Pagpangilad sa Ngalan sa Relihiyon
KON ikaw nakurat ug nasubo sa mga pagpangilad nga nahisgotan bag-o pa lang, wala ka mag-inusara. Apan adunay matang sa mga pagpangilad nga mas dako pa ang tulubagon—sa ngalan sa relihiyon. Usa sa labing komon adunay kalabotan sa pagtuo nga ang kalag magpabiling buhi human sa kamatayon ug ang mga patay makabaton ug kaayohan gikan sa mga patay. Minilyong sinserong mga tawo sa tibuok kalibotan gipatuo nga pinaagi sa pagbayad ug dagkong kantidad sa salapi, sila makatabang o makahupay sa ilang mga minahal nga nangamatay.
Karong adlawa, sa pipila ka nasod, adunay bag-ong butang niining karaang pangilad. Pananglitan, di pa dugay sa Hapon ang Budhistang mga paring lalaki ug mga paring babaye nga nag-angkong adunay espirituwal nga mga gahom gidakop kay gidudahang misakiyo ug gatosan ka milyong yen gikan sa mga parokyano. Kadtong gipangdakop nag-anunsiyo ug mga serbisyo sa pagpang-ayo ug pagpangonsulta. Ang misanong naglakip sa upat ka asawa nga giingnan nga sila giduaw kanunay sa mga espiritu sa ilang namatay nga mga anak. “Ang mga babaye gipabayad dayon sa katibuk-ang kantidad nga 10 ka milyong yen [$80,000, T.B.] alang sa mga serbisyo sa lubong,” nagtaho ang Mainichi Daily News. Usa ka 64-anyos nga babaye ang mitunol ug kapin sa 6.65 ka milyong yen (mga $53,000). Ang babaye nangonsulta sa pari bahin sa panglawas sa iyang anak. “Giingnan kono nila ang babaye nga mag-antos siya sa kalisdanan gawas kon siya mohimog espesyal nga serbisyo aron sa paghandom sa mga kalag sa iyang mga katigulangan ug aron sa pag-abog sa mga espiritu,” nag-ingon ang The Daily Yomiuri.
Ang tukmang kahibalo sa Bibliya nakaluwas unta niining dili-matahapong mga tawo gikan sa pagkailad. Kini nagtin-aw nga ang kalag mamatay. (Ezequiel 18:4) Ang mga patay “walay nahibaloan nga bisan unsa,” nag-ingon ang Ecclesiastes 9:5. Busa ang mga patay dili makadaot sa mga buhi. Ni ang mga buhi makabatog kaayohan sa mga patay.
Ang Daghang Dagway sa Relihiyosong Pagpangilad
Tungod sa ilang kaugalingong kadalo, ang uban mailad sa relihiyosong mga pangingilad. Sa Australia usa ka magtiayon nga nag-angkong nakabaton ug labaw-tawhanong mga gahom nga may katakos sa pagbendisyon sa salapi ug patuboon kini gitunolan ug $100,000 sa usa ka tawo nga buot nga modaghan ang iyang kuwarta. Giingnan siya nga ibutang ang salapi sa usa ka kahon ug itunol kanila aron “balaanon.” Gidala sa magtiayon ang kahon ngadto sa sikbit nga kuwarto aron bendisyonan kana samtang naghulat siya. Sa dihang mibalik sila, gibalik nila kaniya ang kahon, nga nagpasidaan kaniya nga sa bisan unsang kahimtang dili niya ablihan ang kahon hangtod sa tuig 2000. Ug kon ablihan niya? Giingnan siya nga “ang madyik madaot, ug siya mabuta, ang iyang buhok mangalarot, makanser siya, ug mamatay sa estrok.” Apan, human sa duha ka semana ang tawo nagduda na ug giablihan ang kahon. Sorpresa! Puno kana sa ginisigisi nga mga papel. Gibasol niya ang iyang kaugalingon, nag-ingon ang mantalaan nga nagtaho sa hitabo, ug sa katalagsaon naatol, “siya nagsugod na sa pagkaupaw.”
Sa Italya ang relihiyosong pagpangilad adunay bag-ong kaugmaran: Ang pipila ka pari nailad sa mga mangingilad nga nagpakaaron-ingnong debotadong mga Katoliko. Ang mga mangingilad nagpahimulos sa Katolikong tradisyon nga mobayad alang sa Misa rekim para sa usa ka tawong namatay. Giunsa nila paghimo kini? Ang Katolikong magasin nga Famiglia Cristiana misaysay nga ang mga limbongan motanyag nga mobayad daan alang usa ka dosenang Misa rekim ginamit ang mini nga tseke nga gisulatan ug mas dakong kantidad kay sa gipangayong bayranan. Ilang limbongan ang dali-matonto nga pari nga hatagan sila sa sukli nga kuwarta. Makuha sa mga mangingilad ang kuwarta, ug ang makuha sa pari mao ang tseke nga mountol!
Sa Tinipong Bansa, ang mga tigulang kasagarang gipiit sa tanang kiliran sa relihiyosong mga kulto nga nangitag bag-ong mga membro aron mapuno ang ilang mga kahon sa donasyon. “Sa tibuok nasod, ang mga kulto nagtuman sa pangunang lagda sa tanang pangilad: Sunda ang adunay salapi,” misulat ang magasing Modern Maturity. “Sa baylo, sila mosaad sa tanan gikan sa panglawas ngadto sa politikal nga kausaban ngadto sa gingharian sa langit.” Usa ka tawong tig-usab sa hunahuna sa mga tawong sakop sa kulto gikutlo nga miingon: “Ang mga tigulang maoy panginabuhi sa usa ka kulto.”
Ang nalangkit nga salapi mahimong dako kaayo. “May nahibaloan akong mga kaso diin ang mga tawo naghimo sa ilang kaugalingon nga kabos,” matod sa usa ka abogado sa New York nga nakadumala ug daghang kaso sa kulto. “Lakip niini ang mga tawo nga gipangayoag donasyon nga labing menos $100,000 ug kadtong walay salapi kondili ang ilang mga tseke lamang sa Social Security ang ikahatag.” Siya midugang: “Makapahugno kini—ngadto sa indibiduwal ug sa ilang mga pamilya.”
Busa pagbantay! Puliki ang mga mangingilad. Ang mga pangilad sa pag-ayo sa balay, panglimbong sa pagbaligya pinaagig telepono, ug relihiyosong pagpangilad maoy pipila lamang ka pananglitan kon sa unsang paagi sila nagalihok. Imposible ang paghisgot sa tino sa tanan nilang mga paagi, kay kanunay silang maghimo ug bag-ong mga matang sa pangilad. Apan ang gipresentar dinhi sa walay duhaduha magpaalisto kanimo sa panginahanglan nga magmabinantayon, ug lagmit mao kana ang imong labing maayong panalipod. (Tan-awa ang kahon sa panid 8, “Kon Unsaon Paglikay nga Mailad.”) Ang pasidaan sa karaang panultihon sa Bibliya maoy labing haom: “Si bisan kinsa nga walay kasinatian motuo sa tanang pulong, apan ang maalamong tawo magapalandong sa iyang mga lakang.”—Proverbio 14:15.
[Mga hulagway sa panid 10]
Minilyong tawo ang nagtuo nga pinaagi sa pagbayad ug salapi sila makatabang o makahupay sa ilang mga minahal nga nangamatay