat sa Bibliya wala magtambag nga walay pagpamalandong. Ilang gisulat ang kasaligan, dinasig-sa-Diyos nga tambag nga napamatud-ang kasaligan latas sa kasaysayan.​—2 Timoteo 3:16, 17.

“Ang tambag sa Bibliya nagpanalipod kanako gikan sa direksiyon nga makadaot unta sa akong kinabuhi,” matod ni Ellen, nga karon nag-edad na ug kapin sa 30 anyos ug may malipayong kaminyoon. “Ang akong mga ginikanan, nga nagdiborsiyo, wala kaayoy pagtuo sa kahikayan sa kaminyoon, ug sa aktuwal gidasig nila ako nga makigpuyopuyo lamang sa usa ka lalaki inay pakaslan siya. Sa dihang gihunahuna nako ang kalig-on nga gihatag sa pagsunod sa mga prinsipyo sa Bibliya sa akong kinabuhi, ako nalipay nga ako labawng misalig sa Bibliya kay sa tambag sa akong kaugalingong mga ginikanan.”​—Tan-awa ang Efeso 5:22-31; Hebreohanon 13:4.

“Ako 14 anyos lamang sa dihang nagsugod ako sa pagtuon sa giingon sa Bibliya bahin sa mga butang,” matod ni Florence. “Karon sa dihang hinumdoman nako ang katuigang 1960 ug ang kasamok nga gipahinabo sa akong mga katalirongan sa ilang mga kaugalingon tungod sa pagsunod sa mga prinsipyo ug mga pamatasan niadtong panahona, ako mapasalamaton kaayo sa proteksiyon nga gitagana sa tambag sa Bibliya kanako ingong usa ka batan-on, walay-kasinatiang babaye.”​—Tan-awa ang 1 Corinto 6:9-11.

“Sa akong kahimtang,” matod ni James, “nalangkit ako sa panugal, panigarilyo, ug paghuboghubog.” Siya mipadayon: “Nasayod ako sa kadaot nga gipahinabo niini sa daghan kaayong tawo ug sa ilang mga pamilya. Sa sinugdan dili nako masabtan ang kalabotan sa Bibliya sa akong mga suliran. Apan karon tin-aw nakong makita kon sa unsang paagi kini maayong nag-impluwensiya sa akong panghunahuna ug nakatabang kanako sa paghupot ug mas makapahimsog nga estilo sa kinabuhi.”​—Tan-awa ang 2 Corinto 7:1.

Si Mary Anne naghunahunang maghikog tungod sa mga pagpit-os sa kinabuhi ug emosyonal nga mga kalisdanan nga nagsumikad sa usa ka masamok nga kagikan. “Ang paghikog daw mao na lamang ang bugtong solusyon niadtong panahona,” matod niya. “Apan ang Bibliya nag-usab sa akong panghunahuna. Tungod lamang kadto sa akong gibasa sa Bibliya nga wala ako maghikog.”​—Tan-awa ang Filipos 4:4-8.

Unsa may nakatabang niining mga tawhana? Ilang naugmad ang bug-os nga pagsalig sa Diyos ug sa iyang Pulong, ang Bibliya. Ang Diyos nahimong sama sa usa ka sinaligan, minahal nga higala nga mihunghong ug tambag sa ilang mga dalunggan sa panahon sa kalisod. (Itandi ang Isaias 30:21.) Ilang nakat-onan ang mga prinsipyo sa Bibliya nga nakatabang kanila sa pagsagubang sa mga pagpit-os ug mga suliran sa kinabuhi. Ug sila nakakat-on sa pagsalig sa kahibulongang mga saad gikan sa Diyos nga dili makabakak​—sama sa saad sa matahom nga “bag-ong yuta” nga walay panglimbong, pamakak, ug pagpahimulos ug walay kagul-anan, sakit, ug bisan kamatayon!​—2 Pedro 3:13; Salmo 37:11, 29; Pinadayag 21:4, 5.

Maugmad nimo ang samang pagsalig. Ang kalibotan karon mahimong magluib kanimo, apan makasalig ka nga ang imong pagsalig sa Diyos ug sa iyang Pulong dili gayod pakyason. Ang mga magpapatik niining magasina malipay sa paghikay nga adunay motabang kanimo nga mas makaila sa Diyos ug sa iyang Pulong, ang Bibliya.

[Footnote]

[Hulagway sa panid 8]

Mga 200 ka tuig nga abante, ang propeta sa Diyos nagtagna kon sa unsang paagi mapukan ang Babilonya

[Hulagway sa panid 9]

Nakaplagan ni Sir Isaac Newton ang Bibliya nga kasaligan