Nagatukaw ba ang Ortodoksong Klero?

SINULAT SA KORESPONSAL SA PAGMATA! SA GRESYA

“SA DIHANG si Jesus misulod sa templo . . . ug nakakita sa ‘taboan,’ siya nasuko pag-ayo ug siya misinggit: ‘Hunonga ninyo ang paghimo sa balay sa akong Amahan nga balay sa mga tinda!’ Kon molawig siya karong mga adlawa paingon sa isla sa Patmos, . . . siya mopahayag ug grabe pang pagpamadlong. Apan ambot kon aduna bay mamati kaniya.” Kanay gimulo sa usa ka manunulat nga maoy nagtaho bahin sa gitawag nga “Paghiusa sa Kristohanon nga panagkatigom nga labing bililhon” ug “usa sa talagsaong mga yugto sa modernong Kristiyanidad.”

Ang ekumenikal nga patriarka sa Constantinople, si Bartholomew I, giisip nga mao ang simbolikong ulo sa Ortodoksong Iglesya sa tibuok kalibotan, nagproklamar sa tuig 1995 nga “Tuig sa Apokalipsis.”a Gikan sa Septiyembre 23 hangtod 27, 1995, ang kasadyaan midangat sa tayuktok samtang ang tag-as-katungdanang mga klerigo sa kadaghanan sa Ortodoksong mga patriarkiya nagtigom sa isla sa Patmos. Ang mga hawas sa Iglesya Romana Katolika, Iglesya Anglikana, ug lainlaing Protestanteng mga denominasyon presente usab. Ang kinatas-ang politikanhon ug militaryong mga awtoridad sa Gresya miatender sa mga okasyon, duyog sa langyawng opisyales, mga politiko, iladong mga negosyante, ug ubang imbitadong mga bisita gikan sa tibuok kalibotan.

Ang mga estudyante sa basahong Pinadayag mahinumdom sa dinaliang mga pahinumdom nga gipadayag diha ni Jesu-Kristo: “Tan-awa! Ako moabot ingon sa usa ka kawatan. Malipayon ang usa nga pabiling nagatukaw.” (Pinadayag 16:15) Tungod niini ug sa namantala kaayong relihiyosong saulog nga kabahin sa Pinadayag, kita matandog sa pagsukna: Nagatukaw ba ang Kakristiyanohan? Nagapadayon ba sila sa pagbantay, nga maikagong nagapaabot sa pag-anhi ni Jesu-Kristo ingong naentronong Hari? Ang mao bang kasadyaan nasentro sa tema sa Bibliya, nga midangat sa tayuktok niini sa Pinadayag​—ang pagbalaan sa ngalan ni Jehova ug pagbayaw sa iyang pagkasoberano pinaagi sa Gingharian ubos ni Kristo? Atong hisgotan ang pipila ka kamatuoran.

Bahin Niining Kalibotana?

Alang sa daghang maniniid ang samok nga panagtipon sa relihiyosong mga lider, mga politiko, ug mga negosyante panahon sa kasadyaan may pagkasalawayon. Gibati sa pipila nga ang tanang pundok nga nalangkit misulay pagpahimulos sa kahimtang alang sa ilang kaugalingong kaayohan. Ang mga klerigo nagpadako sa ilang impluwensiya pinaagi sa pagtupad sa iladong mga politiko, samtang ang mga politiko misulay pagpaarang-arang sa ilang kaugalingong dagway pinaagi sa pagpahimulos sa relihiyosong pagbati sa publiko. Ang tigpamaba sa Balaang Konsilyo sa Iglesya sa Gresya mipahayag gani: “Ang Pinadayag nakabaton usab ug politikanhong kahulogan . . . Kini usa ka dula nga napasundayag sa yuta.”​—Italiko amoa.

Pagkahaom gayod kini sa kahubitan nga makita sa Pinadayag 17:1, 2, diin ang simbolikong “dakong bigaon,” ang tibuok-kalibotang imperyo sa bakak nga relihiyon nga niana ang Kakristiyanohan usa ka iladong bahin, gihulagway ingong nagbuhat ug espirituwal nga ‘pagpakighilawas’ uban sa “mga hari sa yuta”! Inay magpabiling mahinlo sa espirituwal ug nagbantay, ang Ortodoksong Iglesya, sama sa ubang bahin sa Kakristiyanohan, naghaylo sa politikanhong mga magmamando alang sa di-balaan nga pakighigala kaniya, nga naghulhog sa relihiyosong paglutos, ilabina batok sa mga Saksi ni Jehova.

