Haduol na ang Kataposan sa Kakabos

UNSAY buot ipasabot ni Jesus sa dihang siya miingon: “Kanunayng anaa uban kaninyo ang mga kabos”? (Mateo 26:11) Ang buot ba niyang ipasabot nga ang kakabos maglungtad hangtod sa hangtod, nga walay bisan unsang solusyon?

Si Jesus nahibalo nga basta magpabilin pa ang presenteng sistema sa tawhanong pagmando, aduna gayoy kakabos. Siya nahibalo nga kini dili gayod sa dumalayon mawagtang pinaagi sa bisan unsang matang sa tawhanong kagamhanan o bisan unsang ekonomikanhon o sosyal nga sistema. Ug ang rekord sa kasaysayan nagpamatuod niini.

Sa tibuok nga kaliboan ka tuig sa tawhanong kasaysayan, nasulayan ang tanang matang sa kagamhanan ug tanang matang sa ekonomikanhon ug sosyal nga sistema, bisan pa niana ang kakabos ania gihapon kanato. Sa pagkatinuod, bisan pa sa kauswagan sa mga natad sama sa siyensiya, industriya, ug medisina, ang mapait nga kamatuoran mao nga sa tibuok-kalibotan ang gidaghanon sa mga tawong nalaang sa kakabos padayon nga nagtaas.

Si Jesus nahibalo gayod bahin sa daghang butang nga makapatunghag kakabos, sama sa kagutom, hulaw, mga pag-atake sa mga kasundalohan sa kaaway, dili maayong kagamhanan, dili maayong pagkadumalang mga ekonomiya, paglupig sa mga kabos ug sa mga mahuyang pinaagi sa mga sapian ug gamhanan, mga aksidente ug sakit, ug kamatayon sa mga bana nga nagbilin ug timawang mga ilo ug mga biyuda. Dugang pa, siya nahibalo nga ang tawo makahatag ug kakabos sa ilang kaugalingon ug sa ilang mga pamilya pinaagi sa dili maayong mga batasan sama sa pagkatapolan, paghuboghubog, pagsugal, ug pagkagiyan sa droga.

Busa sa dihang si Jesus miingon nga “kanunayng anaa uban kaninyo ang mga kabos,” maoy iyang gipasabot nga saylo na sa katakos sa bisan unsang mga ahensiya sa kalibotan ang pagwagtang sa kakabos. Ang iyang gipasabot mao nga basta naglungtad pa ang presenteng sistema sa tawhanong pagmando, aduna gayoy mga tawong kabos.

Bisan pag karaan nang problema ang kakabos, dili kita angay mohinapos nga bisan si Jesus o ang iyang langitnong Amahan walay kaluoy sa mga kabos. Ni angay kitang mohinapos gikan sa mga pulong ni Jesus nga ang kakabos dili gayod matapos. Matin-aw kini sumala pa sa giingon sa Bibliya bahin niining butanga.

Kakabos ug ang Moisesnong Kasugoan

Pananglitan, tagda ang Kasugoan nga gihatag sa Diyos sa karaang nasod sa Israel pinaagi kang Moises. Ang usa ka tagana sa Kasugoan mao nga hatagan ang matag Israelinhong pamilya ug usa ka panulondong yuta sa Canaan. (Deuteronomio 11:​8-15; 19:​14) Ang bugtong nga walay panulondon mao ang mga Levihanon, nga walay madawat nga pahat. Hinunoa, tungod sa ilang linaing trabaho sa templo, sila nabuhi pinaagi sa pagkadawat sa ikanapulo sa produkto sa yuta.​—Numeros 18:​20, 21, 24.

Lain pa, ang mga kasugoan sa panulondon ilalom sa Moisesnong Kasugoan nagpaseguro nga ang yuta padayong huptan sa pamilya o tribo nga maoy gihatagan niini. (Numeros 27:​8-11) Bisan pag gibaligya sa usa ka tawo ang iyang yuta, mahimong mapanag-iya kini sa bag-ong tag-iya nga temporaryo lamang. Sa ngadtongadto ang yuta ibalik ngadto sa pamilya sa usa nga nagbaligya niana.

