Mga Batan-on Nangutana . . .

Kinsay Angayan nga Mahimong Akong Sumbanan?

“Ang iyang katakos ingong basketbolista maoy talagsaon. Ang tanan nakong mga higala nakagusto kaniya. Siya ang akong sumbanan, ug buot nakong mahisama kaniya ug makabaton sa iyang nabatonan.”​—Ping, usa ka batan-ong taga-Asia.

ANG mga tawo nga gidayeg ug gisundog kasagarang gitawag nga mga sumbanan. Ang awtor nga si Linda Nielsen nag-ingon: “Ang mga batan-on nagsundog sa mga tawo kansang mga pagbati ug mga ideya ilang masabtan ug giambitan ug kinsa nagdawat ug pagtagad o mga ganti nga gitinguha nila.” Busa, ang mga batan-on mokiling sa pagdayeg sa mga katalirongan nga popular o madanihon. Apan daghang batan-on ang ilabinang nadani sa mga bituon sa pelikula, mga musikero, ug mga atleta ingong mga sumbanan.

Siyempre, ang popular nga ideya bahin sa kadaghanang bantogang mga tawo kasagaran maoy maayong pagkahan-ay lamang nga tumotumo, usa ka mainampingong pagkahikay nga laraw nga gidisenyo aron sa pagtago sa mga depekto, pagdasig ug mga pag-ulog-ulog ug, labaw sa tanan, pagbaligya! Si Ping, nga gikutlo sa sinugdan, miangkon: “Gipalit nako ang tanang video sa akong idolo sa basketbol ug nagsul-ob sa iyang marka sa sinina ug mga sapatos.” Ang ubang mga batan-on magsinina sama sa ilang mga idolo sa TV ug esport, magpatupi sa ilang buhok sama sa ilang mga idolo, ug maglakaw ug magsulti pa gani nga sama sa ilang mga idolo.

Mga Sumbanan​—Maayo ug Daotan

‘Apan unsay daotan sa pagdayeg sa usa ka tawo?’ mangutana ka. Nagdepende kana kon kinsay imong gidayeg. Ang Bibliya nag-ingon: “Siya nga nagalakaw uban sa mga tawong maalamon mahimong maalamon, apan siya nga nakiglabot sa mga tawong buangbuang mahitumpawak sa kadaotan.” (Proverbio 13:20) Ang Bibliya wala magdasig kanato nga mahimong mga sumusunod sa mga tawo. (Mateo 23:10) Apan giingnan kita niini nga mahimong “mga tigsundog kanilang kinsa pinaagi sa pagtuo ug pailob nagapanunod sa mga saad.” (Hebreohanon 6:12) Ang magsusulat nianang mga pulonga, si apostol Pablo, nagpakitag maayong panig-ingnan alang sa unang mga Kristohanon. Busa, siya makaingon: “Magmahimong mga tigsundog kanako, sama gayod nga ako mao kang Kristo.”​—1 Corinto 11:1.

Usa ka batan-ong lalaki nga ginganlag Timoteo mihimo gayod niana. Naugmad niya ang suod nga panaghigala kang Pablo sa ilang misyonaryong mga panaw nga magkauban. (Buhat 16:​1-4) Si Pablo nag-isip kang Timoteo ingong iyang “hinigugma ug kasaligang anak diha sa Ginoo.” (1 Corinto 4:17) Uban sa tabang ni Pablo, si Timoteo nahimong maayong Kristohanong lalaki.​—Filipos 2:​19-23.

Apan, unsay mahitabo kon imong pilion ang sayop nga sumbanan? Usa ka batan-ong lalaki nga ginganlag Richard miingon: “Sa nag-edad ako ug 15, usa ka kauban sa tunghaan nga ginganlag Mario nahimong akong suod nga higala. Ang akong mga ginikanan maoy mga Kristohanon, ug naningkamot sila sa pagtabang kanako sa espirituwal. Apan si Mario nakabaton sa tanang kalingawan​—mga disko, parti, pagmotorsiklo, ug mga butang nga susama niana. Mabuhat niya ang iyang gusto, sa dihang gusto niya. Apan ako dili. Busa sa dihang ako 16 anyos, giingnan nako ang akong mga ginikanan nga buot nakong mohunong sa pagkahimong Kristohanon, ug mihunong gayod ako.”