Wala Mahiusa

Mamatikdan nga duha ka Ortodoksong patriarka ang wala sa mga saulog. Ngano man? Ingong usa ka pagprotesta, ang patriarka nga si Alexios II sa Moscow wala motambong tungod kay ang patriarkiya sa Constantinople miuyon sa usa ka petisyon nga gihimo sa arsdiosesis sa Estonia ug Ukraine nga magpailalom sa pagdumala sa Constantinople inay sa Moscow. Sumala sa mga taho, “kini mao ang labing bug-at nga suliran nga sukad mitungha tali sa [patriarkiya sa Constantinople] ug sa labi pang lig-on nga Rusong Ortodoksong Iglesya,” nga mibahad sa “di-matagnang mga sangpotanan alang sa panaghiusa ug awtoridad sa Ortodoksiya.”

Dugang pa, ang patriarka sa Jerusalem miboykot sa konsilyo. Ngano man? Gikataho nga tungod kay siya nasuko mahitungod sa silot nga gibaod kaniya tulo ka tuig nga miagi sa patriarkiya sa Constantinople tungod sa pagsulay paggahom sa Ortodoksong Iglesya sa Australia.

Sa sinugdan, imbitahon unta si Papa Juan Paulo II, apan kadto nausob sa kataposang gutlo tungod sa dakong pagsupak nga gipatungha sa konserbatibong mga elemento sulod sa Ortodoksong Iglesya. Sa Mayo 1995 usa ka inilang Ortodoksong klerigo sa Atenas nagtawag sa papa nga “usa ka kriminal sa gubat.” Dayon gianunsiyo nga ubos sa maong mga sirkumstansiya “ang papa . . . dili makaambit sa saulog sa Patmos.”

Nakadugang niining makapasubong kahimtang mao ang kabalighoan nga panahon sa maong mga saulog, mga 1,500 ka kilometros lamang sa amihanan-kasadpan sa Patmos, ang Ortodokso ug Romano Katolikong “mga Kristohanon” nagpinatyanay sa usag usa sa Bosnia ug Herzegovina!

Tin-aw, ang nagduka sa espirituwal nga nag-angkong mga Kristohanon nagtugot nga mabahin sila sa mga sektasekta! Nga nagmulo sa maong kawalay-panaghiusa, si Iakovos, Ortodoksong arsobispo sa Amerika del Norte ug Sur, mipahayag sa usa ka interbiyo: “Napakyas kita sa atong paningkamot nga makitang nahiusa ang mga iglesya aron sa pag-alagad sa tawo ug dili sa gamhanan niining kalibotana. . . . Ang mga tawo gipul-an na sa . . . mga pagbendisyon sa patriarka.”

“Usa ka ‘Pinadayag’ sa Kaluho”

Ang ginganlan ug “talagsaong pasundayag sa bahandi” nailalom sa grabeng pagsusi. Usa ka taho sa mantalaan miingon: “Ang upat ka adlaw nga kasadyaan sa Patmos ngadtongadto nahimong usa ka ‘pinadayag’ sa kaluho. . . . Ang Byzantine nga kamadanihon milabaw sa mga kinutbanan sa eklesiastikanhong seremonyas, nga nagpasidaan nga mahimong gastosong pista ang usa ka ekumenikal nga okasyon.” Daghan ang nabalaka bahin sa kantidad sa salapi nga nagasto sa maong mga kasadyaan, ilabina sa panahon nga nameligro ang kaluwasan sa katawhan sa nait nga mga Balkan ug Silangang Uropa. Ang pipila ka banabana nagkalkulo sa gastos sa maong “way-ingon nga kasadyaan” sa halos $17 milyon (T.B.). Ang maluhong mga barko sa lulinghayaw nangabot sa pantalan sa Patmos aron papuy-an sa pipila sa datong mga bisita nga gidapit sa pagtambong sa panagkatigom. Sa kahiubos sa daghang permanenteng mga molupyo niini, ang isla nakaagom ug kataposang-gutlong pagpatahom aron makahatag ug mas maayong impresyon sa tag-as-ranggong mga bisita​—bisan pag kini walay ospital ug angayang eskuylahan.

