Pagpamatay sa Ngalan sa Diyos

SINULAT SA KORESPONSAL SA PAGMATA! SA PRANSIYA

“Sa Ngalan sa Diyos, Kami Mopatay ug Mopadayon sa Pagpamatay”

UBOS sa ulohang balita nga gikutlo sa ibabaw, ang International Herald Tribune miingon: “Kining sigloha, nga buot isipon sa popanahong mga optimista nga nalamdagan, sama ra sa bisan hain sa nag-unang mga siglo nga natiman-an sa makalilisang nga kiling sa tawo nga mopatay sa usag usa sa ngalan sa Diyos.”

Ang magsusulat naghisgot ug mga pananglitan sa relihiyosong pakyaw nga pagpamatay sa unang kasiglohan. Dayon, nga nagpunting sa pakyawng pagpamatay nga nahitabo sa ika-20ng siglo, siya mihinapos: “Ang atong nakita maoy makalilisang nga pagpadayon sa linuog nga pagkadili-matugoton sa kanhiayng mga panahon. Ang relihiyon mao gihapoy gihatag nga katarongan sa politikal nga kapintasan ug pag-ilog sa mga teritoryo.”

Ang pipila mosulay sa pagpakamatarong sa relihiyosong mga gubat karon pinaagi sa pag-ingon nga ang Diyos nag-uyon sa pagpamatay sa karaang mga Israelinhon sa mga Canaanhon. Bisan pa niana, dili kana katarongan nga ang nag-angkong mga Kristohanon makiggubat karong adlawa. Ngano? Tungod kay ang mga Israelinhon direktang gisugo sa Diyos nga mahimong mga tigpahamtang sa iyang matarong nga mga paghukom batok sa tigsimbag-demonyo nga mga tawo, kansang pagsimba naglakip sa grabeng seksuwal nga imoralidad ug paghalad sa bata.​—Deuteronomio 7:1-5; 2 Cronicas 28:3.

Ang usa ka pamatuod nga ang mga gubat sa karaang Israel dili ordinaryong mga panagbangi mao ang milagrosong kinaiya sa mga kadaogan nga gihatag sa Diyos sa nasod. Pananglitan, ang karaang mga Israelinhon kas-a gisugo sa paggamit ug mga trompeta, mga banga, ug mga sulo​—dili gayod mga kagamitan sa naandang pakiggubat! Sa laing higayon ang mga mag-aawit gipabarog sa atubangan sa Israelinhong kasundalohan nga nag-atubang sa dako kaayong puwersa sa nanagsulong nga mga kasundalohan gikan sa daghang nasod.​—Maghuhukom 7:17-22; 2 Cronicas 20:10-26.

Dugang pa, sa dihang, usahay, ang mga Israelinhon malangkit sa mga gubat nga wala isugo sa Diyos, sila wala niya panalangini ug sila nag-antos sa pagkaparot. (Deuteronomio 28:15, 25; Maghuhukom 2:11-14; 1 Samuel 4:1-3, 10, 11) Busa, ang mga gubat sa Israel dili magamit nga pananglitan aron pakamatarongon ang mga gubat nga giaway sa Kakristiyanohan.

Sa ngalan sa relihiyon, ang mga Hindu nakig-away batok sa mga Muslim ug mga Sikh; ang Shiite nga mga Muslim nakiggubat batok sa Sunni nga mga Muslim; ug sa Sri Lanka, ang mga Budhista ug mga Hindu nagpinatyanay sa usag usa.

Ang kasagarang pagpamatay sa ngalan sa Diyos mao ang mga gubat nga nahitabo sa Pransiya panahon sa ika-16 nga siglo. Ang sugilanon niining mga gubata naglangkob sa pipila sa labing dugoong mga yugto sa kasaysayan sa Romano Katoliko ug Protestanteng mga relihiyon sa Uropa. Susihon nato kining mga gubata, ug tan-awon kon unsay atong makat-onan gikan niini.

[Picture Credit Line sa panid 3]

Letrato sa U.S. Army