Aduna bay susamang mga kapeligrohan sa paglantaw sa bantogang mga tawo ug mga idolo sa esport ingong mga sumbanan? Oo, aduna. Karon, walay daotan sa pagdayeg sa katakos sa usa ka atleta, artista, o musikero. Apan pangutan-a ang imong kaugalingon, ‘Unsang matanga sa panig-ingnan ang gipakita niining mga tawhana diha sa ilang personal nga mga kinabuhi?’ Dili ba ilado ang daghang idolo sa esports, mga musikero, ug ubang mga artista tungod sa ilang pagpatuyang sa seksuwal nga imoralidad, mga droga, ug alkoholikong ilimnon? Dili ba tinuod usab nga daghan ang nagkinabuhing dili malipayon, walay katagbawang mga kinabuhi, bisan pa sa ilang salapi ug kabantog? Sa dihang lantawon nimo ang mga butang gikan niini nga punto de bista, unsang kaayohan ang mosangpot sa pagsundog sa maong mga tawo?

Tinuod, ang pagsundog sa estilo sa buhok, mga sinina, o sinultihan sa usa ka bantogang tawo morag gamayng butang lamang. Apan mahimong kana maoy unang lakang sa pagtugot sa kalibotan sa “pag-umol kanimo sa hulmahan niini.” (Roma 12:​2, Phillips) Ang maong hulmahan mahimong morag maanindot sa sinugdan. Apan kon ikaw bug-os nga magpadala sa impluwensiya niini, kini makahulma kanimo sa mga paagi nga seguradong maghimo kanimong kasumpaki sa Diyos. “Ang pakighigala sa kalibotan maoy pakigdumot sa Diyos,” nag-ingon ang Bibliya sa Santiago 4:4.

Kon sa Unsang Paagi ang Maayong Sumbanan Makatabang Kanimo

Apan, ang pagsundog sa usa ka tawo nga nagpakitag maayong panig-ingnan mahimong adunay positibong epekto sa imong kinabuhi! Taliwala sa mga isigka-Kristohanon, daghan ang imong makaplagan nga “panig-ingnan . . . sa pamulong, sa panggawi, sa gugma, sa pagtuo, sa kaputli.” (1 Timoteo 4:12) Tinuod, kinahanglang mag-amping ka sa pagpili ug kaubanan, bisan diha sa Kristohanong kongregasyon. (2 Timoteo 2:​20, 21) Apan kasagaran dili lisod ang pag-ila kon kinsa diha sa kongregasyon ang tinuod nga “nagalakaw diha sa kamatuoran.” (2 Juan 4) Ang prinsipyo sa Hebreohanon 13:​7 nag-ingon: “Sa mamalandong kamo kon unsay ginasangpotan sa ilang panggawi sundoga ang ilang pagtuo.” Alang sa kadaghanan sa imong mga katalirongan, tan-awon pa kon unsay sangpotanan sa ilang panggawi. Apan adunay mga tigulang diha sa kongregasyon nga nakapamatuod na sa ilang pagkamatinumanon, ug maalamon nga masinati sila.

‘Sination ang mga tigulang?’ mangutana ka tingali. Ibutang ta, dili tingali kini kaayo makapahimuot sa sinugdan. Apan hinumdomi ang relasyon ni Timoteo sa iyang tigulang nga higalang si apostol Pablo. Nakita ni Pablo ang potensiyal ni Timoteo ug nagdasig kaniya nga “sugniban sama sa kalayo ang gasa sa Diyos.” (2 Timoteo 1:6) Dili ba mapuslanon nga adunay usa ka tawo nga motabang kanimo ug modasig kanimo, usa ka tawo nga moaghat kanimo sa pagpalambo sa imong hinatag sa Diyos nga mga gasa?

Usa ka batan-on nga ginganlag Bryan nakakaplag nga mapuslanon kini. Nakigbisog siya sa mga pagbati nga ubos sa dihang nakaila niya ang tigulang, ulitawong ministeryal nga alagad diha sa kongregasyon. Matod ni Bryan: “Akong gidayeg ang iyang mahigugmaong kabalaka sa uban, lakip kanako; ang iyang kasibot sa ministeryo; ug ang iyang maayo kaayong mga pakigpulong.” Si Bryan nakapahimulos na gikan sa personal nga pagtagad nga iyang nadawat gikan niining tigulang nga Kristohanon. Siya madayganong miangkon: “Nakatabang kini kanako sa pagbag-o gikan sa kon unsa ako kaniadto​—usa ka maulawon ug walay kadasig nga personalidad.”

Mga Ginikanan Ingong mga Sumbanan

Ang librong Adolescence​—Generation Under Pressure nag-ingon nga ang mga ginikanan mao “ang bugtong labing hinungdanong panggawas nga impluwensiya sa pag-abag o pagbabag sa aberids nga batan-on nga makabaton ug maayong kinaiya.” Kon wala kanang tin-awng kaamgohan sa direksiyon ug kinaiya, ang libro midugang, ang mga batan-on “mahimong sama sa walay timon nga barko, mag-usab-usab sa dulnganan sa matag hapak sa balod.”

