Pagkuha ug Letrato—Kon Unsaon Paghimo Niini nga Maayo

Pipila ka butang ang labi pang gipangga kay sa mga letrato sa minahal nga mga higala ug mga membro sa pamilya. Hinumdomi, ang dekalidad nga letrato labaw pa kay sa esnapsiyat lamang; usa kini ka larawan nga gituyo aron ihulagway ang kinauyokan mismo sa personalidad sa usa!

Ang suliran mao nga ang propesyonal nga mga letrato may pagkamahal​—nga dili maabot sa pipila kanato. Ug kon sulayan nimo mismo nga mokuha ug letrato, sa di-madugay makaplagan nimong labaw pa ang nalangkit kay sa pagpuntirya ug pagletrato lamang. Tungod kini kay ang maayong letrato sa nawong maglakip dili lamang sa magpaletrato apan usab sa kahayag, talan-awon sa luyo, kahimtang, posisyon, ekspresyon sa nawong, ug kolor.

Apan, kon aduna kay kamera ug buot kang makakat-on sa pipila ka pangunang mga teknik, makakuha kag maayong mga letrato. Sa unsang paagi? Sa pagtubag, mosukna kitag pipila ka pangutana sa usa ka propesyonal nga letratista nga aduna nay kapin sa napulo ka tuig nga kasinatian niining trabahoa.

• Una sa tanan, unsa may sekreto aron mapapahiyom ang usa samtang nagpaletrato? Tinoa nga ang imong letratohan anaa sa maayong buot! Ingnon ta, pananglitan, nga gusto kang mokuha ug letrato sa usa ka batang babaye. Kon gikapoy siya o gigutom, lisod siyang letratohan. Gawas pa, ang kakapoy magpahinabog tensiyon sa iyang nawong ug mga mata, nga makadaot sa letrato. Busa awhaga siyang motagpilaw ug mag-esnak ug diyutay una pa sugdan ang pagpaletrato.

Makatabang usab ang pagpakiglabot sa letratohan. Magmadasigon ug magmangayaon. Pakig-estorya aron marelaks siya, apan ayaw sulayi nga pakataw-on siya pag-ayo. Makapahiyong kini sa mga mata ug makapapula sa nawong. Sulayi ang pagletrato sa nagkadaiyang ekspresyon sa nawong. Kon mas daghang letrato ang imong makuha, mas maayo ang kahigayonan nga makakuha kag hulagway nga maghubit pag-ayo nianang tawhana.

• Komosta ang bahin sa besti ug pamostura? Sa ginurupong pagpaletrato, ang harmonya sa kolor tilinguhaon. Kon, pananglitan, magletrato kag pamilya, isugyot nga magsul-ob silag magkabagay nga mga kolor. O kaha pasul-oba silag parehas nga kolor. Apan, hinumdomi nga alang sa tambok nga mga tawo labing maayong tan-awon ang dulom nga kolor ug ang niwang nga mga tawo sa hayag nga mga kolor.

Angay usab nimong tagdon ang detalye: Hapsay ba ang sinina, nga may diyutay lang ug mga kusnot? Tarong ba ang korbata? Hapsay ba ang buhok? Dili tingali nimo makita ang nagpagpag nga buhok, apan makita kana sa kamera! Kon ang letratohan babaye, wala ba magkampat ang iyang mek-ap?

• Komosta ang mga tawo nga nag-antipara? Tungod sa kasulaw, mahimo kining problema. Una, tan-awa pinaagi sa imong viewfinder kon aduna bay wala kinahanglanang kasulaw. Kon aduna, palingia ug hinayhinay ang letratohan hangtod nga moirog gikan sa sentro sa mata ang kasulaw o mawala kini. Usahay, makatabang kon ipaubos lang ang suwang sa magpaletrato​—apan bantayi nga dili magdoble ang suwang!

• Hinungdanon ba kon unsay makita sa luyo? Hinungdanon gayod! Ang gubot nga talan-awon sa luyo nga nagkalamukat nga mga linya sa koryente, kadalanan, o mga sakyanan makadaot lamang sa imong hulagway. Busa pangitag usa ka talan-awon sa luyo nga lagmit makapausbaw o makadugang sa interes sa imong letratohan, sama sa usa ka kahoy, namulak nga tanom, kahoy nga koral, o bisan ang kilid sa karaang kamalig.

• Komosta kon mokuha kag letrato sa sulod? Hayan sulayan nimong palingkoron ang letratohan sa lingkoranan o sa sopa atubangan sa hayag-ug-kolor nga bungbong o atubangan sa tanom sa sulod. Ilabinang makapainteres ang pagletrato sa usa nga nagatrabaho o aktibo sa iyang paboritong dula o kalihokan, nga may trabahoanang lamesa, talad, o mga materyal sa pagtahi nga anaa sa likod.

• Komosta kon dili ka makakaplag ug makapadaning talan-awon sa luyo? Sulayi nga mahanap ang talan-awon sa luyo. Labing maayo kini sa pagpangletrato sa gawas diin ikapahiluna nimo ang magpaletrato nga layo gikan sa talan-awon sa luyo. Mahimo nimo kini kon imong ipasibo ang f-stop, o ang gidak-on sa abli sa lente. Ang ubos nga numero sa f-stop, sama sa f5.6, makapatin-aw sa kuha sa imong letratohan apan makapahanap sa talan-awon sa luyo.​—Tan-awa ang letrato 1.

