Ang Hunahuna sa Bibliya

Kansang Giya ang Imong Kasaligan?

“TANA!” matod sa amahan ngadto sa iyang singko-anyos nga anak lalaki. Gituy-od sa amahan ang iyang kamot, ug sa walay pag-ukon-ukon mikab-ot ang anak ug mikupot sa mga tudlo sa iyang amahan. Bisan asa paingon ang panaw, ang bata nagasalig sa giya sa iyang ginikanan ug mosunod uban ang pagsalig. Bisan unsa pay mahitabo, ang hugot nga pagkupot sa bata dili gayod mahiplos.

Sanglit nagkinabuhi kita niining mga adlawa sa ekonomikanhon, politikanhon, ug personal nga kawalay-kasegurohan, dili ba nimo dawaton ang usa ka nagagiyang kamot gikan sa usa ka tinubdan nga masaligan nimo sa bug-os? Ugaling, nagkinabuhi kita sa panahon sa dihang ang walay-prinsipyong mga tawo nagpahimulos sa mga walay-kasinatian. Busa, adunay lig-ong katarongan nga magmabinantayon kon kinsay atong saligan. Tingali nahigawad ka pag-ayo sa nangagi sa dihang ang usa ka tawo nga imong gisaligan alang sa giya nagpakyas kanimo.

Bisan pa niana, ang Bibliya nagdasig kanato sa pagsalig sa Diyos. “Kay ako, si Jehova nga imong Diyos, nagakupot sa imong tuong kamot, ang Usa nga nag-ingon kanimo, ‘Ayaw kahadlok. Ako mismo motabang kanimo,’” misulat si propetang Isaias. (Isaias 41:13) Ug si apostol Pedro mitambag: “Busa, ipaubos ang inyong kaugalingon ilalom sa gamhanang kamot sa Diyos, aron nga iya kamong bayawon sa takdang panahon; samtang inyong ginatugyan kaniya ang tanan ninyong mga kabalaka, kay siya aduna may kahangawa kaninyo.”​—1 Pedro 5:6, 7.

Sa gihapon, mangutana ka tingali, ‘Unsay akong katarongan nga mosalig man ako sa Diyos alang sa giya?’ Ang mosunod nga maayong mga katarongan makaplagan diha sa talaan sa karaang mga Israelinhon.

Ang Kamot sa Diyos Naggiya sa Iyang Katawhan

Ang sunodsunod nga mga hitabo nga misangko sa gabii sa Nisan 14, 1513 W.K.P., nagbungkag sa determinasyon sa madaogdaogong agalon nga si Paraon ug sa mga Ehiptohanon, mao nga ilang gipagawas ang katawhan sa Diyos, ang mga Israelinhon, gikan sa pagkaulipon. (Exodo 1:11-13; 12:29-32) Sa Nisan 15, ang naghugyaw nga nasod sa Israel mipaingon sa kamingawan sa ilang pagpadulong sa Yutang Saad. Ang labing laktod nga ruta maoy paingon sa amihanan sa Memphis, ubay sa baybayon sa Mediteranyo, duol sa yuta nga giokupar sa gikahadlokang mga Filistehanon, ug ngadto sa Yutang Saad. Apan, diha sa hunahuna sa Diyos ang laing ruta.​—Exodo 13:17, 18; Numeros 33:1-6.

Ang Diyos nagtagana ug makitang giya ngadto sa karaang nasod sa Israel, nga makita ingong usa ka haligi nga panganod panahon sa adlaw ug usa ka haligi nga kalayo panahon sa gabii. (Exodo 13:21, 22) Duyog niining dili-kinaiyanhong talagsaong hitabo, gigamit ni Jehova ingong iyang yutan-ong hawas ang matinumanong tawo nga si Moises. (Exodo 4:28-31) Busa, dihay dili-malalis nga pamatuod nga ang kamot sa Diyos naggiya sa mga Israelinhon.

Sa ilang ikaduhang kampo, sa Etham, “sa tumoy sa kamingawan,” si Jehova nagsugo kang Moises nga mobalik ug magkampo sa kabaybayonan sa Pulang Dagat, sa Pihahirot. (Exodo 13:20) Kining daw dili-ikapatin-awng lihok nagtukmod kang Paraon sa paghinapos nga ang mga Israelinhon “naglaaglaag nga nalibog diha sa yuta.” Kay nakabaton ug kaisog, nausab ang tinamdan ni Paraon. Determinadong uliponon pag-usab ang mga Israelinhon niadtong tungora, gitigom niya ang iyang kasundalohan ug misugod sa paggukod.​—Exodo 14:1-9.

