Gikan sa Among mga Magbabasa

Panimbang Human mabasa ang artikulong “Ang Gasa sa Diyos nga Panimbang” (Marso 22, 1996), ako natukmod sa pagpasalamat kaninyo. Sa pagkakaron nagtuon ako ug audiology, ug walay usa sa akong mga teksbok ang adunay impormasyon nga sama ka kompleto ug ka sayon sabton sama sa artikulo sa Pagmata! Ekselente usab ang pagkadibuho sa dalunggan.

J. P. A., Brazil

Mga Korbata Daghan kaayong salamat sa artikulong “Kinsay Nag-imbento sa Korbata?” (Mayo 8, 1996) Ingong usa ka ministro sa mga Saksi ni Jehova, ako nakasul-ob ug korbata sa kainiton nga kapin sa 30 grado Celsius samtang nakig-ambit sa balay-balay nga buluhatong pagsangyaw. Kanunay nakong gibanabana nga ang korbata lagmit giimbento sa usa ka pintas ika-13ng siglo nga inkwisitor kinsa aron patug-anon ang usa ka erehes naghulga kaniya ginamit kaha ang kahoyng inatanan sa sinakit, mga tornilyong ipiit sa kumagko, pinaagig pagpabukal diha lana, o pagpasul-ob ug korbata sa usa ka hapon sa ting-init.

W. B., Tinipong Bansa

Ang pipila mobati nga ang pagsul-ob ug korbata maoy pagsakit sa bisan unsang panahon. Bisan pa niana, dalayegon nga sa mga kultura diin ang korbata giisip nga angayang gamiton, kadaghanan sa mga Saksi ni Jehova miantos sa kadili-komportable sa pagtaod ug korbata samtang nakig-ambit sa ministeryo ug samtang nagatambong sa Kristohanong mga tigom.​—ED.

Walay-Aso nga Tabako Sa among klase sa tunghaan bahin sa maayong panglawas, kami nagtuon bahin sa mga droga. Akong gipakita sa akong magtutudlo ang usa ka kopya sa Abril 22, 1996, nga isyu sa Pagmata! nga may artikulong “Mga Batan-on Nangutana . . . Walay-Aso nga Tabako​—Makadaot Ba?” Gipahimo ko niya ug 30 ka kopya sa artikulo aron iyang ikahatag kini ug mabasa ang artikulo duyog sa iyang mga klase. Ang mga batan-on sa akong klase nalingaw niana, ug nakapahimutang gani ako ug pipila ka magasin kanila.

M. C., Tinipong Bansa

Seksuwal nga Panghasi Salamat sa seryeng “Sa Dihang ang Seksuwal nga Panghasi Mawala Na!” (Mayo 22, 1996) Sa pagpakig-ambit sa magasin sa uban, akong nadiskobrehan nga daghang babaye ang mapasalamaton sa mga sugyot kon unsaon paglikay sa panghasi ug kon unsay buhaton kon gihasi. Pipila ka semana sa ulahi sa personal nasinati nako ang pag-among-among diha sa trabahoan ug nagtaho niana sa kapolisan. Ako gidayeg sa paagi nga akong gidumala ang kahimtang.

Ngalan wala ibutyag, Alemanya

Mapasalamaton gayod ako sa mga artikulo. Ako karon anaa na sa akong ikaduhang tuig sa segundaryong tunghaan, ug ako nakasinatig panghasi, apan wala magsulti kang bisan kinsa bahin niana. Kining mga artikuloha nagdasig kanako sa pagtug-an sa akong mga ginikanan ug akong mga magtutudlo. Karon maisogon na akong mibarog batok sa mga tighasi.

K. Y., Hapon

Ako usa ka 21-anyos nga sekretarya ug di pa dugayng gihasi sa seksuwal nga paagi sa akong amo. Samtang naghunahuna akog paagi kon unsaon pagduol kaniya aron ipahayag ang akong mga pagbati, akong nadawat kining isyuha sa Pagmata! Akong gihatagan ang akong amo ug kopya, nga iyang gibasa. Siya nangayog pasaylo ug misaad nga dili na gayod niya buhaton pag-usab ang iyang gibuhat kanako.

D. N. I., Nigeria

Akong giapresyar ang inyong pagyagyag niining hinungdanong isyu, apan sumala sa inyong mga hulagway, ang mga lalaki lang ang naghimo sa panghasi. Tin-aw, inyong gipresentar ang usa ka mapihigong panglantaw.

H. T., Tinipong Bansa

Kadaghanang tigdukiduki nag-ingon nga ang mga babayeng biktima sa seksuwal nga panghasi mas daghan kay sa mga lalaki. Bisan pa niana, ang mga artikulo miila nga ang mga lalaki usab mahimong hasion, nga naghisgot ug tinong mga pananglitan.​—ED.

Kadaghanan sa mga artikulo bahin niining ulohana nagpasiugda lamang kon unsay angayng buhaton sa mga babaye aron panalipdan ang ilang kaugalingon apan wala magtudlo sa mga lalaki sa pagtahod sa mga babaye. Sa pagkatinuod, kon walay mga tighasi, walay panghasi. Ang inyong artikulo naghisgot sa “Hustong Panggawi Alang sa mga Lalaki.” Tungod niini, takos kini sa pagdayeg.

O. C., Taiwan