Mga Batan-on Nangutana . . .

Isugid Ko ba ang Akong Sala?

“Naulaw kaayo ko, wala ako masayod kon unsay buhaton. Buot kong moduol sa akong mga ginikanan, apan gidaog ko sa kaulaw.”​—Lisa.a

MAO kanay gisulat sa usa ka nahasol nga dalaga. Nakighigugmaay siya sa usa ka dili-magtutuo sulod sa pipila ka tuig sa dihang usa ka adlaw, ilalom sa impluwensiya sa alkoholikong ilimnon, nakigsekso siya kaniya.

Ikasubo, ang maong mga butang mahitabo matag karon ug unya, bisan taliwala sa Kristohanong mga batan-on. Kon mas bata ug mas menos kita ug kasinatian, lagmit mas daghang sayop ang atong mahimo. Apan bisan tuod maoy usa ka butang ang paghimog gamay nga sayop, lahi gayod nga butang ang pagkalangkit sa seryosong sala, sama sa seksuwal nga imoralidad. (1 Corinto 6:​9, 10) Kon kana mahitabo, ang usa ka batan-on nagkinahanglan ug tabang. Ang suliran mao nga dili sayon ang pagsugid sa mga kasaypanan sa usa.

Usa ka Kristohanong babaye nalangkit sa una-kaminyoon nga pakigsekso. Siya nakahukom sa pagsugid niini ngadto sa mga ansiyano sa iyang kongregasyon, nga nagtino pa gani sa petsa nga himoon niya kana. Apan iyang gioktaba ang petsa. Sa ulahi, gioktaba na usab niya ang petsa. Sa wala madugay, usa ka tuig ang milabay!

“Walay Natago”

Kon ikaw nakahimog seryosong sala, angayng maamgohan nimo nga ang pagpakahilom dili-maalamong ideya. Sa usa ka bahin, ang kamatuoran kasagarang mabutyag ra gihapon. Sa bata pa, si Mark nakabuak ug seramikong dayandayan sa bungbong. “Gisulayan ko kadto pagpapilit ug maayo aron matibuok,” siya nahinumdom, “apan wala magdugay ang akong mga ginikanan nakamatikod sa mga liki.” Tinuod, dili ka na bata. Apan kadaghanang ginikanan kasagaran makamatikod kon adunay dili-maayong nahitabo sa ilang mga anak.

“Akong gisulayan pagtago ang akong mga suliran pinaagig pagpamakak,” miangkon ang 15-anyos nga si Ann, “apan gipagrabe ko hinuon ang mga butang.” Kasagaran kaayo, ang mga bakak mabutyag. Ug sa dihang madiskobrehan sa imong mga ginikanan nga namakak ka, lagmit nga masuko sila​—mas masuko kay sa dihang misugid ka pa unta kanila sa sinugdan.

Labi pang hinungdanon, ang Bibliya nag-ingon: “Walay natago nga dili mapadayag, ni bisan unsang maampingong gitakpan nga dili gayod mahibaloan ug dili gayod mapahikyad.” (Lucas 8:17) Si Jehova nasayod kon unsay atong nabuhat ug kon unsay atong ginabuhat. Dili ka makatago gikan kaniya maingon nga si Adan wala usab makatago. (Genesis 3:​8-11) Ngadtongadto, ang imong mga sala mahimong mayagyag usab ngadto sa uban.​—1 Timoteo 5:24.

Ang pagpakahilom makadaot kanimo sa laing mga paagi usab. Ang salmistang si David misulat: “Sa nagpakahilom ako nagkaut-ot ang akong mga bukog pinaagi sa akong pag-agulo sa tibuok adlaw. Kay sa adlaw ug gabii ang imong kamot nagpabug-at sa ibabaw nako.” (Salmo 32:​3, 4) Oo, ang kabug-at sa pagpakahilom mahimong makadaot sa imong emosyon. Ang kabalaka ug pagkasad-an, maingon man ang kahadlok nga mabutyag, makapaluya sa imong kasingkasing. Tingali mosugod ka sa pagpalayo sa imong mga higala ug pamilya. Lagmit bation nimo nga ikaw halayo na mismo sa Diyos! “Gisagubang ko ang nahasol nga konsensiya tungod sa pagpasubo kang Jehova,” misulat ang usa ka batan-ong ginganlag Andrew. “Kini nagpadayon sa paghasol kanako.”

