Ang Akong Pagpili Tali sa Duha ka Amahan

“Dili ko na ikaw ilhong anak! Layas dayon niining balaya, ug ayaw pagbalik hangtod talikdan na nimo kanang relihiyona!”

NGA tapot sa lawas lamang ang sinina, ako mibiya. Ang mga kanyon nagbutobuto palibot sa kasilinganan niadtong gabhiona, ug wala akoy nahunahunaang kapaingnan. Kapin sa unom ka tuig ang milabay una ako mipauli sa balay.

Unsay nakapalagot pag-ayo sa usa ka amahan nga iyang palayason ang iyang kaugalingong anak? Aw, pasaysaya ko kon sa unsang paagi nagsugod kining tanan.

Pagdako Diha sa Tugob-sa-Pagdumot nga Kalibotan

Ang akong mga ginikanan nagpuyo sa Beirut, Lebanon, usa ka nasod nga ilado kanhi ingong duawanan sa mga turista. Apan, sukad sa 1975 hangtod sa 1990 ang siyudad maoy sentro sa malaglagong gubat. Natawo ako sa 1969, ang panganay sa usa ka Armenianong pamilya nga may tulo ka anak. Busa, ang akong unang mahinumdoman mao ang mga panahon sa kalinaw.

Ang akong mga ginikanan sakop sa Armenianong Apostolikong Iglesya, apan si Mama magdad-anan kanamo sa simbahan kaduha lamang sa usa ka tuig​—panahon sa Semana Santa ug sa Pasko. Busa ang among pamilya dili gayod kaayo relihiyoso. Bisan pa niana, gipatungha ako sa usa ka Evangelical nga hayskul, diin nakadawat ako ug relihiyosong pagtudlo. Sa maong panahon, ang relihiyon wala gayod makapainteres kanako.

Usa ka butang nga nakat-onan sa daghang Armeniano sa pagkabata mao ang pagdumot sa mga Turk. Panahon sa Gubat sa Kalibotan I, gipatay sa mga Turk ang gatosan ka libong Armeniano ug gisakop ang kinadak-ang bahin sa nasod sa Armenia. Sa 1920 ang sidlakang bahin nga nagpabilin nahimong republika sa Unyong Sobyet. Ingong usa ka batan-on, determinado akong makigbisog aron sa pagtino nga makab-ot ang hustisya.

Kausaban sa Panghunahuna

Apan, sa katuigang 1980, sa dihang ako nag-edad ug 16 anyos, ang mga butang nga gisulti kanako sa akong uyoan sa bahin sa inahan nagsugod pag-usab sa akong panghunahuna. Siya miingon nga ang Labing Gamhanang Diyos sa dili madugay magtul-id sa tanang inhustisya. Siya misaysay nga pinaagi sa Gingharian nga gitudlo ni Jesu-Kristo sa iyang mga sumusunod nga iampo, bisan kadtong gipangmasaker pagabanhawon ngadto sa kinabuhi dinhi sa yuta.​—Mateo 6:​9, 10; Buhat 24:​15; Pinadayag 21:​3, 4.

Nahinam ako. Sanglit gustong makadungog ug dugang pa, nagpadayon ako sa pagpangutana kaniya. Kini mitultol sa usa ka pagtuon sa Bibliya, nga gihimo sa balay sa laing Saksi.

Samtang nakakat-on ako bahin sa akong langitnong Amahan, si Jehova, ug nahigugma kaniya nga labi pa, nagsugod ako sa pagkahadlok nga usa ka adlaw niana ako moatubang ug malisod nga desisyon​—kanang pagpili tali sa akong pamilya ug kang Jehova nga Diyos.​—Salmo 83:18.

Malisod nga Pagpili Alang sa Usa ka 17-Anyos

Ngadtongadto, nasayran ni Mama ang akong kalangkitan sa mga Saksi ni Jehova. Nasuko kaayo siya ug gibaoran ako nga hunongon ang akong pagtuon sa Bibliya. Sa dihang iyang naamgohan nga ako seryoso sa akong mga gituohan, mibahad siya nga tug-anan si Papa. Niadtong panahona, wala ako mabalaka tungod kay sa akong hunahuna madumala nako ang situwasyon ug mobarog ako batok kang Papa. Apan nasayop ako.

Sa dihang nasayran ni Papa nga ako nakig-uban sa mga Saksi ni Jehova, naglagot siya. Gibaharan niya ako nga palayason sa balay kon dili ako mohunong sa akong pagtuon sa Bibliya. Ako siyang giingnan nga dili nako kana hunongon tungod kay ang akong ginatun-an mao ang kamatuoran. Pagkatapos sa iyang pagpaninghag, pagsinggit, ug pagpamalikas, misugod siya paghilak samag bata. Sa literal nga paagi nagpakiluoy siya nga mohunong ako sa pagpakig-uban sa mga Saksi ni Jehova.

