Gikan sa Among mga Magbabasa

Singapore Ang artikulong “Singapore​—Ang Nalubog nga Mutya sa Asia” (Hunyo 8, 1997) nagyagyag sa makapakugang nga paagi nga kining modernong kagamhanan nagtagad sa mahigugmaon sa kalinaw nga mga Kristohanon. Ako personal nga nakaila sa daghang Kristohanong lalaki ug babaye didto, ug silang tanan buotan, mahigugmaong mga tawo. Nakapadasig kanako nga sila nag-alagad kang Jehova bisan pa sa paglutos.

I. O., Malaysia

Kasuko Sa artikulong “Nganong Pugngan ang Imong Kasuko?” (Hunyo 8, 1997), kamo nag-ingon nga si Simeon ug Levi gitunglo sa ilang amahan. Aduna gayod akoy nabasa nga ang ilang kasuko mao ang gitunglo ni Jacob.

S. L., Tinipong Bansa

Ang among magbabasa husto niining bahina. “Ang Bantayanang Torre” sa Hunyo 15, 1962, mipatin-aw: “Si Jacob, sa iyang himalatyong kahimtang, wala magtunglo kang Simeon ug Levi mismo. Iyang gitunglo ang ilang kasuko, ‘tungod kay kana mabangis.’ Iyang gitunglo ang ilang kayugot, ‘tungod kay kini maharoson.’”​—ED.

Pagkaon Ang artikulong “Imong Pagkaon​—Makapatay ba Kini Kanimo?” (Hunyo 22, 1997) nagluwas sa akong kinabuhi. Human sa pagbasa niini, gisultihan ko ang akong asawa nga motawag dayon sa doktor, sanglit tukmang gihubit sa artikulo ang akong kahimtang. Human sa pag-eksamin kanako, gieskedyul ako sa akong doktor alang sa operasyon sa pagkasunod buntag. Dihadiha iya akong gipaospital, tungod kay siya nahadlok nga dili na ako mabuntagan nga buhi. Karon ako ania na sa balay, nga nagpaayo gumikan sa usa ka triple bypass.

F. S., Tinipong Bansa

Usahay, ang akong bana ug ako nalisdan sa pagkontrolar sa among gana sa pagkaon. Nabasa nako ang ubang mga artikulo bahin sa pagkaon, apan kini nga artikulo naghisgot sa mga butang diha sa yano ug praktikal nga paagi. Ako nakaseguro nga kon sundon ang inyong mga sugyot, among mabatonan kanunay ang maayong panglawas.

V. A., Brazil

Salamat sa mga seryeng “Ang Imong Pagkaon​—Kon Nganong Mabalaka.” Kini mitabang kanako nga masabtan ang mga risgo sa pagkasobra sa timbang. Gisugdan ko ang pagsunod sa tanang mga sugyot diha niini, ug sa tabang ni Jehova, nahibalo ako nga akong makontrolar ang akong pagkaon.

V. Y. D., Liberia

Mga Alindanaw Salamat kaayo sa bug-os makalingaw nga artikulo nga “Mga Mutya sa Tampi sa Suba.” (Hunyo 22, 1997) Kini naghisgot bahin sa usa sa paborito kong mga tigpasundayag sa kahanginan, ang alindanaw. Sa dihang ako magtrabaho sa akong hardin, usa ka alindanaw halos kanunayng maglupadlupad o magapahulay sa duol. Akong gipangutana ang usa ka tawo nga ang trabaho mao ang landscaping kon nganong ingon niini. Siya miingon nga ang pagkaon sa alindanaw nag-apil sa mga lamok ug nga ang mga lamok madani sa mga tawo. Busa karon akong gilantaw kining mabulokon nga linalang ingong personal nga guwardiya!

J. F., Tinipong Bansa

Pagpangitag Hustisya Ako nalingaw sa artikulong “Among Pagpangitag Hustisya.” (Hunyo 22, 1997) Ang matarong nga mga hiyas sa Diyos sa walay duhaduha makapadani niadtong nagbakho ug naghilak tungod sa mga inhustisya. Ako ilabinang sensitibo sa inhustisya, ug buhaton ko ang tinuoray nga panlimbasog sa pagpahiuyon sa akong mga hunahuna ug mga aksiyon sumala sa mga sukdanan sa Diyos.

D. L., Taiwan

Dili ako mouyon sa introduksiyon. Sa dihang kamo naghisgot sa taga-Texas nga mga tigdepensa sa Ang Alamo, wala kamo mag-ingon nga sila mga bandido nga nagsulay sa pagsakmit sa teritoryo nga sakop sa Mexico.

A. C., Mexico

Wala namo hisgoti ang komplikadong mga isyu nga nalangkit sa panag-away sa Ang Alamo, kay daw wala kiniy kalangkitan sa personal nga estorya ni Antonio Villa. Bisan pa niana, ang among Mayo 22, 1971, nga isyu sa “Pagmata!” nagsaysay: “Kadaghanan sa mga Amerikano nahikalimot, o wala sukad mahibalo, nga ang San Antonio maoy bahin sa Mexico. Giisip sa Mexico ang gubat sa Ang Alamo ingong pagtapos sa rebelyon sa teritoryo niini. Ang Amerika migamit niana . . . aron pakamatarongon ang iyang pagpanghilabot sa mga kalihokan sa Mexico.”​—ED.