Mga Pumapalit Pagbantay! Ang Paghimog-Mini Mahimong Makamatay
ANG di-sinati, wala magdudang mga biktima mahimong mailad. Ang mahalon-tan-awong relo nga gitanyag kanimo sa nagbaligya sa dalan nga barato kaayo—tinuod ba kini o mini? Paliton ba nimo kini? Ang mahalong kupo nga gama sa balhibo sa hayop nga gitanyag kanimo sa bintana sa kotse sa usa ka kilid sa dalan—nanumpa ang namaligya nga kini mink. Ang kaanindot ba niini ug ang kabarato modaog sa imong maayong paghukom? Ang singsing nga brilyante sa tudlo sa bag-o pang gidiborsiyohang asawa—nga karon walay kuwarta ug wala nay balay, nga naghulat sa tren sa usa ka estasyon sa subwey sa New York—maimo sa diyutang kantidad lamang. Naghunahuna ka ba nga lisod palabyon kini nga baratilyo? Tungod kay kining pangutanaha gisukna niining artikuloha nga naghisgot bahin sa paghimog-mini ug tungod sa mga sirkumstansiya nga gipresentar, lagmit ikaw motubag ug “NUNGKA!”
Aw, atong ilisdan ang mga lugar ug ang mga kahimtang ug tan-awon kon unsay imong mga tubag. Komosta man ang bahin sa mahalon, popular may ngalan nga bag nga gibaligya sa lehitimong tindahan sa madanihon ubos kaayong diskuwento? Ang ilado-kaayong marka sa wiski nga gibaligya sa duol nga tindahag alak sa eskina? Tino nga walay problema kini. Tagda, usab, ang film nga iladog marka nga gibaratilyo sa botika o tindahan ug kamera. Niining higayona ang mahalong relo nga mokantidad ug libolibong dolyar gitanyag kanimo, dili sa usa ka naninda sa karsada, kondili sa usa ka tinamod nga tindahan. Ang prisyo gipaubsan pag-ayo. Kon ikaw interesado nga mopalit ug mahalong relo, paliton ba nimo kini? Dayon anaa ang iladong mga marka sa sapatos nga baratog kantidad sa usa ka partikular nga tindahan nga gitudlo sa imong mga higala. Segurado ka ba nga dili kini baratong mga imitasyon lamang?
Diha sa kalibotan sa arte, sa mga galeriya sa uso nga gidibuhong larawan, may baratilyong mga subasta alang sa mga tigkolekta ug mahalong arte. “Pagbantay,” nagpasidaan ang usa ka eksperto sa arte. “Ang mga eksperto nga daghan nag katuigang eksperyensiya nangailad. Nailad usab ang mga tigbaligya. Ingon man ang mga kurador sa museo.” Ikaw ba hawod kaayo nga buot mong tugbangan ang kaabtik sa posibleng mga tighimog-mini? Pagbantay! Ang tanang nahisgotang mga butang mahimong mini. Kasagaran ang kadaghanan niini mini. Hinumdomi, kon talagsaon ang butang ug mahal, aduna gayoy usa diha nga mosulay nga himoan kinig mini.
Ang pagpamaligyag mini maoy $200-ka-bilyong negosyo sa tibuok kalibotan ug “mas kusog nga miuswag kay sa daghang industriya nga gibiktima niini,” misulat ang magasing Forbes. Ang mini nga mga piyesa sa kotse nakapildi sa Amerikanhong mga tiggamag kotse ug mga tigsuplay ug $12 bilyones sa usa ka tuig gumikan sa wala kabayring buhis sa tibuok kalibotan. “Ang industriya sa kotse sa T.B. nag-ingon nga kini makapatrabaho ug dugang 210,000 ka tawo kon mapahunong niini sa negosyo ang mga tigsuplay ug mining mga piyesa sa kotse,” nag-ingon ang magasin. Gikataho nga halos katunga sa mga pabrika nga naghimog mini maoy gawas sa Tinipong Bansa—nga anaa halos sa tanang dapit.
