Mga Babaye Nagkinabuhig Mas Taas nga Kinabuhi Apan Dili Mas Maayong Kinabuhi

SA TIBUOK kalibotan ang mga babaye nagminyo nga mas edaran, nagbatog mas diyutayng mga anak, ug nagkinabuhig mas taas nga kinabuhi. “Ang mga kinabuhi sa mga babaye nagakausab,” nagtaho ang magasing UNESCO Sources. Tali sa 1970 ug 1990, ang gitas-on sa kinabuhi sa mga babaye gikan sa pagkatawo miuswag sa upat ka tuig diha sa ugmad nga kanasoran ug duolan sa siyam ka tuig diha sa nagakaugmad nga kanasoran. “Kini nagpasabot nga diha sa ugmad nga mga rehiyon karong adlawa, ang mga babaye nagkinabuhi sa aberids nga 6.5 ka tuig nga mas taas kay sa mga lalaki. Diha sa nagakaugmad nga mga rehiyon ang kalainan maoy lima ka tuig diha sa Latin Amerika ug sa Caribbeano, 3.5 ka tuig sa Aprika ug tulo ka tuig sa Asia ug sa Pasipiko.”

Bisan pa niana, alang sa daghang babaye, ang pagkinabuhi ug mas taas nga kinabuhi wala magpasabot ug pagkinabuhi ug mas maayong kinabuhi. Ang Our Planet, usa ka magasin sa Hiniusang Kanasoran, nag-ingon nga alang sa kinabag-an sa mga babaye sa kalibotan, ang paninugdang mga katungod sa tawo mao gihapon “ang tilinguhaon kaayong butang nga wala pa masinati. Sila nagpangita gihapon sa yanong paninugdang mga katungod sa tawo.” Ugaling, bisan ang mga paninugdan, nag-ingon ang HK, dili mabatonan sa minilyong babaye tungod kay sa gihapon ang kinabag-an sa tanang dili makamaong mobasa ug mosulat, mga kagiw, ug kabos nga mga tawo sa kalibotan mao ang mga babaye. Bisan pa sa pipila ka mga kauswagan, naghinapos ang UNESCO Sources, “ang katibuk-ang kahimtang sa umaabot alang sa mga babaye . . . daw mangiob.”