Gikan sa Among mga Magbabasa
Sakit Ako natandog sa artikulong “Mga Batan-on Nangutana . . . Sa Unsang Paagi Masagubang Ko ang Grabeng Pagkamasakiton?” (Hunyo 22, 1997) Nakadayeg ako kang Jason, Ashley, ug Carmen sa pagdumala nga epektibo sa ilang mga sakit.
R. D., Pransiya
Ang tambag nga inyong gihatag maoy sa pagkamatuod praktikal, makadasig, ug epektibo. Ang estorya ni Ashley sa partikular nakadasig kanako. Usa ako ka bug-os-panahong ministro sa mga Saksi ni Jehova. Ang paghunahuna nga may mga tawo nga maikagon sa pagsulod sa bug-os panahong ministeryo apan dili makahimo tungod sa panglawas nagdasig kanako nga molahutay bisan sa akong mga kalisod.
D. I., Albania
Sukad sa pagkahibalo nga ako adunay Crohn’s disease, ako giadmit sa ospital kapin na sa napulo ka beses ug nanginahanglan ug duha ka operasyon. Bisan pa niana, sa milabayng upat ka tuig, ako nag-alagad sa hilit nga teritoryo dinhi sa usa ka langyaw nga nasod. Ug bisan pa nga ang akong panglawas sa gihapon dili pa himsog, dako kaayo ang pag-uswag niini. Ang mga artikulo usa ka dakong pagdasig kanako.
G. H., Ecuador
Nagakahanawng Kaihalasan Ako nagatuon ug zoology, ug ang seryeng “Kinsay Moluwas sa Atong Kahayopan?” nakatandog gayod kanako. (Hulyo 8, 1997) Naglaom ako nga ang mga tawo nga nagabasa niini nga mga artikulo makaamgo kon sa unsang paagi ang kahakog ug kabangis nakaapektar sa daghang espisye.
G. H., Tinipong Bansa
Ingong usa ka masibotong tigpaluyo sa kaihalasan, ako nalipay sa pagbasa sa inyong mga artikulo. Dako ang nahimo sa mga zoo sa pagtabang sa nameligrong mga espisye. Apan kon ang mga zoo mao ang kataposang paglaom sa kaihalasan, nan seguradong ang kaihalasan malisdan. Ang pagkuha sa mga mananap gikan sa ilang kinaiyanhong kalikopan ug pagpasanay kanila diha sa mga zoo sa siyudad dili mao ang sulbad.
M. T., Canada
Samtang ang maong mga paningkamot sa pagpatunhay maoy dalayegon, kami nagtuo nga ang bugtong malungtarong solusyon mao ang pagdumala sa mga kahinguhaan sa yuta pinaagi sa Gingharian sa Diyos. (Isaias 11:9)—ED.
Kahilwas sa Binuhi Buot kong magpasalamat sa inyong artikulong “Luwas ba ang Kabataan Uban sa Inyong Iro?” (Hulyo 8, 1997) Ako maoy usa ka propesyonal nga tigbansay ug iro sulod na sa 18 ka tuig ug kanunay nga naningkamot sa pagpasiugda sa kahinungdanon sa pagbansay ug personal nga responsibilidad. Ako nahingangha sa pagbasa niining matulon-anon nga artikulo ug nalipay sa pagkahibalo nga ang giinterbiyo nga tigbansay nagagamit ug samang matang sa pagbansay nga among gigamit. Naglaom ako nga ang tanang mga tag-iya ug iro mobasa ug mopadapat sa tambag.
B. C., Tinipong Bansa
Gusto kong modugang ug usa ka punto: Ang mga iro kinaiyanhong mosanong sa pagkaon. Ang bata nga nagawarawara ug hot dog o karmelitos samtang nagalakaw nga molabay sa iro mahimong usa ka puntirya. Wala tuyoa sa iro nga mahimong bangis, apan basin kini mokawhat sa pagkaon ug, nianang paagiha, mapaakan ang kamot sa bata. Ang mga ginikanan gitambagan ug maayo nga abagahon ang ilang responsibilidad niining butanga.
K. S., Tinipong Bansa
Among gipabilhan kining dugang mga obserbasyon.—ED.
Makadaot sa Panglawas nga mga Estilo sa Kinabuhi Akong gipabilhan ang artikulong “Makadaot sa Panglawas nga mga Estilo sa Kinabuhi—Unsa ka Taas ang Bili?” (Hulyo 22, 1997) Ingong usa ka Kristohanong batan-on, naatubang ko ang daghang mga tentasyon. Apan kini nga artikulo nagpaamgo gayod kanako nga pinaagi sa pagsunod sa mga prinsipyo sa Bibliya, atong malikayan ang mga sakit ug kadaot.
R. K., Tinipong Bansa
Nagasulting mga Tambol Human mabasa ang kahibulongang artikulong “Mosulti ba Gayod ang mga Tambol sa Aprika?” (Hulyo 22, 1997), miadto ako sa akong apohan nga lalaki, usa ka sentenaryo, aron sutaon ang katinuoran sa estorya. Iyang gipamatud-an kana sa matag detalye, ug ako nakadayeg!
G. M. O., Nigeria