Unsang Relihiyona ang Giuyonan sa Diyos?

IKASUBO, ang relihiyosong pagdumtanay sa ika-16 nga siglong Pransiya wala mohunong. Sa misunod nga siglo, ang dulot nga mga pagpihig nagbahin sa Uropa, samtang ang mga Katoliko ug mga Protestante miadto na usab sa mga natad-panggubatan panahon sa Trayenta ka Tuig nga Gubat (1618-48). Sa ngalan sa Diyos, ang nag-angkong mga Kristohanon nagsugod na usab sa ilang pintas nga pagpinatyanay sa usag usa.

Ang relihiyosong pagdumot ug pagpatay wala mohunong. Ang mga Katoliko ug mga Protestante di pa dugayng nagpinatyanay sa usag usa sa Irlandia, ug ang mga membro sa Ortodokso ug Romano Katolikong mga relihiyon mihimo sa susama sa teritoryo sa kanhing Yugoslavia. Ug daw dili katuohan, panahon sa mga Gubat sa Kalibotan I ug II, ang mga Katoliko ug mga Protestante mipatay sa gatosan ka libong membro sa ilang kaugalingong mga relihiyon diha sa mga natad-panggubatan. May katarongan ba kining maong pagpamatay? Unsa ang panglantaw sa Diyos?

Mga Paningkamot sa Pagpakamatarong

Ang 1995 Britannica Book of the Year nag-ingon: “Ang teolohikal nga pagpakamatarong sa kapintasan gisulayan sa daghang grupo sa 1994.” Kapin sa 1,500 ka tuig kanhi, ang susamang pagsulay sa pagpakamatarong sa pagpamatay gihimo sa Katolikong pilosopo nga si “San” Agustin. Sumala sa New Catholic Encyclopedia, siya “mao ang nagmugna sa matarong nga gubat nga teoriya,” ug ang ensiklopedia nag-ingon nga ang iyang panghunahuna ‘may impluwensiya bisan sa modernong kapanahonan.’

Ang Katoliko, Ortodokso, ug Protestanteng mga iglesya nagtugot, ug gani nagpasiugda, sa pagpamatay sa ngalan sa Diyos. Bisan tuod dugoon ang rekord niining maong mga relihiyon, ang iya sa daghang ubang dagkong relihiyon sa tibuok kalibotan ingon usab niana. Nan, sa unsang paagi mailhan nimo ang katawhan nga nagtuman sa matuod nga pagsimba?

Dili lamang pinaagi sa pagpamati sa kon unsay ilang giangkon nga gituohan. Mahitungod niining butanga, si Jesu-Kristo nagpasidaan: “Pagbantay sa bakak nga mga propeta nga manganha kaninyo sa sapot sa karnero apan sa sulod sila maoy manunukob nga mga lobo. Mailhan ninyo sila pinaagi sa ilang mga bunga. . . . Ang usa ka maayong kahoy nagapatunghag maayong bunga apan ang usa ka daot nga kahoy nagapatunghag daotang bunga. . . . Ang bisan unsang kahoy nga wala magapatunghag maayong bunga ginaputol ug ginasalibay ngadto sa kalayo.” (Italiko amoa.)​—Mateo 7:15-20, The New Jerusalem Bible.

Mailhan Pinaagi sa Ilang mga Bunga

Minilyon sa matinud-anong mga tawo nagaila nga ang mga relihiyon sa kalibotan maoy ‘dunot nga mga kahoy’ nga nagapamungag “daotang bunga,” ilabina, pinaagi sa pagpasiugda sa dugoong mga gubat. Diha sa Bibliya ang tibuok-kalibotang imperyo sa bakak nga relihiyon gibatbat ingong usa ka espirituwal nga bigaon nga gitawag ug “Dakong Babilonya.” Ang Bibliya nag-ingon nga “diha kaniya nakaplagan ang dugo sa mga propeta ug sa mga balaan ug sa tanan kanila nga gipamatay ibabaw sa yuta.”​—Pinadayag 17:3-6; 18:24.