Mga Paghimog-Mini nga Makamatay
Ang ubang mga matang sa mini nga mga produkto makadaot. Ang inimporte nga mga tuwerka, mga perno, ug mga tornilyo naglangkob ug 87 porsiento sa $6 ka bilyong negosyo sa T.B. Apan, gipakita sa ebidensiya sa pagkakaron nga 62 porsiento sa tanan niining mga igpanumpay may mini nga mga markang ngalan o wala makaabot sa sukdanan sa balaod sa mga marka sa kalidad. Nakita sa usa ka taho sa General Accounting Office (GAO) sa 1990 nga labing menos 72 ka Amerikanhong “mga planta sa koryenteng nukleyar nanaod ug ubos ug kalidad nga mga igpanumpay, ang uban gitaod diha sa mga sistema sa pagsira sa reaktor kon adunay aksidenteng nukleyar. Ang problema nagkagrabe, nag-ingon ang GAO. . . . Ang gidak-on sa problema, kapildihan sa mga tigbayad ug buhis o posibleng mga kapeligrohan nga maoy resulta sa paggamit niining [ubos ug kalidad nga] mga produkto wala mahibaloi,” nagtaho ang Forbes.
Ang puthawng mga perno, kansang kalig-on dili igo alang sa mga katuyoan nga gigamit, gihimoan ug mini ug gipayuhot ngadto sa Tinipong Bansa sa walay konsensiyang mga kontratista. “Mahimong ipameligro niini ang kahilwasan sa mga tinukod nga opisina, mga planta sa koryente, mga taytayan ug kasangkapang militar,” sumala sa American Way.
Ang imitasyon nga mga brake lining maoy gipasanginlan sa pagkabangga sa bus sa Canada sa pipila na ka tuig nga miagi nga mipatay ug 15 ka tawo. Gitaho nga ang mini nga mga piyesa nakita diha sa dili-madahom nga mga dapit sama sa mga helikopter sa militar ug sa salakwanang sa T.B. “Ang kasarangang pumapalit di-kaayo magtagad kon maghisgot ka bahin sa mini nga relo nga Cartier o Rolex,” nag-ingon ang iladong imbestigador sa paghimog-mini, “apan kon ang imong panglawas ug kahilwasan mameligro, sila mabalaka kaayo niana.”
Apil sa listahan sa potensiyal nga peligrosong mini nga mga produkto mao ang mga pacemaker sa kasingkasing nga gibaligya ngadto sa 266 ka hospital sa T.B.; imitasyong mga pildoras sa pagkontrolar sa pagpanganak nga nakaabot sa baligyaan sa Amerika niadtong 1984; ug mga pamatay sa agup-op, nga sa dakong bahin gama sa tisas, nga nagdaot sa tanom nga kape sa Kenya niadtong 1979. Kaylap ang mini nga mga medisina nga nagpameligro sa mga kinabuhi sa mga gumagamit. Ang nangamatay sa tibuok kalibotan tungod sa mini nga mga medisina tingalig makapakurat.
Adunay nagdakong kabalaka bahin sa mini nga gagmay dekoryenteng mga kasangkapan sa balay. “Ang uban niining mga produktoha may mini nga mga markang ngalan o awtorisasyon sama sa nalista sa Underwriters Laboratory,” nagtaho ang American Way. “Apan ang maong mga produkto wala himoa nga adunay samang mga sukdanan sa kahilwasan, busa kini mobuto, mopahinabog mga sunog sa balay ug maghimo sa tibuok nga instalasyon nga dili luwas,” matod pa sa usa ka enhinyero sa kahilwasan.
