Gikan sa Among mga Magbabasa

Internet Nagtuon ako ug inhenyeriya sa kompiyuter, ug buot kong pasalamatan kamo sa seryeng “Ang Internet​—Alang ba Kini Kanimo?” (Hulyo 22, 1997) Ang mga artikulo maoy laktod, matulon-anon, ug tukma sa siyensiya. Wala ninyo iduso ang walay kapuslanang pagpihig ug kabalaka nga naglibot sa Internet. Sa laing bahin, wala ninyo itago ang tinuod nga mga kapeligrohan.

L. E., Italya

Nagtudlo ako ug mga saring sa kompiyuter, ug aron mabatonan ko kanunay ang labing bag-ong impormasyon, ako kasagarang mopalit ug mga magasin nga nalangkit sa kompiyuter. Walay usa ang may igong kaisog nga hisgotang prangka ang mahitungod sa mga bentaha ug mga disbentaha sa Internet.

A. A. S., Brazil

Sa dili pa dugay daghan ako ug nadunggan bahin sa Internet, apan wala nako hisabti kini sa tin-aw. Ang inyong serye nagpatin-aw sa ulohan sa yano kaayo ug sa paagi nga daling masundan.

A. H., India

Kamo nagsulat sa paagi nga bisan ang mga magbabasa nga may diyutay o walay kahibalo sa World Wide Web daling makasabot. Mitabang usab kamo kanamo sa paghunahuna ug pagtimbangtimbang sa gasto sa paggamit niini nga serbisyo.

E. K., Etiopia

Pagkahimong Mabasol Ako 15 anyos, ug ang artikulong “Mga Batan-on Nangutana . . . Nganong Ako ang Kanunayng Sad-an?” (Hulyo 22, 1997) nagpadaligdig sa mga luha sa akong nawong. Ako ang kinamanghoran sa pamilya ug kanunayng gibasol. Salamat sa pagsulat mahitungod niini.

N. H., Tinipong Bansa

Rift Valley Nahimuot gayod ako sa pagbasa, sa makadaghan, sa artikulong “Ang Great Rift Valley.” (Hulyo 22, 1997) Sama kadto ug pagbiyahe sa safari. Nagtrabaho ang akong bana sa Aprika, ug nakabiyahe ako sa habagatang bahin sa Tanzania. Nagtan-aw kanunay ako sa bentana sa among Land Rover. Ang tanan buhi kaayo ug mabulokon sa Aprika; natisok kini sa akong hunahuna.

B. S., Canada

Nagmalamposong mga Anak Buot kong pasalamatan kamo sa talagsaong serye nga “Tabangi ang Inyong mga Anak nga Molampos.” (Agosto 8, 1997) Nakaplagan ko kining mapuslanon kaayo ug makapadasig. Ako may tres-anyos nga batang lalaki, ug kining artikuloha mitabang kanako sa pagsabot sa iyang panglantaw ug sa pagpauswag sa paagi sa akong pagdisiplina kaniya. Gipadangat ko ang akong dakong pasalamat kang Jehova alang niini nga mga artikulo.

P. S., Italya

Natandog ako pag-ayo sa artikulong “Haras nga mga Pulong, Kahiubos.” Sa tibuok nakong kinabuhi ako mahukmanon kaayo sa akong kaugalingon. Nahimuot ako sa pagkakaplag nga imbes grabeng mohukom, ikaw mahigugmaong maningkamot sa pagtabang sa tanan niadtong kinsa milahutay sa daghang pag-antos. Hinaot si Jehova padayong magapanalangin kaninyo ug motultol sa pagsulat sa mga artikulong mapuslanon kaayo ug makapahupay.

L. D., Canada

Naglaom ako nga ang mga artikulo magpahigmata sa uban sa lintunganayng hinungdan sa daghang sulodnong kasamok nga giantos sa daghan kanato. Salamat sa paghisgot niining ulohana.

L. B., Tinipong Bansa

Ang mga artikulo nga sama niini nagtabang kanako sa pagtuman sa akong buluhaton ingong usa ka magtutudlo sa tunghaang nursery sa mas maayong paagi. Daghang salamat sa paghatag kanamo ug bag-ong impormasyon kanunay ug sa pagtabang kanamo nga molambo.

G. R., Mexico

Ang mga artikulo naghatag kanako ug paglaom. Ako naggikan sa dili sulondang pamilya ug sagad nakakaplag nga lisod nga mobating takos sa pag-alagad kang Jehova ug sa pag-atiman sa akong gamayng batang babaye. Maningkamot ako kutob sa akong mahimo sa pagpadapat sa mga sugyot sa artikulo. Salamat sa paghatag ug pagtagad.

A. A., Tinipong Bansa