Unsa ang Sulbad?

ANG mga eksperto mainitong naglantugiay bahin sa mga sulbad sa komplikadong mga problema sa tawo bahin sa tubig. Buot sa World Bank nga $600 ka bilyon ang ipuhonan alang sa sanitasyon ug mga programa bahin sa tubig sa sunod napulo ka tuig. Ang kantidad sa dili pagpuhonan tingalig mas dako pa. Sa Peru, pananglitan, ang napulo ka semanang epidemya sa kolera, nga gipahinabo sa nahugawang tubig, niining bag-o pa mikostar ug duolan sa $1 ka bilyon​—tulo ka pilo sa salapi nga gipuhonan sa suplay sa tubig sa maong nasod sulod sa tanang katuigan sa 1980.

Ugaling, bisan pa sa maayong katuyoan niadtong nagpasiugda niana, ang mga proyekto sa tubig sagad diyutay ray mahimo sa pagtabang sa kabos kaayo. Ang pagtubo sa dagkong mga siyudad sa nagakaugmad nga kalibotan maoy hilabihan ug gubot. Ang mga kabos nagpuyo sa naghuot-kaayo, ubos ug kalidad nga mga barongbarong nga walay gripo o sanitasyon. Kay wala makabaton sa gipabarato-sa-gobyernong mga serbisyo sa tubig sa publiko, sila kinahanglang mobayad sa pribadong mga tigbaligya ug mahal alang sa tubig, nga sagad hugaw nga tubig.

Tin-aw, ang tibuok-yutang krisis sa tubig maoy komplikado ug naglangkob sa nagkalanggikit nga mga butang: mga kanihit sa tubig, polusyon, kakabos, sakit, ug ang nag-uswag nga mga panginahanglan sa nagdaghang mga populasyon. Sa ingon tin-aw usab nga ang mga tawo dili makasulbad niini nga mga problema.

Pasukaranan sa Pagkamalaomon

Ang umaabot, hinunoa, dili kay dulom ingon sa gitagna sa daghan. Ngano? Tungod kay ang sulbad sa krisis sa tubig sa kalibotan wala mag-agad sa tawo; kini nag-agad sa Diyos. Siya lamang ang adunay katakos ug kabubut-on sa pagsulbad sa tanang problema sa tubig.

Dili kaduhaduhaan nga si Jehova nga Diyos lamang ang makasulbad niini nga mga problema. Siya ang Tigdisenyo ug Maglalalang dili lamang sa yuta kondili usab sa katubigan diha niana. Siya ang nagpalihok sa kahibulongang siklo sa tubig duyog sa tanang ubang kinaiyanhong mga siklo nga nagpaposible sa kinabuhi sa yuta. Ang Pinadayag 14:7 nagpaila kang Jehova ingong “ang Usa nga naghimo sa langit ug sa yuta ug dagat ug mga tuboran sa katubigan.”

Si Jehova adunay gahom sa pagkontrolar sa tubig sa kalibotan. Siya “ang Usa nga nagpaulan ibabaw sa nawong sa yuta ug nagpadala sa mga tubig ibabaw sa kabaolan.” (Job 5:10) Bahin kaniya ang Bibliya nag-ingon: “Iyang gihimo ang kamingawan nga linaw sa tubig, ug ang yuta nga mamala nga mga tinubdan sa tubig.”​—Salmo 107:35.

Sa makadaghan iyang gipamatud-an ang iyang katakos sa pagtaganag tubig. Pananglitan, siya nagtaganag tubig alang sa mga Israelinhon sulod sa ilang 40 ka tuig sa kamingawan, usahay sa milagrosong paagi. “Gikan sa mga pangpang mipabul-og siya ug mga tubod sa tubig ug nagpaagay sa mga tubig ingon sa mga suba,” nag-ingon ang Bibliya. “Tan-awa! Iyang gibunalan ang bato aron ang mga tubig moagos ug ang mga sapa mismo mobaha.”​—Salmo 78:16, 20.

Kon Unsay Buhaton sa Diyos

Dili tugotan sa Diyos nga ang krisis sa tubig magpadayon sa hangtod. Ang Bibliya nagtagna nga moabot ang panahon nga siya molihok alang sa tanan niadtong sa tibuok-yuta kinsa nangandoy nga mabuhi ubos sa mahigugmaong pagmando sa iyang langitnong kagamhanan, nga sa dili madugay mogahom sa yuta.​—Mateo 6:10.

Kana nga kagamhanan, o Gingharian, magtapos sa dala-sa-tubig nga mga sakit, duyog sa tanang ubang balatian. Ang Bibliya nagpasalig sa mga maunongon sa Diyos: “[Ang Diyos] magapanalangin gayod sa inyong tinapay ug sa inyong tubig; ug [siya] sa pagkatinuod magakuha sa sakit gikan sa inyong taliwala.” (Exodo 23:25) Dugang pa, ang mga tighugaw sa katubigan sa yuta pagawad-on na samtang iyang ‘pagagun-obon kadtong mga nagagun-ob sa yuta.’​—Pinadayag 11:18.

Ang tibuok yuta molambo ilalom sa mahigugmaong pag-atiman sa Diyos. Dili na gayod makigbisog pa nga walay hunong ang mga tawo sa pagpangitag tab-ang, hinlong tubig. Ang Labing Gamhanang Diyos, nga nagasulti kanunay sa kamatuoran, nagdasig sa iyang manalagna sa pagsulat mahitungod sa umaabot: “Kay sa kamingawan magagula ang mga tubig, ug ang mga sapa sa desyertong kapatagan. Ug ang napagba nga yuta mahimong usa ka linaw, ug ang giuhaw nga yuta ingong mga tubod sa tubig.”​—Isaias 35:6, 7; Hebreohanon 6:18.

[Hulagway sa panid 10]

Ang Diyos nagsaad: “Sa kamingawan magagula ang mga tubig, . . . ug ang giuhaw nga yuta [mahimong] ingong mga tubod sa tubig.”​—Isaias 35:6, 7