Gikan sa Among mga Magbabasa

Dyslexia Nagsulat ako aron ipahayag ang akong kinasingkasing nga pasalamat sa artikulong “Pagbuntog sa Kapakyasan Labot sa Dyslexia.” (Agosto 8, 1996) Human mabasa ang kahon nga “Kon Unsaon Pag-ila sa Dyslexia Diha sa Kabataan,” ang akong bana ug ako nagpasusi sa among diyes anyos nga anak lalaki. Among nakaplagan nga nag-antos gayod siya sa dyslexia, ug karon kami naghimo na ug mga lakang sa paghatag kaniya ug tabang nga iyang gikinahanglan, diha sa balay ug sa eskuylahan. Ang iyang mga magtutudlo kanunayng nagsugilon kanamo nga siya may katakos gayod nga bata apan wala siya maningkamot. Busa inyong mahunahuna kon unsa ka mapasalamaton kami nga gipatik kining artikuloha.

J. S., Scotland

Ingong inahan sa duha ka anak nga may dyslexia, nalipay ako nga nabasa kining artikuloha. Kahibulongan gayod ang nahimo niini bahin sa pag-edukar sa uban kon unsa ka tinuod gayod kining maong depekto ug kon unsa ka lisod kini alang niadtong aduna niini. Mahanduraw ba nimo nga dili ka makabasa sa karatula sa karsada? O mosulay sa pag-order ug pagkaon gikan sa usa ka menu sa dihang dili ka makabasa kon unsay giingon niana? Ako nakaseguro nga ang mga nag-antos niini mopadapat sa impormasyon.

M. K., Tinipong Bansa

Nameligrong Espisye Kinasingkasing nga pasalamat sa seryeng “Nameligrong Espisye​—Nganong Mabalaka?” (Agosto 8, 1996) Nameligro gayod kita nga mawad-an ug bahandi. Ang artikulo nagpabuhi sa akong tinguha nga mopuyo sa gisaad sa Diyos nga bag-ong kalibotan, diin ang mga hayop makapuyo nga dili mameligrong mahanaw.

D. I., Albania

Krisis sa mga Kagiw Ako usa ka kagiw gikan sa Burundi, ug buot kong ipahayag ang akong apresasyon sa seryeng “Ang Krisis sa mga Kagiw​—Matapos ba Kaha?” (Agosto 22, 1996) Nadasig gayod ako sa pagkasayod sa panglantaw ni Jehova niining butanga ug kon sa unsang paagi, sa karaang kapanahonan, iyang gisugo ang iyang katawhan nga tratahon ang mga kagiw uban sa mahigugmaong kalulot. Nagpasalamat ako kaninyo sa mga artikulo; kini naghupay gayod kanako.

D. M., Kenya

Trahedya sa Bus Samtang nagbasa sa artikulong “Pagbuntog sa Trahedya Pinaagi sa Kusog ni Jehova” (Agosto 22, 1996), dili ko kapugngan ang paghilak tungod kay personal akong naapektohan niini. Ako usab nalangkit sa usa ka aksidente, kauban sa akong kinasuorang higala. Namatay siya pipila ka oras sa ulahi ingong resulta sa grabeng pagkaangol. Sulod sa misunod nga lima ka tuig, nakakat-on ako sa pagdawat ug pagsagubang sa grabeng kaguol ug pagkasad-an nga akong gibati tungod kay ako nabuhi ug siya wala. Ako nagsalig kang Jehova nga iyang hinumdoman ang akong minahal nga higala. May empatiya usab ako niadtong nawad-an sa ilang minahal sa kinabuhi niining maong trahedya sa Espanya.

J. T., Tinipong Bansa

Pagkanganga Salamat sa artikulong “Bisan ang Dila sa mga Nganga Makasulti sa Matin-aw.” (Agosto 22, 1996) Ang kasinatian ni Petr Kunc nagpalig-on gayod kanako. Nganga usab ako. Sa dili pa mohatag ug pakigpulong sa Bibliya, kanunay akong mohangyo kang Jehova nga tabangan ako sa pagpahayag sa akong kaugalingon nga matin-aw.

M. M., Italya

Sa dihang nag-edad ako ug 20, nalisdan ako sa pagsulti ngadto sa uban ug gikan sa plataporma diha sa Kingdom Hall sa mga Saksi ni Jehova. Human sa usa ka asaynment, singoton ko pag-ayo ug mobatig talagsaong kakapoy. Usa gayod ka dakong pagdasig ang pagbasa sa kasinatian sa usa ka kaubang Kristohanon nga nag-alagad kang Jehova bisan pa niining sulirana. Nakatabang kini kanako sa pagbaton ug positibong panglantaw sa mga butang.

M. S., Hapon

Natukmod ako sa pagpasalamat kaninyo sa pagpatik niining maong kasinatian. Ako adunay samang suliran sukad pa sa pagkabata. Sama kang Petr, ako nag-alagad ingong ansiyano sa kongregasyon, ug ako kinahanglang mosalig kang Jehova alang sa kusog sa pagtuman sa akong mga asaynment. Karon ako nagdumala sa Tunghaan sa Teokratikanhong Ministeryo, nga nagtabang sa uban sa ilang pagpanulti.

N. O. N., Nigeria