Gikan sa Among mga Magbabasa

Kinalabwang Sinati-sa-Arte Salamat sa seryal nga “Pagpangita sa Kinalabwang Sinati-sa-Arte.” (Nobyembre 8, 1995) Ingong sinati-sa-arte mismo, gipabilhan ko gayod ang mga artikulo. Ang daghang nagkalainlaing kalalangan sa Diyos, ang balaknong arte sa Salmo, ug ubang maanindot nga pagkasulat nga mga teksto sa Bibliya tanan nagpakita nga wala lamang himoa ni Jehova ang arte kondili nalipay usab niana!

B. R., Tinipong Bansa

Kay nalangkit sa arte sa kapin sa 30 ka tuig, buot ko nga dayegon kamong tanan nga may bahin sa pag-andam niining maong maanindot kaayong artikulo! Nuybe ka pahina kadto sa ekselenteng mga lohika ug pangatarongan bahin sa atong dakong Diyos, si Jehova, ug sa iyang dinamikong mga katakos sa paglalang.

P. M., Tinipong Bansa

Mga Mormon Naghinamhinam ako sa pagbasa sa artikulong “Ang Mormon nga Iglesya​—Usa ka Kapasig-ulian sa Tanang Butang?” (Nobyembre 8, 1995) Gipadako ako sa pamilyang Mormon ug nabawtismohan ug naordinahan isip pari sa Mormon una pa nahimong usa sa mga Saksi ni Jehova. Apan, usa ka payahag ang nakahatag ug linaing kaikag kanako. Matod ninyo nga ang Mormon nga “bersiyon sa sala sa unang magtiayon naglangkit sa pagpakigsekso ug pagpanganak.” Ingon sa akong nahinumdoman, kami gitudloan nga si Adan ug Eva nakasala pinaagig pagkaon sa literal nga bunga.

D. A., Tinipong Bansa

Gikasubo namo nga kining pahayaga nakahatag ug pipila ka kalibog. Wala namo ipasabot nga ang mga Mormon nagtuo nga ang sala mismo mao ang seksuwal nga relasyon, bisan pa nga kini maoy makuhang impresyon gikan sa asoy sa “Book of Mormon.” (2 Nephi 2:​22, 23, 25) Hinunoa, kami nag-ingon nga ang sala “naglangkit” sa sekso. Sa unsang paagi? Sa pagkaagi nga, sumala sa teolohiya sa Mormon, kini nagbukas sa dalan alang sa tawo sa pagpanganak. Sumala sa librong “Mormon Doctrine,” ni Bruce R. McConkie, una pa sa iyang sala, si Adan “dili unta makabatog mga anak. . . . Sumala sa gimbut-an daan nga laraw, si Adan kinahanglang makasala . . . Kay mamatay na man siya karon makabaton nag mga anak.” Sa pagtandi, ang Bibliya wala magtudlo nga si Adan kinahanglang makasala aron makapatunghag mga anak. (Genesis 1:28) Ni nag-ingon kini nga ang ilang pagkasala maoy tungod sa gimbut-an daan nga laraw sa Diyos. Hinunoa, kini nag-ingon nga kadto maoy tungod sa ilang kaugalingong tinguha nga magkinaugalingon. (Ecclesiastes 7:29) Busa bisag gitahod namo ang mga katungod sa mga Mormon sa pagtuo sumala sa ilang gusto, kining butanga nag-ilustrar nga ang mga pagtulon-an sa “The Book of Mormon” dili gayod mosibo sa Bibliya.​—ED.

Ingong tawo nga wala gayoy kasayoran kon unsay ipakigsulti sa mga Mormon, ikaingon ko nga ako daghan nag nahibaloan kanila karon, salamat niining artikuloha. Sa unsang paagi ikaingon sa mga Mormon nga sila nagtuo nga ang Bibliya ug ang The Book of Mormon maoy gikan sa Diyos apan wala mahibalo nga kini nagsumpakiay sa usag usa?

J. M., Tinipong Bansa

Pornograpiya Diha sa Kompiyuter Buot ko nga magpasalamat kaninyo sa usa ka ulohan sa “Pagpaniid sa Kalibotan” bahin sa “Pornograpiya Diha sa Kompiyuter Matan-aw sa Kabataan.” (Nobyembre 8, 1995) Nabasa ko kini, ug ako nakurat! Gipakita gayod niini kon unsa ka peligroso kining mga programaha ug kon sa unsang paagi dali kining matan-aw sa mga bata. Kining artikuloha motabang sa mga Kristohanon nga timbangtimbangon ang positibo ug ang negatibong mga bahin nga naglangkit sa maong teknolohiya sa kompiyuter.

D. P., Tinipong Bansa

Sakit nga Dala-sa-Pagkaon Nalingaw ako sa inyong artikulong “Ampingi ang Imong Kaugalingon Batok sa Sakit nga Dala-sa-Pagkaon.” (Nobyembre 22, 1995) Maestro kosinero ako, ug buot ko nga mokomento. Kon ang usa gustong mokaon ug malasadong pagkaluto nga karne, kini imposible tingali kon siya nabalaka sa sakit nga dala-sa-pagkaon. Tinuod, ang paglutog karne sa init kaayo nga temperatura magpauga sa karne ug lisod nga hilison kini. Ang maayong paagi sa pagluto ug maayo sa karne ug magpabilin ang duga niana mao ang pagsabaw o pagluto niini nga may diyutayng manteka diha sa tinaklobang dabahan.

J. P. K., Tinipong Bansa

Salamat sa impormasyon bahin sa pagluto.​—ED.