Gikan sa Among mga Magbabasa
Kalim-an ka Tuig Kanhi Bag-o pa nakong nahuman pagbasa ang seryeng “1945-1995—Unsa bay Atong Nakat-onan?” (Septiyembre 8, 1995) Nakadayeg ako sa paagi nga inyong gilakip kadtong tanang detalye sa kasaysayan sa ingon ka limitadong luna. Daghan ako ug nakat-onan; mas maayo pa kadto kay sa pagbasa ug libro sa kasaysayan.
M. V., Pilipinas
Pag-ampo Ako walay trabaho ug ako mobalhinay ug pinuy-anan. Nabalaka kaayo ako—hangtod nga nabasa nako ang artikulong “Ang Hunahuna sa Bibliya: Imong Bahin Diha sa Imong mga Pag-ampo.” (Septiyembre 8, 1995) Salamat sa pagpatik niining artikuloha. Buhaton nako ang akong maarangan sa pagpamatuod nga ako mahinamon nga dunggon ang akong mga pag-ampo pinaagi sa pagkinabuhi nga kaharmoniya niana.
D. C., Tinipong Bansa
Pagsugal Bag-o pa lang akong nag-ampo alang sa usa ka artikulo bahin sa sugal, sanglit ang akong mga paryente nanginahanglan kaayog tabang niining bahina. Sila hapit nang mabangkarota. Nanghinaot ako nga ang seryeng “Sugal—Usa ka Nagdakong Pagkagiyanon” (Septiyembre 22, 1995) makatabang kanila. Sila nag-antos pag-ayo tungod sa ilang pagkagiyan. Kaniadto magdula kami ug poker ingong pamilya sulod sa 6 hangtod 12 ka oras sa usa ka panahon! Nalipay ako pag-ayo nga nabatonan na nako karon si Jehova sa akong kinabuhi.
L. D., Tinipong Bansa
Inyong gibatbat ang akong 20 ka tuig nga kaminyoon ngadto sa usa ka bana nga nagiyan sa sugal. Nakadawat ako ug daghang pagdasig gikan sa mga magasin sa nangagi, apan niining panahona akong nadawat ang usa ka butang nga akong gipangandoy sulod sa 20 ka tuig!
F. E., Hapon
Pagdepensa sa Kaugalingon Giapresyar nako pag-ayo ang artikulong “Mga Batan-on Nangutana . . . Angay ba Akong Mokat-on sa Pagdepensa sa Kaugalingon?” (Septiyembre 22, 1995) Dinhi sa Ukraine makadawat lamang kami ug usa ka isyu sa Pagmata! matag bulan, ug ang “Mga Batan-on Nangutana . . .” wala maapil. Sanglit makabasa ako ug Iningles, nabasa nako ang artikulo. Nakatabang kanako ang pagkahibalo sa panglantaw sa Diyos.
V. L., Ukraine
Ako 12 anyos, ug buot ko kamong pasalamatan tungod sa mga artikulo nga inyong gipatik. Akong nakaplagan ang artikulo bahin sa pagdepensa sa kaugalingon nga ilabinang makatabang. Nakatabang kini kanako sa pagsabot kon sa unsang paagi mogawi sa dihang ang akong mga kauban sa eskuylahan molutos kanako.
D. C., Italya
Aprikanhong Tunghaan Ako maoy usa ka Akan nga nakapahimulos gikan sa tradisyonal nga Aprikanhong tunghaan ug sa mga tunghaan sa Kasadpan, ug ako nahimuot sa inyong artikulong “Ang Aprikanhong Tunghaan—Unsay Gitudlo Niini?” (Septiyembre 22, 1995) Natandog ako sa pagtahod ug dignidad nga inyong gihatag sa Aprikanhong tunghaan. Anaa kadtong naghunahuna nga ang inyong relihiyon nagtamay sa Aprikanhong tradisyon. Kining artikuloha nagpatin-aw nga dili kini maoy kahimtang.
S. N., Ghana
Sugilanon sa Kinabuhi Daghang salamat sa pagpatik sa sugilanon ni Karen Malone nga, “Akong Dugay, Lisod nga Pakigbisog sa Pagpangitag Matuod nga Pagtuo.” (Septiyembre 22, 1995) Kini nagpalugmaw sa mga luha sa akong mga mata.
J. S., Republika sa Czech
Ako ang kinamagulangang anak sa akong pamilya. Kanhi mibati akong masulob-on tungod kay dili nako mabatonan ang daghang butang nga buot nako. Usahay halos wala kamiy igong salapi nga ipalit ug pagkaon. Apan tungod kang Karen, karon akong naamgohan nga ang atong pag-alagad sa Diyos mas labawng hinungdanon kay sa materyal nga mga butang.
T. T., Gresya
Nabasa nako ang artikulo ug kaupat ka beses hangtod karon, ug matag panahon ako nakahilak. Masabtan nako ang iyang determinasyon sa pag-alagad kang Jehova atubangan sa pagsupak sa pamilya ug kalisdanan. Sa dili madugay, ako nanghinaot nga makasugod sa pag-alagad ingong regular payunir, usa ka bug-os-panahong magwawali, ug kining artikuloha nakapalig-on gayod kanako.
D. F., Australia