Gikan sa Among mga Magbabasa
Pagpalagpot Akong gipabilhan ang artikulong “Ang Hunahuna sa Bibliya: Kon Nganong ang Pagpalagpot Usa ka Mahigugmaong Kahikayan.” (Septiyembre 8, 1996) Ako mismo napalagpot niadtong 1987 ug nakabalik niadtong 1988, human makakat-on sa akong leksiyon. Kining mahigugmaong kahikayan nakatabang kanako sa paghimog mga kausaban sa akong estilo sa kinabuhi ug sa kaubanan. Pagkabulahan nato nga nakabaton ug organisasyon nga nag-ila sa mga sukdanan sa Bibliya!
R. R., Tinipong Bansa
Ako usab napalagpot gikan sa kongregasyon. Akong gibati niadtong tungora nga kadto maharason ug nga kadto ang labing daotang butang nga mahimo ngadto sa usa ka tawo. Nasayop ako! Sa wala pa ang pagpalagpot, ang mga ansiyano sa kongregasyon naningkamot pag-ayo sa pagtabang kanako nga maghinulsol. Wala gayod nako maapresyar ang tabang niadtong panahona. Ang pagkanapalagpot nagpaubos kanako pag-ayo. Nagpalihok kini kanako sa pagsabot kon unsa ka hinungdanon ang atong relasyon uban kang Jehova.
B. T., Tinipong Bansa
Mga Nitibong Amerikano Salamat sa seryeng “Amerikanong mga Indian—Unsay Ilang Kaugmaon?” (Septiyembre 8, 1996) Kanunay akong interesado sa kasaysayan sa mga Nitibong Amerikano. Sa makausa pa, nakadayeg ako sa pagkamadayganon, katinuoran, ug makasaysayanhong katukma sa inyong mga magasin.
A. M., Italya
Dili ka gayod makakita ug usa ka Nitibo nga Amerikanong magtutudlo o abogado nga ipakita sa atubang nga hapin sa usa ka magasin. Ang primitibong mga hulagway, susama sa atubang nga hapin sa inyong isyu, kanunayng gipresentar. Ang padayong paggamit niining maong mga hulagway nagbabag sa among mga paningkamot batok sa nabatonang pagtuo sa kadaghanan bahin kanila.
K. M. T., Tinipong Bansa
Sa pagkatinuod dili namo tumong nga padayonon paggamit ang bisan unsang makadaot nga nabatonang pagtuo sa kadaghanan bahin kanila. Ang dibuho sa hapin gidisenyo sa pagpresentar sa mga Nitibong Amerikano sa usa ka positibo ug dungganong paagi. Ang tradisyonal nga besti gigamit tungod kay haom kini sa ulohan ug dali rang mailhan sa among tibuok-yuta nga magbabasa. Makaiikag, daghang Nitibo nga Amerikanong mga magbabasa ang nagpahayag ug apresasyon alang sa mga artikulo ug sa dibuho. Ang uban buot gani nga ipatunhay ang karaang mga paagi ug magsul-ob gihapon ug tradisyonal nga besti sa pipila ka okasyon.—ED.
Sanglit nagtrabaho ako sa usa ka museyo ingong etnologo nga nag-espesyalisar sa Amerika del Norte, ako interesado kaayo niining ulohana. Posible ba nga padalhan ako ug napulo ka kopya niining isyuha, nga akong iapod-apod ngadto sa uban nga interesado sa Amerikanong mga Indian?
P. B., Alemanya
Nalipay kami sa pagtuman niining hangyoa.—ED.
Ang diyutay nakong kahibalo bahin sa mga Indian naggikan sa mga salida. Akong masabtan niining mga artikuloha nga ang Hollywood wala magpakita sa kamatuoran. Ang akong panglantaw sa mga Indian nausab.
T. M., Tinipong Bansa
Ang akong kagikan may sagol nga Nitibong Amerikano, busa ako nalipay sa pagbasa niini nga isyu. Bisan pa niana, kasukwahi sa hunahuna sa kadaghanan, si Sitting Bull dili lider sa Little Bighorn nga gubat.
P. H., Tinipong Bansa
Kon si Sitting Bull personal nga miapil o wala moapil sa gubat dayag nga usa ka butang nga gilantugian taliwala sa mga historyano. Ang panglantaw nga daw nagpabilin taliwala sa kadaghanang eskolar makaplagan sa tinamod nga magasing “Natural History,” nga nag-ingon: “Sumala sa asoy sa mga Indian, si Sitting Bull, nga usahay gihunahuna ingong kaaway ni Custer diha sa gubat, wala moapil sa pakig-away apan puliki sa paghimog tambal aron sa pagpalig-on sa Indian nga mga manggugubat.” Kon ang dugang nagpatin-aw nga impormasyon ipadayag tan-awon pa.—ED.