Sa ingon, inay uyonan ang mga gubat nga gibendisyonan sa relihiyosong mga lider, ang Diyos sa dili madugay magpahamtang ug paghukom niadtong mga relihiyon nga nanagpamatay diha sa iyang ngalan. Buhaton niya kini ingong katumanan sa tagna sa Bibliya nga nag-ingon: “Sa usa ka kusog nga paglabog ang dakong siyudad nga Babilonya igatambog, ug siya dili na gayod makaplagan pag-usab.” Sa dihang ang maong makalipayng hitabo mahinabo, ang Diyos ‘nagpahamtang na ug paghukom sa dakong bigaon,’ ug “nakapanimalos na sa dugo sa iyang mga ulipon diha sa iyang kamot.”​—Pinadayag 18:21; 19:2.

Ang katawhan nga nayugot na sa tanang pagpamatay nga nahitabo sa ngalan sa Diyos maghunahuna tingali kon aduna bay mga Kristohanon nga aktuwal nga nagkinabuhi nga kaharmonya sa tagna sa Bibliya: “Ilang pagahimoon ang ilang mga espada nga mga punta sa daro ug ang ilang mga bangkaw himoon nga mga galab. Ang usa ka nasod dili na mobakyaw sa espada batok sa laing nasod, ni makakat-on pa sila sa gubat.” (Isaias 2:4) May nahibaloan ka ba nga mahinadlokon-sa-Diyos nga katawhan nga naglikay sa gubat?

Ang Relihiyon nga Giuyonan sa Diyos

Ang usa ka sosyolohikal nga pagtuon nga nag-ulohang “Dugang Mahitungod sa Pagpakamatarong sa Kapintasan,” nga gipatik sa University of Michigan, miingon: “Sukad sa pagsugod sa siglo, ang mga Saksi ni Jehova padayong naghupot sa ilang baroganan nga dili-pintas nga ‘Kristohanong Neyutralidad’ latas sa duha ka dagkong mga gubat sa kalibotan ug sa misunod nga mga panagbangi sa militar sa yugto sa ‘Bugnawng Gubat.’” Sa pag-ila sa katarongan nga ang mga Saksi nagpabiling neyutral, ang pagtuon nag-ingon: “Ang mga pagtulon-an sa mga Saksi ni Jehova naggikan sa ilang kombiksiyon nga ang Bibliya mao ang dinasig nga pulong sa Diyos.”

Oo, ang mga Saksi ni Jehova nagkinabuhi sumala sa Bibliya, nga nagtudlo: “Ang mga anak sa Diyos ug ang mga anak sa Yawa tataw pinaagi niining butanga: Ang matag usa nga wala magapadayon sa pagbuhat sa pagkamatarong wala magagikan sa Diyos, ni siya nga wala maghigugma sa iyang igsoon. . . . Kita kinahanglang magbaton ug gugma sa usag usa; dili sama kang Cain, kinsa . . . mipatay sa iyang igsoon.”​—1 Juan 3:10-12.

Ang mga Saksi ni Jehova subsob nga nagdani sa pagtagad sa katawhan ngadto sa pagkasad-an sa dugo sa mga relihiyon sa kalibotan. Gipalanog usab nila ang dinaliang hangyo sa Bibliya: “Gumula kamo kaniya [Dakong Babilonya], katawhan ko, kon dili kamo buot makaambit sa iyang mga sala, ug kon dili kamo buot makadawat ug bahin sa iyang mga hampak. Kay ang iyang mga sala nagtipun-og sangko sa langit, ug nahinumdoman sa Diyos ang iyang inhustisya nga mga buhat.”​—Pinadayag 18:4, 5.

Daghang sinserong katawhan ang misanong sa awhag nga mobiya sa tibuok-kalibotang imperyo sa bakak nga relihiyon. Kon ikaw nayugot pag-ayo sa tanang pagpamatay nga gihimo sa ngalan sa relihiyon, gidapit namo kamo sa pagkontak sa tawo nga naghatag kanimo niining magasina o sa pagsulat sa usa sa mga adres nga gitagana sa panid 5. Ang mga Saksi ni Jehova malipay sa pagtabang kanimo nga makakat-on bahin sa saad sa Bibliya sa usa ka bag-ong kalibotan sa pagkamatarong, diin ang gubat mawala na.​—Salmo 46:8, 9; 2 Pedro 3:13.

[Hulagway sa panid 10]

“Sila nagpahayag sa dayag nga sila nakaila sa Diyos, apan sila wala-magaangkon kaniya pinaagi sa ilang mga buhat.” Tito 1:16