Kining tambaga nagsumbalik-silaw sa gisulat ni disipulo Santiago kapin sa 1,900 ka tuig kanhi, ingon sa gitala sa Santiago 1:​6: “Papadayona siya sa pagpangayo diha sa pagtuo, sa wala gayoy pagduhaduha, kay siya nga nagaduhaduha maoy samag balod sa dagat nga ginahandos sa hangin ug ginapadpad-padpad.” Lagmit nakaila ka ug pipila ka batan-on nga ingon gayod niana. Mokiling sila sa pagkinabuhi alang sa mga kahinam karong adlawa, nga wala maghunahuna sa ugma.

Gipanalanginan ka ba ug mahinadlokon sa Diyos nga mga ginikanan nga nagpakitag maayong mga panig-ingnan diha sa kongregasyon? Kon mao, ikaw ba nagpailalom sa ilang impluwensiya? O ikaw ba nakig-away kanila sa tanang panahon? Tinuod, ang imong mga ginikanan dili hingpit. Apan ayaw pagpakabuta sa ilang maayong mga hiyas​—mga hiyas nga maayong sundogon nimo. “Nakadayeg kaayo ako sa akong mga ginikanan,” misulat ang batan-ong Kristohanon nga ginganlag Jarrod. “Ang ilang malahutayong kasibot diha sa ministeryo, ang paagi nga ilang giatubang ang kalisdanan sa ekonomiya, ug ang pagdasig nga gihatag nila kanako sa pagpakig-ambit sa bug-os-panahong ministeryo, ngatanan adunay maayong epekto kanako. Ang akong mga ginikanan kanunayng akong mga sumbanan.”

Ang Kinamaayohang Sumbanan

Sa dihang ang Gallup nga surbi nga organisasyon nangutana sa pipila ka batan-on sa Tinipong Bansa kon kinsay ilang gihunahuna nga labing bantogang tawo sa kasaysayan, ang kadaghanan mipili ug Amerikanong mga politiko. Sayis porsiyento lamang ang mipili kang Jesu-Kristo. Apan, ang Bibliya nagtug-an kanato nga si Jesu-Kristo nagbilin ug hingpit nga “sulondan aron [atong] sundon pag-ayo ang iyang mga tunob.” (1 Pedro 2:21; Hebreohanon 12:3) Gidasig niya ang iyang mga tinun-an sa pagkat-on gikan kaniya. (Mateo 11:​28, 29) Apan sa unsang paagi mahimo nimo kana?

Sinatia pag-ayo ang kinabuhi ni Jesus. Paningkamoti ang pagbasa sa tibuok nga mga asoy sa Ebanghelyo, duyog sa librong Ang Labing Bantogang Tawo nga Nabuhi Sukad.a Panid-i ang paagi sa pagtudlo ni Jesus, ang mabinationg paagi nga nakiglabot siya sa katawhan, ug ang kadasig nga iyang gipakita sa dihang nailalom sa pagpit-os. Imong makaplagan nga si Jesus mao ang kinamaayohang sumbanan nga posible nimong masunod.

Kon mas masinati ka sa hingpit nga sumbanan, dili ka kaayo madani sa dili-maayong mga katalirongan o bantogang mga tawo. Nakahinumdom ka ba kang Ping ug sa iyang pagdayeg sa usa ka idolo sa esport? Malingaw gihapon si Ping sa dula nga basketbol matag karon ug unya, apan iyang nasabtan nga binuang ang pagsundog sa bantogang mga tawo.

Ug komosta si Richard? Ang iyang pagpili ug sumbanan misangpot sa iyang pagtalikod sa Kristohanong pagtuo. Bisan pa niana, nakaila ni Richard ang usa ka batan-ong lalaki nga nagpangedarog 20 anyos, ginganlag Simon, nga usa sa mga Saksi ni Jehova. “Nakighigala si Simon kanako,” matod ni Richard, “ug mitabang kanako sa pagkasabot nga ang usa makapahimulos sa kinabuhi bisan dili ikompromiso ang mga prinsipyo sa Bibliya. Naugmad dayon nako ang pagtahod kang Simon, ug ang iyang panig-ingnan adunay dakong bahin sa akong pagbalik sa kongregasyon ug pagpahinungod sa akong kinabuhi kang Jehova. Mas malipayon ako karon, ug ang akong kinabuhi adunay tinuod nga kahulogan.”

Oo, ang imong pagpili ug mga sumbanan hinungdanon gayod!

[Footnote]

[Hulagway sa panid 13]

Ang pagpakig-uban sa dungganong mga tigulang makatabang kanimo