Sa Tinipong Bansa ug sa Uropa, ang mga pundok sa abyasyon nabalaka usab. Sa Alemanya, pananglitan, nakita sa mga kompaniya sa ayroplano ang mini nga makina ug mga piyesa sa preno sa ilang imbentaryo. May mga imbestigasyong “ginahimo sa Uropa, Canada ug sa United Kingdom, diin ang dili aprobadong mga piyesa (tuwerka sa rotor shaft sa ikog) maoy nakaingon kuno sa bag-o pang makamatayng pagkahagsa sa helikopter,” nag-ingon ang mga opisyal sa transportasyon. “Nakaembargo ang mga ahente ug daghang mini nga mga piyesa sa makina sa jet, mga ighihimong preno, ubos ug kalidad nga mga perno ug mga igpanumpay, depektosong mga piyesa sa sistema sa sugnod ug paglupad, dili aprobadong mga instrumento sa cockpit ug mga computer component sa paglupad nga hinungdanon kaayo sa kahilwasan sa paglupad,” nagtaho ang Flight Safety Digest.
Niadtong 1989 usa ka inabangan nga ayroplano nga paingon sa Alemanya gikan sa Norway kalit nga mitiurok gikan sa gihabogon sa paglupad nga 6,600 metros. Ang seksiyon sa ikog nabitas, nga nagpahinabo sa pagtiurok sa ayroplano nga kusog kaayo nga sa ingon natangtang ang duha ka pako. Namatay ang tanang 55 ka tawong sakay. Human sa tulo ka tuig nga imbestigasyon, ang mga eksperto sa abyasyon sa Norway nakadiskobre nga ang pagkahagsa gipahinabo sa depektosong mga perno, nga gitawag ug mga locking pin, nga nagsumpay sa seksiyon sa ikog sa lawas sa ayroplano. Nakita sa pagtuki sa puwersa sa pagkahagsa nga ang mga perno nga hinimo sa metal dili lig-on nga klase sa pagsagubang sa nagamakmak nga puwersa sa paglupad. Ang depektosong mga locking pin maoy mini—usa ka pulong nga pamilyar kaayo sa mga eksperto sa kahilwasan sa abyasyon bisan diin, tungod kay ang paghimog-mini maoy usa ka nagkadakong problema nga nagapameligro sa mga kinabuhi sa mga tripulante ug sa mga pasahero sa ayroplano.
Sa dihang giinterbiyo sa nasodnong telebisyon ang inspektor heneral sa Departamento sa Transportasyon sa Tinipong Bansa, siya miingon: “Ang tanang kompaniya sa ayroplano nakadawat ug mini nga mga piyesa. Aduna sila niining tanan. Silang tanan adunay problema.” Ang industriya miadmiter, siya midugang, “nga sila tingali may gibanabanang duha o tulo ka bilyong dolyar nga kantidad nga dili magamit nga mga piyesang naimbentaryo.”
Sa mao gihapon nga interbiyo, usa ka magtatambag sa kahilwasan sa abyasyon, nga nagpahibalo sa FBI bahin sa nagkalainlaing tagong mga operasyon nga naglangkit sa mini nga mga piyesa, nagpasidaan nga ang mini nga mga piyesa naghawas ug tinuod nga kapeligrohan. “Nagtuo ako nga atong makita ang usa ka dakong aksidente sa ayroplano sa haduol nga umaabot agig resulta niini,” matod pa niya.
Ang adlaw sa panudya haduol na alang niadtong kansang kahakog nagtugot kanila sa pagbutang pag-una sa ilang kaugalingong hakog nga tinguha kay sa mga kinabuhi sa uban. Ang dinasig nga Pulong sa Diyos tinong nag-ingon nga ang mga tawong hakog dili makapanunod sa Gingharian sa Diyos.—1 Corinto 6:9.
[Mga hulagway sa panid 9]
Ang mga sinina, alahas, mga dibuho, mga tambal, mga piyesa sa ayroplano—bisan unsang mahal nga butang maoy mapuslanon alang sa tighimog-mini
[Hulagway sa panid 10]
Ang mini nga mga piyesa sa makina, ubos ug kalidad nga mga perno, mga instrumento sa cockpit, mga computer component, ug ubang mini nga mga piyesa nakapahinabog pagkahagsa nga nakamatayg mga kinabuhi