Pagkahaom nga mapadapat ang mga pulong sa Pinadayag 18:2, 3, 7 sa maong kahimtang: “Ang nagapanaw nga mga magpapatigayon sa yuta nadato gumikan sa walay-kukaulaw nga kaluho [sa Dakong Babilonya]. Sa sukod nga siya naghimaya sa iyang kaugalingon ug nagkinabuhi sa walay-kukaulaw nga kaluho, niana nga sukod hatagi siyag pagsakit ug pagbangutan”! Sa panahon nga ang kasagarang mga tawo nag-antos, ang Ortodoksong Iglesya, inay nga magtukaw aron itagana ang kahupayan ug espirituwal nga hinabang, napuliki sa pagpatuyang sa mga pista nga haw-ang sa espirituwal.

Paghambin ug Bakak nga mga Paglaom

May kalabotan sa maong saulog, nahitabo ang ubay-ubayng mga simposyum ug mga komperensiya. Gisugyot ang mga solusyon sa pagsulbad sa bug-at nga mga suliran nga ginaatubang sa katawhan. Usa ka resolusyon giluwatan nga naghangyog mga siyentipiko nga molihok dayon aron pagsulbad sa mga suliran sa katawhan. Ang Gingharian sa Diyos wala gani hisgoti bisan kas-a. Sa kasukwahi, ang basahong Pinadayag, nga nahiuyon sa ubang bahin sa Bibliya, nagpasiugda nga ang Gingharian sa Diyos diha sa mga kamot ni Jesu-Kristo mao ang bugtong solusyon sa tanang suliran sa katawhan.​—Pinadayag 11:15-18; 12:10; 21:1-5.

Dili katingad-ang ang Kakristiyanohan wala mag-isip nga ugdang sa binase-sa-Bibliya nga paglaom sa Gingharian. Nga nagpalanog sa kaylap nga tinamdan, usa sa mga monghe sa monasteryo sa Patmos prangkang miadmitir: “Wala namo isipa ang Pinadayag ingong usa ka awtoritatibong sinulat. Kini mao ang matang sa kasulatan nga wala basaha diha sa mga simbahan.” Sa susama, usa ka teologo mipahayag: “Peligroso ang paglangkit sa Pinadayag sa kasaysayan niining kalibotana sa diwa nga maorag kini sinulat nga nagbatbat nga detalyado kon unsay mahitabo. . . . Ang maong paglangkit maoy kawalay-alamag ug peligrosong pagbadbad.” Nahinanok kaayong pagkatulog sa espirituwal!

Wala Sila Magtukaw

Nan, tin-aw nga ang Kakristiyanohan wala magtukaw. Ang maong saulog, inay nga maghatag ug pagtagad sa Pulong sa Diyos ug sa iyang mga saad, maoy way-unod ug way-pulos nga relihiyosong “karnabal.” Ang kahimtang sa giingong Kristohanong mga iglesya maoy sama kaayo sa iya sa kongregasyon sa Laodicea, nga giingnan ni Jesus: “Ikaw nagaingon: ‘Ako dato ug nakabatog mga bahandi ug wala na manginahanglan ug bisan unsa pa,’ apan wala ikaw mahibalo nga ikaw alaot ug makaluluoy ug kabos ug buta ug hubo.”​—Pinadayag 3:17.

Makaiikag, usa ka dulot-sa-bukog nga tigpaluyo sa Ortodoksong Iglesya misulat sa usa ka mantalaan nga mireklamo nga “ang mga tawo lamang nga labing nakabenepisyo niini” nga saulog mao ang mga Saksi ni Jehova. Nganong kanay iyang hunahuna? Siya misaysay nga ang pinadayag kang Juan “adunay parehong doktrinal nga pasikaranan sa doktrinal nga baroganan sa mga Saksi ni Jehova.” Oo, tinuod nga ang mga Saksi makugihong nagapanlimbasog nga ‘magpadayon sa pagbantay’ pinaagi sa pagpabiling igmat bahin sa kalamposan sa katuyoan sa Diyos. Maikagon usab sila sa pagtabang sa tanang matinud-anon-ug-kasingkasing nga mga tawo nga ‘magpadayong magtukaw aron molampos sa pagbarog atubangan sa Anak sa tawo,’ si Jesu-Kristo.​—Mateo 24:42; Lucas 21:36.

[Footnote]

[Blurb sa panid 20]

Letrato: Garo Nalbandian

[Blurb sa panid 21]

“Talagsaong pasundayag sa bahandi” ug “way-ingon nga kasadyaan”

[Picture Credit Line sa panid 19]

“Ang mga tawo gipul-an na sa . . . mga pagbendisyon sa patriarka”