Pagbutyag

Aduna bay paagi nga mahupayan niining emosyonal nga kahasol? Oo, aduna! Ang salmista miingon: “Sa kataposan gisugid ko kanimo ang akong sala, ug wala ko tagoi ang akong sala. . . . Ug ikaw mismo nagpasaylo sa kadaotan sa akong mga sala.” (Salmo 32:​5; itandi ang 1 Juan 1:9.) Sa susama si Andrew nakakaplag ug kahupayan diha sa pagsugid sa iyang sala. Siya nahinumdom: “Ako miduol kang Jehova ug kinasingkasing nga nag-ampo alang sa iyang kapasayloan.”

Mahimo nimo ang susama. Pag-ampo kang Jehova. Nasayod siya kon unsay imong nabuhat, apan mapainubsanong angkona kana kaniya diha sa pag-ampo. Pangayog pasaylo, nga dili magpanuko tungod kay gibati nimong daotan ka na kaayo nga dili na matabangan. Si Jesus namatay aron kita makapahimulos ug maayong baroganan atubangan sa Diyos bisan pa sa atong pagkadili-hingpit. (1 Juan 2:​1, 2) Makapangayo ka usab ug kusog aron makahimo sa gikinahanglang mga kausaban. Ang pagbasa sa Salmo 51 tingali sa linain makatabang kanimo sa pagduol sa Diyos.

Pagtug-an sa Imong mga Ginikanan

Ugaling, labaw pa ang gikinahanglan kay sa pagsugid lamang ngadto sa Diyos. Obligado ka usab nga motug-an sa imong mga ginikanan. Sila gisugo sa Diyos nga matutuon ka “diha sa disiplina ug mapasiboong pagdumala-sa-kaisipan ni Jehova.” (Efeso 6:4) Mahimo lamang nila kini kon nahibalo sila sa imong mga suliran. Sa makausa pa, ang pagtug-an sa imong mga ginikanan tingali dili sayon o dili makapahimuot. Apan human sila masuko sa sinugdan, lagmit makontrolar nila ang ilang mga pagbati. Mahimong malipay pa gani sila nga ikaw misalig kanila nga imong gibutyag ang imong suliran ngadto kanila. Ang sambingay ni Jesus bahin sa mausikong anak naghisgot bahin sa usa ka ulitawo nga nahulog ngadto sa seksuwal nga imoralidad. Apan sa dihang sa kataposan misugid siya, ang iyang amahan mahinangpong nag-abiabi kaniya! (Lucas 15:​11-24) Sa walay duhaduha ang imong mga ginikanan sa susama motabang kanimo. Total, gimahal ka gihapon nila.

Tinuod, mahadlok ka tingali nga masakitan ang imong mga ginikanan. Apan dili ang pagsugid sa sala ang makapasakit sa imong mga ginikanan; ang paghimo sa sala ang makapasakit! Ang pagsugid mao ang unang lakang ngadto sa paghupay sa maong kasakit. Si Ann, nga gihisgotan sa sinugdan, mitug-an sa iyang mga ginikanan ug sa ulahi mibatig dakong kahupayan.b

Apan ang laing babag sa pagsugid mao ang kaulaw. Ang matinumanong eskriba nga si Esdras wala makahimo mismo sa mga sala, apan sa dihang gisugid niya ang mga sala sa iyang kaubang mga Hudiyo, siya miingon: “Ako naulaw ug nanlipaghong nga moyahat sa akong nawong kanimo, Oh akong Diyos.” (Esdras 9:6) Sa pagkatinuod, angayan nga mobatig kaulaw kon ikaw nakabuhat ug sayop. Kana nagpakita nga ang imong konsensiya nagalihok pa. Ug ngadtongadto ang maong mga pagbati sa kaulaw mahanaw. Gipahayag kana ni Andrew niining paagiha: “Lisod kaayo ug makauulaw nga mosugid. Apan ang pagkasayod nga si Jehova madagayaong magapasaylo makahupay.”

Pagduol sa mga Ansiyano

Kon ikaw usa ka Kristohanon, ang suliran dili matapos sa pagtug-an sa imong mga ginikanan. Matod ni Andrew: “Ako nasayod nga kinahanglang isulti ko ang akong suliran sa mga ansiyano sa kongregasyon. Pagkamakapahupay ang pagkasayod nga sila anaa sa pagtabang kanako!” Oo, ang mga batan-on taliwala sa mga Saksi ni Jehova makahimo ug angayng moduol sa mga ansiyano sa kongregasyon aron matabangan ug madasig. Apan nganong dili mahimong moampo ka lang kang Jehova ug wala nay laing buhaton? Tungod kay si Jehova nagtugyan sa mga ansiyano sa responsabilidad nga ‘padayong magabantay sa inyong mga kalag.’ (Hebreohanon 13:17) Sila makatabang kanimo nga dili na makasala pag-usab.​—Itandi ang Santiago 5:​14-16.