Alang niadtong nangahimong kabos sa nagkalainlaing mga hinungdan, sama sa dili maayong pagkadumala sa ilang yuta o pagwaldaswaldas sa ilang mga kahinguhaan, ang Kasugoan naghatag ug garantiya sa katungod sa paghagdaw sa pagkaon diha sa kaumahan, mga prutasan, o mga parasan sa uban. (Levitico 23:22) Dugang pa, ang usa ka nanginahanglang Israelinhon makahulam ug kuwarta nga dili na kinahanglan mobayad ug tanto. Sa pagkamatuod, ang espiritu sa pagkamahinatagon angay ipakita ngadto sa kabos.​—Exodo 22:25.

Si Jesus Nahingawa sa mga Kabos

Sa mga siglo sa ulahi sa dihang mianhi si Jesus sa yuta, siya nagpadayon sa pagpasundayag sa espiritu sa pagkamahinatagon nga iyang nakat-onan gikan sa iyang Amahan, si Jehova. Nagpakitag personal nga interes si Jesus sa mga tawong kabos sa materyal. Siya ug ang iyang mga tinun-an adunay komon nga pondo nga gikan niini sila nanghatag sa nanginahanglang mga Israelinhon.​—Juan 12:​5-8.

Human nga gipatay si Jesus, ang samang kahangawa sa mga kabos gipakita sa mga Kristohanon sa dihang nagtagana silag materyal nga tabang ilabina ngadto sa ilang mas kabos nga espirituwal nga mga igsoong lalaki ug babaye. (Roma 15:26) Ang matuod nga mga Kristohanon karong adlawa nagpakitag samang mahigugmaong kahingawa sa usag usa.

Siyempre, ang Bibliya, samtang nagpahayag ug kaluoy sa mga biktima sa malupigong mga kahimtang, nagabadlong niadtong si kinsa, sa pagkamatuod, ‘nagakaon sa ilang kaugalingong unod’ tungod sa pagkatapolan. (Ecclesiastes 4:​1, 5) Si apostol Pablo nagsulat: “Kon adunay dili buot motrabaho, ayaw usab siya pakan-a.” (2 Tesalonica 3:10) Sa susama, kadtong nagwaldaswaldas sa mga pondo diha sa mga batasan sama sa droga, tabako, o pagkagiyan sa alkohol makakaplag sa ilang kaugalingon nga kabos. Kini maoy resulta sa ilang kaugalingong dili maayong mga aksiyon; sila sa aktuwal ‘nagaani sa ilang gipugas.’​—Galacia 6:7.

Kasegurohan Karon

Ang Bibliya nagpakita nga ang Diyos naghatag ug linaing kaikag sa kahimtang niadtong naningkamot sa pagtuman sa iyang kabubut-on. Pananglitan, diha sa Salmo 37:​25, si David nag-ingon: “Nabata ako kaniadto, ug ako natigulang na, apan wala ako makakita ug tawong matarong nga gibiyaan, ni nagpakilimos ug tinapay ang iyang kaliwat.” Kadtong kiling sa pagkamatarong wala saari ug bahandi, apan gipakita dinhi nga tinoon sa Diyos nga sila adunay igong materyal nga mga tagana aron mabuhi. Ug ang bersikulo 28 sa mao gihapong salmo nag-ingon: “Si Jehova mahigugmaon sa hustisya, ug siya dili magabiya sa iyang mga maunongon.”

