Usa ka Masanag nga Kaugmaon Alang sa Atong Kabataan

SUKAD sa kataposan sa Gubat sa Kalibotan II, ang mga gobyerno sa kalibotan naglaraw ug nagpirma ug daghang tratado aron sa pagpanalipod sa mga sibilyan panahon sa gubat. Lakip niana mao ang mga tratado nga nagtugot sa sapot duyog sa medikal nga abiyo ug pagkaon nga makaabot sa kabataan. Ang internasyonal nga mga kasabotan nagsaad nga panalipdan ang kabataan gikan sa seksuwal nga pagpahimulos, pagpaantos, ug kapintasan. Ang mga kasabotan nagdili usab sa pagrekluta sa armadong kusog ni bisan kinsang ubos sa panuigong 15.

Ang The State of the World’s Children 1996, usa ka taho sa United Nations Children’s Fund, nagtawag niining mga balaora ingong “tinuod nga mga ilhanan” ug midugang: “Ang mga politiko nga nasayod nga adunay mga sukdanan nga batok niana mahimo unya silang hukman lagmit magkonsiderar nianang maong mga sukdanan sa ilang pagtimbangtimbang.”

Siyempre, ang mga politiko nakaamgo usab nga ang internasyonal nga katilingban kasagarang nakulangan sa katakos ug kabubut-on sa pagpatuman sa mga balaod. Sa ingon ang taho miadmitir nga “tungod sa gilapdon nga kining maong mga prinsipyo gisalikway, sayon ra ang pagtamay sa naglungtad nga hugpong sa internasyonal nga balaod.”

Una anaa ang bahin sa salapi. Sa 1993, ang mga gubat mikaylap sa 79 ka nasod. Saysentay-singko kanila maoy kabos nga mga nasod. Diin makakuha ug hinagiban kining kabos nga mga nasod nga ilang gigamit sa pagpakig-away? Kadaghanan gikan sa adunahang mga nasod. Ug kinsa ang nag-unang lima ka tigbaligyag armas ngadto sa nagakaugmad nga kalibotan? Ang lima ka permanenteng membro sa United Nations Security Council!

Kadtong Adunay Kahangawa

Siyempre, anaa kadtong nahangawa pag-ayo sa kahimtang sa kabataan panahon sa gubat. Ang mga indibiduwal ug mga organisasyon mahigugmaong nagtabang sa batan-ong mga biktima sa gubat. Pananglitan, ang mga Saksi ni Jehova, kinsa dili moapil sa gubat, nagbuhat niana. Apan ang pagwagtang sa pagbiktima sa kabataan panahon sa gubat sa pagkatinuod nagkahulogan ug pagwagtang sa gubat mismo, usa ka palaaboton nga morag dili mahitabo. Tungod sa taas nga kasaysayan sa katawhan sa pagdumtanay ug panagbangi, daghan ang mohinapos nga ang mga tawo dili gayod makapahinabo ug pakigdait sa tibuok yuta. Niining maong panglantaw, husto sila.

Ang mga tawo nanghinapos usab nga ang Diyos dili gayod mosalga sa mga kalihokan sa kanasoran o magpahinabog dumalayong pakigdait sa planeta. Niining panglantawa, sayop sila.

Ang atong Maglalalang, si Jehova nga Diyos, nahangawa pag-ayo bahin sa mga butang nga nagakahitabo sa yuta. Sa iyang Pulong, ang Bibliya, si Jehova nangutana: “May kalipay ba ako sa kamatayon sa tawong daotan . . . ug dili magapanghinaot hinuon nga siya mobalik gikan sa iyang dalan ug mabuhi?” Ang Diyos mabinationg nagtubag: “Wala akoy kalipay sa kamatayon sa usa nga himalatyon.”​—Ezequiel 18:23, 32.

Hunahunaa ra kana: Kon ang atong mabinationg Maglalalang nagtinguha nga bisan ang daotang mga hamtong maghinulsol ug magpahimulos sa kinabuhi, seguradong buot niya nga ang kabataan mabuhi ug magpahimulos usab sa kinabuhi! Bisan pa niana, ang atong mahigugmaong Diyos dili magtugot sa daotan sa walay kataposan. “Ang mga mamumuhat ug daotan mismo pagalaglagon,” nagsaad ang Pulong sa Diyos. “Sa dili madugay, ang daotan mangawala.”​—Salmo 37:9, 10.

Si Jesu-Kristo, kinsa hingpit nga nagsumbalik-silaw sa personalidad sa iyang langitnong Amahan, nahigugma sa kabataan ug nag-ingon nga “ang gingharian sa mga langit ilaha sa mga ingon kanila.” (Mateo 19:14) Ang paghalad ug kabataan ngadto sa mga diyos sa gubat dulumtanan alang kang Jehova nga Diyos ug sa iyang Anak, si Jesu-Kristo.​—Itandi ang Deuteronomio 18:10, 12.

Ang Saad sa Diyos nga Usa ka Masanag nga Kaugmaon

Ang Diyos nagtugot sa mga gubat ug pag-antos latas sa kasiglohan aron nga ang kamatuoran nga gisulti ni propetang Jeremias mapamatud-an sa walay kataposan: “Ako nasayod, Oh Jehova, nga ang dalan sa tawo wala diha sa iyang kaugalingon. Dili iya sa tawo nga nagalakaw ang pagtultol sa iyang lakang.” (Jeremias 10:23) Sa dili madugay, ang Bibliya nagasaad, si Jehova magbindikar sa iyang unibersohanong pagkasoberano pinaagi sa “pagpahunong sa mga gubat hangtod sa kinatumyan sa yuta.” (Salmo 46:9) Gitagna usab sa Bibliya ang panahon sa dihang “[ang mga tawo] maghimo sa ilang mga espada nga mga punta sa daro ug ang ilang mga bangkaw himoong mga galab. Ang nasod dili na mobakyaw sa espada batok sa usa ka nasod, ni makakat-on pa sila mahitungod sa gubat.”​—Isaias 2:4.

Unsay mahitabo niadtong nangamatay sa gubat? Aduna bay paglaom alang kanila? Si Jesus nagsaad ug pagkabanhaw sa mga patay ngadto sa yuta nga walay gubat, nga nag-ingon: “Ang takna nagasingabot diin kadtong tanan nga anaa sa handomanang mga lubnganan . . . managpanggula.” (Juan 5:28, 29) Sa susama, si apostol Pablo masaligong miingon: “Aduna unyay pagkabanhaw sa mga matarong ug sa mga dili-matarong.”​—Buhat 24:15.

Ang mga saad sa Diyos tinong moabot. Siya adunay gahom ug determinasyon sa pagtuman sa tanan niyang katuyoan. (Isaias 55:11) Sa dihang si Jehova moingon nga pahunongon niya ang gubat, tinuod kana. Sa dihang nagsaad siya nga banhawon kadtong nangamatay, buhaton niya kana. Sumala sa giingon sa manulondang si Gabriel, “sa Diyos walay kapahayagan nga maimposible.”​—Lucas 1:37.

[Hulagway sa panid 10]

Sa dihang wala nay gubat, ang tanang bata makapahimulos ug maayong kinabuhi