Ayaw limbongi ang imong kaugalingon pinaagi sa pagpangatarongan nga matabangan nimo ang imong kaugalingon. Kon may igong kalig-on ka pa sa pagbuhat niana, makasala ka kaha? Tin-aw, kinahanglang magpatabang ka sa uban. Si Andrew maisogong naghimo niana. Ang iyang tambag? “Akong gidasig si bisan kinsa nga nalangkit sa seryosong sala karon, o sa una, nga mosugid kang Jehova ug sa usa sa iyang mga magbalantay.”

Apan sa unsang paagi moduol ka sa ansiyano? Pilia ang usa nga mobati kang komportable. Mahimong mosugod ka pinaagi sa pag-ingon: “Kinahanglan akong makigsulti kanimo bahin sa usa ka butang” o “Ako may suliran” o bisan “Ako may suliran ug nagkinahanglan sa imong tabang.” Ang imong pagkamatinud-anon ug pagkamadayganon tinuod nga magpasundayag sa imong paghinulsol ug tinguha nga mag-usab.

‘Nahadlok Akong Mapalagpot’

Komosta na man ang maong posibilidad? Tinuod nga lagmit mapalagpot ang usa nga nakahimog seryosong sala, apan dili awtomatiko. Ang pagpalagpot maoy alang niadtong modumili sa paghinulsol​—kinsa magahiong modumili nga mag-usab. Matod sa Proverbio 28:13: “Siya nga nagatabon sa iyang mga kalapasan dili molampos, apan siya nga nagasugid ug nagabiya niana pakitaan ug kaluoy.” Ang kamatuoran nga miduol ka sa mga ansiyano aron tabangan maoy pamatuod sa imong tinguha nga mag-usab. Ang mga ansiyano sa panguna maoy mga tig-ayo, dili tigsilot. Sila obligadong trataron ang katawhan sa Diyos uban ang kalulot ug dignidad. Buot nilang tabangan ka nga mohimog ‘tul-id nga mga alagianan sa imong mga tiil.’​—Hebreohanon 12:13.

Tinuod, kon ang panglimbong o dugayng pagbuhat sa seryosong sala nalangkit, lagmit kulang ang makapakombinsir nga “mga buhat nga nahiangay sa paghinulsol.” (Buhat 26:20) Usahay ang pagpalagpot moresulta. Ug bisan pag ang makasasala mahinulsolon, ang mga ansiyano obligado nga magpahamtang ug usa ka matang sa disiplina. Angay ka bang masuko o mayugot sa ilang desisyon? Sa Hebreohanon 12:​5, 6, si Pablo nag-awhag: “Anak ko, ayawg pakamenosa ang disiplina gikan ni Jehova, ni malusno sa dihang ikaw tul-iron niya; kay ang gihigugma ni Jehova iyang ginadisiplina; sa pagkatinuod, siya nagalapdos sa matag usa nga iyang gidawat ingong anak.” Bisan unsang disiplina nga imong madawat, isipa kana nga pamatuod nga ang Diyos nahigugma kanimo. Hinumdomi, ang tinuod nga paghinulsol mopasig-uli kanimo sa maayong relasyon uban sa atong maluluy-ong Amahan, si Jehova nga Diyos.

Nagkinahanglag kaisog ang pag-angkon sa imong mga sala. Apan sa paghimo niana, matul-id nimo ang suliran dili lamang uban sa imong mga ginikanan kondili uban kang Jehova nga Diyos mismo. Ayawg tugoti nga ang kahadlok, garbo, o kaulaw magpugong kanimo sa pagpangayog tabang. Hinumdomi: Si Jehova “madagayaong magapasaylo.”​—Isaias 55:7.

[Mga footnote]

[Blurb sa panid 12]

‘Akong gidasig ang tanang nakasala nga mosugid ngadto kang Jehova.’​—Andrew

[Hulagway sa panid 11]

Ang pagsugid sa imong mga ginikanan mahimong motultol sa espirituwal nga pagkaayo