Si Jesus naghimo ug labaw pa kay sa pagpakitag kabalaka sa kabos pinaagi sa pagtabang kanila sa materyal nga paagi panahon sa iyang kinabuhi sa yuta. Iyang gipasaligan sila nga basta sila maningkamot sa pagtuman sa kabubut-on sa Diyos, tinoon sa Diyos nga labing menos ang ilang ginagmayng mga panginahanglan matagan-an, sa presente ug sa umaabot. Si Jesus miingon sa mosunod:

“Panid-i pag-ayo ang mga langgam sa langit, tungod kay wala sila magapugas ug binhi o magaani o magatigom ngadto sa mga balay-tipiganan; sa gihapon gipakaon sila sa inyong langitnong Amahan. Dili ba nagabili man kamo ug labaw kay kanila? . . . Usab, bahin sa pamesti, nganong mabalaka man kamo? Kuhai ug pagtulon-an ang mga liryo sa banika, kon giunsa nila pagtubo; wala sila magabudlay, ni magakalinyas; apan ako magaingon kaninyo nga bisan si Solomon sa tanan niyang himaya wala masul-obig ingon sa usa niini. Kon, karon, ang Diyos sa ingon nagabesti sa katanoman diha sa banika, nga ania karong adlawa ug ugma isalibay ngadto sa hudno, dili ba labaw gayod hinuon nga iya kamong pagabestihan, kamo nga gamayg pagtuo? Busa ayaw gayod pagkabalaka ug moingon, ‘Unsa may among kan-on?’ o, ‘Unsa may among imnon?’ o, ‘Unsa may among isul-ob?’ . . . Kay nahibalo ang inyong langitnong Amahan nga gikinahanglan ninyo kining tanang butanga.”​—Mateo 6:​26-32.

Si Jesus mihinapos pinaagi sa pag-awhag sa iyang mga sumusunod: “Nan, padayong pangitaa nga una ang gingharian [sa Diyos] ug ang iyang pagkamatarong, ug kining tanang ubang mga butang idugang kaninyo.” (Mateo 6:33) Pagkamaayong pagdasig kini alang niadtong mga kabos apan naningkamot sa pagtuman sa kabubut-on sa Diyos! Matikdi, usab, nga si Jesus nagpakita nga ang Gingharian sa Diyos kinahanglan nga mao ang labing hinungdanong butang sa mga kinabuhi sa iyang mga sumusunod. Si Jesus nahibalo nga sa dihang ang langitnong Gingharian sa Diyos mao nay bug-os nga magmando ibabaw sa tibuok yuta, nan​—ug ayha pa​—mawagtang ang kakabos.

Dili Magauban Kanato Hangtod sa Hangtod

Busa, si Jesus naghatag ug usa ka katingalahang paglaom alang sa umaabot. Busa sa dihang siya miingon “kanunayng anaa uban kaninyo ang mga kabos,” ang iyang gipunting mao ang kinabuhi ilalom sa presenteng sistema sa tawhanong pagmando. Wala siya magpunting sa kinabuhi sa umaabot ilalom sa pagmando sa langitnong Gingharian sa Diyos. Ang Bibliya nagtagna: “Dili sa kanunay hikalimtan ang kabos, ni ang paglaom sa mga maaghop mawala.” (Salmo 9:18) Ug ingong Hari sa Gingharian sa Diyos, dili tugotan ni Kristo Jesus ang si bisan kinsa nga mosulay sa pagpahimulos ug paglupig sa uban.

Gihimo ni Jesus ang pagmando sa langitnong Gingharian sa Diyos nga mao ang dugokang tema sa iyang pagpanudlo. (Mateo 4:17) Ilalom sa pagmando sa Gingharian, ang mga kahimtang sa yuta magsalamin, o magbanaag, sa mga kahimtang sa langit. Maoy hinungdan nga iyang gitudloan ang iyang mga sumusunod sa pag-ampo sa Diyos: “Paanhia ang imong gingharian. Ipahinabo ang imong kabubut-on, maingon sa langit, nganhi usab sa yuta.”​—Mateo 6:10.

