Gikan sa Among mga Magbabasa

Relihiyon ug Gubat Nagsulat ako aron ipahayag ang akong apresasyon sa matulon-anong serye nga naghisgot sa relihiyong nakiggubat. (Abril 22, 1997) Ang unang artikulo, “Pagpamatay sa Ngalan sa Diyos,” nakadani gayod sa akong pagtagad. Kini mubo ug direkta sa punto, ilabina sa dihang naghatag sa katarongan kon nganong si Jehova nga Diyos miuyon nga pamatyon sa karaang mga Israelinhon ang mga Canaanhon.

S. J., Tinipong Bansa

Sugilanon ni Ginger Klauss Pasultia ko ninyo nga nadasig gayod ako sa kasinatian ni Ginger Klauss nga, “Karon Ako Malipayon nga Nabuhi!” (Abril 22, 1997) Sama kaniya, nawad-an ako sa tanang pagsalig sa kaugalingon, nga mibating walay-pulos ug wala higugmaa. Sanglit wala makasagubang nianang maong mga pagbati, luhaan akong nagsulti sa Diyos kada adlaw nga buot ko nang mamatay. Giisip nako ang kamatayon ingong makapalipayng kahupayan. Apan usa ka adlaw niana ako miampo, “Kon imong kabubut-on, palihog hatagi akog pagdasig nga mabuhi.” Human gayod sa pag-ampo nianang paagiha, nadawat nako kining isyuha sa Pagmata! Sa dihang nakita nako kining artikuloha, akong nahunahuna nga gitubag sa Diyos ang akong pag-ampo. Akong nakat-onan gikan kang Ginger nga ang pagbaton ug katakos sa pagpasiaw ug dili paghunahuna pag-ayo sa kaugalingon makatabang sa paghupot ug positibong tinamdan. Tino akong makaingon nga kining maong magasin nakahatag kanako ug inspirasyon nga mabuhi.

M. K., Hapon

Bag-o pa lang nakong natapos pagbasa ang artikulo sa ikaunom nga beses, ug dili kana ang kataposan! Ako 21 anyos ug usa ka bug-os-panahong magwawali. Nakadayeg ako pag-ayo kang Ginger Klauss tungod sa kasibot niya sa buluhatong pagsangyaw bisan pag anaa kanunay sa wheelchair. Ang iyang kasinatian nagpalihok kanako sa paghimo sa tanan nakong maarangan sa pag-alagad kang Jehova.

S. Z., Italya

Walay kataposang pasalamat alang sa makapatandog nga kasinatian. Tungod sa kadaot sa kaunoran, naglubog ako sa banig sa dakong bahin sa matag adlaw, ug nasinati nako ang daghang kalisdanan sa pagtuman sa buluhatong pagsangyaw samtang anaa sa wheelchair. Ang kasinatian ni Ginger nakapadasig gayod kanako ug nakatabang kanako sa pag-atubang niadtong mga yugto nga ako naguol pag-ayo tungod sa akong balatian.

M. R., Italya

Nganong Masakiton Kaayo? Salamat sa artikulong “Mga Batan-on Nangutana . . . Nganong Masakiton Kaayo Ako?” (Abril 22, 1997) Ako 21 anyos ug adunay sickle-cell anemia. Masabtan nako ang mga pagbati sa mga batan-on niining artikuloha. Subsob akong maghunahuna kon aduna pa bay mahigugma kanako ug buot makigminyo kanako bisan pa sa pagkabaton nako niining suliran sa panglawas. Apan ang inyong artikulo nakatabang kanako tungod kay karon nahibalo ako nga wala ako mag-inusara sa pagbati ug ingon niini.

D. R., Tinipong Bansa

Dili-Magkabulag nga Managhigala Salamat sa kasinatian ni Anne-Marie Evaldsson. (Abril 22, 1997) Nakadayeg ako pag-ayo sa paagi nga kining maong sister nagpadayon sa pag-uswag sa espirituwal bisan pa sa iyang kabilinggan. Ang asoy nagpahunahuna kanako. Daghan kanamo wala makaapresyar kon unsay gihatag kanamo aron gamiton sa pag-alagad kang Jehova. Buot kong komendahan ang sister ug ang iyang maunongong higala. Pagkamaayong pananglitan!

R. A., Ecuador

Ang pagkahibalo nga ang usa ka tawo nga buta sa pisikal nagtrabaho, nakig-ambit sa balay-sa-balay nga ministeryo, nagdumalag mga panagtuon sa Bibliya, ug nagatambong ug Kristohanong mga panagkatigom matag semana makapadasig kaayo. Nakapabati kini kanako nga ang pagbuhat sa labing maarangan nako diha sa ministeryo, nga nag-una niana, maoy takos sa paningkamot. Ang bili sa espirituwal nga panan-aw labaw gayod. Hinumdoman nako si Anne-Marie Evaldsson uban sa lalom nga gugma ug apresasyon.

J. O., Nigeria