• Aduna bay ikasugyot bahin sa komposisyon? Una sa tanan, makatabang ang pagpatong sa imong kamera sa usa ka traypad; dayon makatumong ka ug dugang sa imong pagtagad sa komposisyon. Kasagaran, ang mga hulagway mahimong bug-os-lawas ang gidak-on, tres-kuwartos ang gitas-on (gikan sa hawak pataas), o close-up (ulo ug mga abaga o ulo lamang). (Tan-awa ang letrato 2.) Ang bisan unsang lente tali sa 105 ug 150 milimetros maoy haom kaayo sa pagkuha ug letrato. Kon dili nimo mapasibo o mausab ang lente sa imong kamera, sulayi ang pagpaduol sa imong letratohan o atras hangtod nga makuha na nimo ang gusto nimong hulagway. Lain pay ato, mas maayo kanunay nga isentro ang pagkuha ug letrato aron adunay igong gilay-on ibabaw sa ulo, palibot sa mga kiliran, ug ubos sa tiil. Niining paagiha malikayan nimong maputol ang ulo, ang mga tiil, o ang lawas kon imong padak-an ang letrato. Abi nimo, kon labi pa nimong padak-an, mahimong mas dako pa ang mawala sa hulagway, depende sa gidak-on sa letrato.

Ang usa ka mapuslanong giya mao ang gitawag ug balaod sa ikatersiya. Naglakip kini sa pagpahiluna sa nawong o mata sa imong letratohan nga un-tersiya ang gilay-on gikan sa ibabaw, ubos, o kilid sa hulagway. (Tan-awa ang letrato 3.) Bisan pa niana, usahay mas mosaler nga isentro ang mata sa hulagway.

• Komosta na man ang pagpahimutang sa letratohan? Paatubanga sa kamera ang imong letratohan sa relaks nga posisyon, maglingkod kaha, magtindog, o magsandig, apan patakilira ug gamay. Kon daw lingin kaayo ang nawong, ipaliso ug gamay ang ulo o lawas sa modelo aron nga katunga lamang sa nawong ang mahayagan. Ang katunga nga nalandongan angayng mao ang labing duol sa kamera. Makapagamay kini sa nawong nga tan-awon. Sa laing bahin, kon buot nimong tan-awong dako ang nawong, ipaliso sa tawo ang iyang ulo o lawas hangtod nga ang kahayag modan-ag sa tibuok nga nawong.

Matikdi ilabina ang mga kamot. Angay kining relaks ug anaa sa posisyon nga natural sa imong letratohan, sama sa paghinukbo sa suwang o sa aping. Kon magtindog ang tawo, likayi ang kasagaran na kaayong sayop sa pagpalaylay sa mga kamot nga nagtudlo sa ubos. Mas maayo pa nga ang kamot maggunit ug butang o napahiluna sa natural nga posisyon.

• Aduna bay ikasugyot sa pagletrato ug magtiayon? Sulayi ang pagpaharag ug gamay sa ilang mga ulo tumong sa usag usa. Kasagarang labing maayo ang paglikay nga magparehas ang ilang gitas-on. Masulayan nimong ipahiluna sila aron ang mga mata sa usa motupong sa ilong sa usa.​—Tan-awa ang letrato 4.

• Hisgotan nato ang bahin sa kahayag. Unsa ang labing maayong panahon sa adlaw sa pagletrato sa gawas? Sa ulahing bahin sa kahaponon. Ang hangin kasagarang hinay, ug ang kolor sa kahayag mas nindot na. Sulayi ang pagpaposisyon sa imong higala aron ang kahayag sa adlaw modan-ag sa pikas kilid sa nawong, nga usa ka trianggulo lamang sa kahayag ang makita sa kilid sa nawong nga nalandongan. Magpugong kini sa tawo nga mohiyong. Kon buot kang moletrato nga pinatakilid ang kuha sa nawong, iirog ang posisyon sa imong kamera tumong sa nalandongang kilid sa nawong. Lain pay ato, tinoa nga nalandongan ang imong kamera gikan sa kahayag sa adlaw.

• Komosta na man kon sobra kaayo ang kahayag? Sulayi nga ipahiluna ang imong higala nga magtalikod sa adlaw.

• Dili ba makapangitngit kana sa iyang nawong? Oo, apan magamit nimo ang imong flash aron madan-agan ang nalandongang mga dapit. Ang pipila ka kamera mohimo niining awtomatiko. Ang laing solusyon mao ang pagkuhag higala nga moabay ingon nga katabang. Makagunit siya ug usa ka reflector o dakong karton nga puti ug pabandahon ang diyutayng kahayag sa adlaw ngadto sa nawong sa nagpaletrato.

• Komosta na man ang pagpahayag sa sulod? Magamit nimo ang natural nga kahayag pinaagig pagpahiluna sa imong letratohan duol sa bentana. Ang sihag nga kortina makapakanap na sa kahayag. Kon gikinahanglan, magamit nimo ang flash o reflector nga karton aron padan-agan ang mga bahin sa nawong nga daw ngitngit kaayo.​—Tan-awa ang letrato 5.

• Komosta na man kon dili mabatonan ang igoigong kahayag? Sa maong mga kahimtang imong magamit ang imong flash. Sulayi ang pagpahiluna sa imong letratohan sa dapit nga adunay puting bungbong. Ipaharag ang imong flash aron ang kahayag mobanda sa kilid sa bungbong. Sa dihang maggikan sa kilid ang kahayag, mas makontrolar nimo kon unsa ka dako sa nawong ang mahayagan.

Tinuod, kinahanglang sulayan ang daghang paagi aron mabatonan ang maayong mga resulta. Apan ang pangunang mga prinsipyo sa pagpangletrato ug larawan yano lamang. Uban ang maampingong pagplano ug pagtagad sa detalye, makahimo ka, bisan sa labing yanong mga kamera, nga makapatunghag usa ka maayong letrato​—usa nga panggaon nimo ug sa imong mga minahal sa katuigang umaabot!