Kristohanong Gugma sa Panahon sa mga Katalagman sa Mexico
USA ka mantalaan sa Mexico City mitaho: “Sa miaging 20 ka adlaw, ang kinaiyanhong mga hitabo—mga bagyo ug linog—mihapak sa mga baybayon sa Mexico nga misangpot ug kamatayon ug kalaglagan.”—El Financiero, Oktubre 17, 1995.
Ang mga estado sa Mexico sa Campeche, Quintana Roo, ug Tabasco grabeng gimakmak sa Bagyong Opal sa sayong Oktubre. Halos 200 ang nangamatay, kapin sa 150 ang nangasamdan, 500,000 ang nag-antos sa pirdisyon, ug libolibong mga balay ang nangadaot o bug-os nga nalumpag.
Sa panahong nadungog sa sangang buhatan sa mga Saksi ni Jehova sa Mexico ang kadaot, may usa nga gipadala sa pagsusi kon unsay lakat sa mga Saksi sa naapektohang lugar. Nahibaloan nga kapin sa 2,500 kanila ang napugos sa pagbiya sa ilang mga balay. Kini sila malulotong gidawat diha sa mga balay sa kaubang mga Saksi.
Giorganisar ang mga sentro sa pagtabang. Ang pagkaon, bisti, ug salapi gitagana niadtong nagkinahanglan. Human mihubas ang mga tubig sa baha, gisugdan sa mga Saksi ang pagtukod pag-usab sa mga balay sa ilang Kristohanong mga igsoon.
Sa Oktubre 9, usa ka kusog nga linog nga misukod ug 7.6 sa sukdanang Richter mipayhag sa mga estado sa Mexico sa Colima ug Jalisco. Walo ka Kingdom Hall sa mga Saksi ni Jehova ang grabeng nangadaot. Napulog duha sa ilang mga balay nangahugno, ug duolan sa 65 ang nangadaot. Sa makausa pa, usa ka komite sa pagtabang ang giorganisar, ug gitagana ang tabang.
Dayon, sa Oktubre 20, mihapak ang laing linog, nga nag-uyog sa estado sa Chiapas. Ang mga balay sa dugang 88 ka Saksi nangahugno, ug 38 ang nadaot pag-ayo. Duha ka Kingdom Hall bug-os nga napayhag, ug upat pa ang grabeng nangaguba. Halos sa samang panahon, ang mga baha gumikan sa Bagyong Roxanne migun-ob sa mga balay sa mga 80 ka Saksi sa estado sa Veracruz. Upat ka balay ang bug-os nga nalumpag. Ang hinabang nga salapi nga natigom sa mga Saksi ni Jehova gihatag usab dihadiha alang niini nga mga biktima.
Bisag nasamdan ug nabalian ug mga bukog ang pipila sa mga Saksi, walay usa ang namatay niining kinaiyanhong mga katalagman. Tanantanan, mga 24 ka toniladang pagkaon ug 4 ka toniladang bisti ang gipadala alang niadtong nanginahanglan. Daghang nakakita mipahayag ug pagdayeg sa buhat sa pagtabang. Usa ka babaye sa Colima miingon: “Nadungog ko lamang nga ang mga Saksi ni Jehova nahiusa pag-ayo, apan karon nakita ko kana sa ako mismong mga mata.”
Sa masubsob ang mga tawo mikomento bahin sa mga Saksi ug sa ilang buhat sa pagtabang: “Kini sila maoy tinuod gayod nga mga igsoon.” “Sila mas organisado kaayong grupo.” Ang uban nadunggan gani nga miingon: “Kon ang tanang grupo sa pagtabang nga miabot aron sa pagtabang milihok sama sa mga Saksi ni Jehova, ang tibuok lungsod mahinlo na.”
Karon kapin sa 440,000 ka Saksi ang nakigbahin sa maayong balita sa Gingharian sa Diyos uban sa ilang isigka-Mexicano. Ang gugma nga ilang gipakita sa usag usa sa panahon niining dili pa dugayng kinaiyanhong mga katalagman naghatag ug usa ka maayo kaayong pamatuod.—Juan 13:34, 35.