Sa unsang paagi kana mahitabo? Maoy katuyoan sa Diyos ang pagpapha sa tibuok presenteng sistema sa tawhanong pagmando gikan sa yuta ug pulihan kini sa pagmando sa iyang langitnong Gingharian. Ang tagna diha sa Daniel 2:​44 nag-ingon: “Sa mga adlaw niadtong mga haria [nga naglungtad karon] ang Diyos sa langit magtukod ug usa ka gingharian nga dili gayod malumpag. Ug ang gingharian mismo dili igapasa sa bisan kinsang tawo [wala nay tawhanong pagmando]. Kini magadugmok ug magaut-ot sa tanan niining [presenteng] mga gingharian, ug kini magpabilin sa walay kataposan.”

Unya, diha sa bag-ong kalibotan ilalom sa pagmando sa Gingharian sa Diyos, ang tibuok yuta pagahimoon nga usa ka paraiso sa kadagaya, nga walay lama sa kakabos. Matikdi ang pipila ka tagna sa Bibliya bahin sa mga kahimtang nga maglungtad nianang panahona:

“Si Jehova sa mga panon maghikyad alang sa tanang katawhan . . . ug usa ka kombira sa pinalugdang nga mga bino, sa mga pagkaon nga matambok nga puno sa utok sa bukog.” (Isaias 25:6) “Adunay daghang lugas sa yuta; sa ibabaw sa kabukiran adunay pag-awas.” (Salmo 72:16) “Moabot ang mga ulan sa panalangin. Ug ang kahoy sa kapatagan mohatag sa iyang bunga, ug ang yuta mohatag sa iyang abot, ug sila magapuyo sa ilang yuta diha sa kasegurohan.” (Ezequiel 34:​26, 27) “Ang yuta magahatag sa iyang bunga; ang Diyos, atong Diyos, magapanalangin kanato.” (Salmo 67:6) “Ang kamingawan ug ang mala nga yuta magmasadya, ug ang kamingawan magkalipay ug mamulak sama sa rosas.”​—Isaias 35:1.

Dugang pa, ang Miqueas 4:​4 nagsaad: “Sila manglingkod, ang tagsatagsa ka tawo ilalom sa iyang paras ug ilalom sa iyang kahoyng igos, ug walay magahadlok kanila.” Ang tanan makabaton ug ilang kaugalingong mga balay: “Sila magatukod ug mga balay ug magapuyo niini . . . Sila dili magatukod ug unya lain ang magapuyo.” (Isaias 65:​21, 22) Dili ikahibulong nga si Jesus nakasaad niadtong kinsa nagtuo sa iyang mga pagtulon-an: “Ikaw magauban kanako sa Paraiso”!​—Lucas 23:43.

Oo, ang kaugalingong dinasig nga Pulong sa Diyos klarong nagtudlo nga adunay bug-os nga kataposan sa kakabos. Ug kanang panahona nagkahiduol na, kay ang mga tagna sa Bibliya nagpakita nga kining kalibotana anaa na karon sa “kataposang mga adlaw” niini, nga nagaagom ug “makuyaw nga mga panahong lisod sagubangon.” (2 Timoteo 3:​1-5, 13) Sa dili madugay ang presenteng sistema sa mga butang pagawagtangon sa walay kataposan ug ang kakabos paphaon sa dumalayon​—dili pinaagi sa tawhanong mga paningkamot kondili pinaagi sa pagpangilabot sa Diyos. Ang Haring Jesu-Kristo “magaluwas sa kabos nga nagapangayog tabang, usab sa sinakit ug bisan kinsa nga walay magtatabang. Siya maluoy sa usa nga timawa ug usa nga kabos, ug ang mga kalag sa mga kabos iyang pagaluwason.”​—Salmo 72:​12, 13.

[Hulagway sa panid 8, 9]

Sa bag-ong kalibotan sa Diyos, adunay maayong pamalay ug abundang pagkaon alang sa tanan

[Hulagway sa panid 10]

Sa bag-ong kalibotan, wala na gayoy gutom nga kabataan