Pinaagi sa pagdala sa nasod ngadto sa laing direksiyon, ngadto sa dayag nga ubos nga patag nga motultol ngadto sa Pulang Dagat, si Moises daw nagpahimutang sa mga Israelinhon nga napiit sa kabukiran sa isigkakiliran sa kampo sa Pihahirot, sa Pulang Dagat, ug sa nagkaduol nga kasundalohan ni Paraon. Morag ang mga Israelinhon nahimong sayon nga target sa daling pagkasakop o pagkalaglag.

Unsay epekto niini diha kanila? Mopasundayag ba sila ug pagsalig sa giya ni Jehova? Kon tan-awon, ang kahimtang walay paglaom. Busa, ang uban nangahadlok. Ang uban pa misugod sa pagbagulbol batok kang Moises. Ang uban andam na ganing molunga ug mobalik sa pagkaulipon sa Ehipto!​—Exodo 14:10-12.

Kupti Pag-ayo ang Kamot sa Diyos!

Niining kahimtanga ang mga Israelinhon kinahanglang magpasundayag ug sama-sa-bata nga pagsalig sa Labing Gamhanan. Nga wala mahibaloi sa nasod sa katibuk-an, si Jehova may maayong katarongan sa pagsugo kang Moises nga motabok sa Pulang Dagat didto sa Pihahirot. Pinaagi sa pagpasulod sa mga Israelinhon ngadto sa Yutang Saad habagatan sa yuta sa mga Filistehanon, si Jehova nagpakitag mahigugmaong kaalam. Human sa 215 ka tuig sa Ehipto, sa walay duhaduha ang mga Israelinhon dili pa andam nga makiggubat sa usa ka nasod sa bangis nga mga manggugubat. Busa, si Jehova mipili ug ruta aron malikayan ang maong panag-away.a​—Exodo 13:17, 18.

Ang pagluwas sa nasod ug ang kaparotan ni Paraon ug sa iyang kasundalohan didto sa Pulang Dagat nagtaganag kahibulongang pamatuod sa gahom sa pagluwas sa Diyos. Dugang pa, pagkamapasalamaton sa mga Israelinhon kinsa, bisan tuod wala makasabot sa katarongan sa paggiya sa Diyos kanila sa usa ka partikular nga paagi, wala mobuhi sa kamot sa Diyos! Sila lig-ong mikupot ug nakakita sa milagrosong pagbahin sa Pulang Dagat maingon man sa paglaglag sa ilang mga kaaway. Ang ilang pagsalig sa giya ni Jehova gigantihan.​—Exodo 14:19-31.

Sa makausa pa, konsiderahon nato ang pananglitan sa usa ka bata nga nagakupot sa kamot sa usa ka ginikanan. Sa dihang mabalaka ang usa ka bata, sa unsang paagi siya molihok? Inay mobuhi o molugak sa iyang pagkupot, ang bata mokupot pag-ayo sa kamot sa iyang ginikanan. Sa pagbuhat niana, iyang gipasundayag ang iyang dili-matarog nga pagsalig nga ang ginikanan motagana sa dili-mapakyas nga giya ug kusog panahon sa mga kalisdanan.

Sa susama, sa dihang makasinati kita ug kalisod sa atong kinabuhi, kinahanglang pahugtan nato ang atong pagkupot, nga labi pang mosalig sa giya sa Diyos! Ang iyang Pulong, ang Bibliya, mahimong atong nagagiyang kahayag. (Salmo 119:105) Dugang pa, hinumdomi nga duyog sa atong pagsalig mao ang pagpailob. Busa, hatagan natog panahon si Jehova sa pagsulbad sa mga suliran, bisan kon sa usa ka yugto sa panahon dili nato bug-os nga masabtan kon nganong naggiya siya kanato diha sa usa ka tinong dalan. Oo, makasalig kita sa giya sa Diyos.​—Exodo 15:2, 6; Deuteronomio 13:4; Isaias 41:13.

[Footnote]