Naghinobrang Paugnat sa Kusog
“USA ka talagsaong produkto sa paugnat nga kalihokan,” nag-ingon ang The Toronto Star, mao ang “dili-mapugngan ug nalabian nga mga tig-ehersisyo.” Ang Star nagtaho nga ang pagpalabig ehersisyo makadaot sa kalalakin-an ug kababayen-an. Ang mga lalaki mahimong mopalabi sa pag-ehersisyo aron masinati pag-usab ang kalagsik sa pagkabatan-on, matod sa pipila ka doktor ug mga terapista, apan ang pasukaranang mga hinungdan kon nganong ang mga babaye malabian sa pag-ehersisyo kasagaran maoy baliko nga panghunahuna sa kon unsay hitsura sa ilang mga lawas ug mga suliran sa pagkaon.
Daghan ang mosugod sa pag-ehersisyo aron mas maayo ang pagbati ug mas maayong sud-ongon apan sa ngadtongadto malabian pag-ehersisyo tungod lamang sa panginahanglan nga mag-ehersisyo. Si Richard Suinn, usa ka sikologo bahin sa paugnat ug tigtambag sa ubay-ubay nga tem sa Olympic, nagpahayag nga ang naghinobrang pag-ehersisyo madayag kon kini “pinasikad sa panukmod sa pagbati inay nga sa simpleng pagdumala sa paugnat.” Kon mag-atiman niining sulirana, ang mga doktor ug mga terapista naningkamot nga matino ang matang sa epekto sa pag-ehersisyo diha sa mga kinabuhi sa mga pasyente. Kon sila nanimbang sa pag-atiman sa usa ka hago nga karera dungan sa pag-atiman sa panimalay ug mga bata, ang nalabiang pag-ehersisyo dunay negatibong epekto sa ilang maayong panglawas. Sumala kang Dr. Thomas Schwenk, usa ka propesor sa medisina heneral, “mahimong himsog gihapon sila sa pisikal, apan dunay sosyal nga kasamok, kasamok sa trabaho, ug panagbingkil sa pamilya.”
Ang Star naglista sa pipila ka pasidaan maylabot sa mga nagiyan sa pag-ehersisyo: ‘Ang pagpili ug mga ehersisyo nga mag-inusara, sama sa pagbisikleta, paglangoy, pagdagan o pagbarbel; pagkaestrikto sa eskedyul sa pag-ehersisyo; ang pagtuo nga obligado ang pag-ehersisyo ug ang pagpalta niini dili madawat; ug pagkadaot sa ubang bahin sa personal nga kinabuhi.’
Bisan pag ang mga tawo nga nagtrabaho sa natad sa paugnat nag-ila sa mga kaayohan sa kasarangang pag-ehersisyo, sila usab nagpasidaan sa makadaot nga mga epekto sa naghinobrang ehersisyo.—1 Timoteo 4:8.