Nabahin ang akong pagbati, nabahin tali sa duha ka amahan​—si Jehova ug siya. Nasayod ako nga silang duha nahigugma pag-ayo kanako, ug buot nakong pahimut-an silang duha; apan morag imposible. Ang pagpit-os dili nako maantos. Akong giingnan si Papa nga buhaton nako ang iyang gusto, nga nangatarongan sa kaugalingon nga magtuon ako pag-usab ug mag-Saksi sa dihang ako mohamtong na. Nag-edad pa lang ako niadto ug 17 anyos.

Sulod sa mga adlaw nga misunod, naulaw ako sa akong gibuhat. Akong gibati nga si Jehova wala malipay ug nga wala ako mosalig sa mga pulong ni salmistang David, kinsa miingon: “Kon ang akong amahan ug ang akong inahan mobiya kanako, bisan si Jehova mismo modawat kanako.” (Salmo 27:10) Apan hayskul pa lang ako, ug ang akong mga ginikanan maoy naggasto sa akong edukasyon.

Mas Lig-ong Pagbarog

Sulod sa kapin sa duha ka tuig, wala ako moduaw sa akong uyoan o makigkontak sa mga Saksi, sanglit nasayod ako nga ang akong mga ginikanan nagbantay sa akong matag lihok. Usa ka adlaw sa 1989, sa edad nga 20, nahibalag nako ang usa ka Saksi nga akong kaila. Maluloton kaayo siyang nangutana nako kon gusto ba nakong duawon siya. Sanglit wala siya maghisgot bahin sa pagtuon sa Bibliya, ngadtongadto nakigkita ako kaniya.

Sa paglabay sa panahon, nagsugod ako pagtuon sa Bibliya ug pagtambong sa mga tigom sa mga Saksi ni Jehova diha sa Kingdom Hall. Nagtuon ako sa akong trabahoan, diin walay makatugaw kanako. Ingong resulta, mas naapresyar nako ang mahigugmaong personalidad ni Jehova maingon man mas nasabtan ang kabililhon sa pagbaton ug paghupot ug suod nga relasyon uban kaniya ilalom sa bisan unsang mga sirkumstansiya. Sa Agosto sa mao gihapong tuig, misugod pa gani ako sa pagpaambit sa uban kon unsay akong nakat-onan.

Hangtod nianang panahona wala mahibalo ang akong pamilya. Apan, pipila ka adlaw sa ulahi ang akong amahan ug ako nag-atubangay na usab, apan niadtong panahona mas andam na ako alang sa harongay. Misulay siya sa pagpangutana kanako nga kalmado: “Anak, tinuod ba nga nakig-uban ka gihapon sa mga Saksi ni Jehova?” Nanglugmaw ang mga luha sa iyang mata samtang gipaabot niya ang akong tubag. Ang akong inahan ug igsoong babaye naghilak sa hilom.

Akong gisaysay nga bag-o pa lang akong nakig-uban sa mga Saksi ug nga ako determinadong mahimong usa kanila. Niana, kalit kaayo ang mga panghitabo. Gisinggit ni Papa kadtong mga pulonga nga makita sa sinugdanan niining artikuloha. Unya kalit niya akong gikuptan ug misinghag nga dili niya ako pagulaon sa balay nga buhi. Nakalingkawas ako, ug samtang nagdagan ako pagkanaog sa hagdan, nadungog nako ang akong manghod nga lalaki nga naglukmay kang Papa. “Sukad karon ikaw na ang akong Amahan,” ako miampo kang Jehova. “Gipili ta ka, busa palihog atimana ako.”

Mga Panimalos

Pipila ka adlaw sa ulahi, miadto si Papa sa balay sa akong uyoan, nga naghunahunang makaplagan niya ako didto. Giatake niya siya ug buot siyang patyon, apan ang pipila ka Saksi nga miduaw mipakgang. Mibiya si Papa, nga nagbahad nga mobalik. Sa wala madugay mibalik siya, nga inubanan sa mga sundalo nga armadog mga pusil. Ilang gidala ang mga Saksi ug ang akong uyoan, nga masakiton kaayo, ngadto sa ilang hedkuwarter sa militar.

Human niadto gipangita ang ubang mga Saksi sa maong dapit. Ang balay sa usa kanila gisulong usab. Ang mga libro, lakip ang mga Bibliya, gitapok diha sa karsada ug gipanunog. Apan dili kay kana ra. Unom ka Saksi ang gipanakop maingon man ang pipila ka tawo nga nagtuon lamang uban kanila. Ang tanan gibutang sa usa ka gamayng lawak, gisukitsukit, ug unya gikulata. Ang uban gipasoan sa sigarilyo. Ang balita bahin niining hitaboa mikaylap dayon sa kasilinganan. Ang mga sundalo nangita kanako bisag asa. Gihangyo sila sa akong amahan nga pangitaon ako ug pausbon ako sa akong hunahuna, bisan unsa pay paagi nga ilang gamiton.

Pipila ka adlaw sa ulahi, ang mga sundalo mikalit pagsulod sa Kingdom Hall, diin usa sa mga kongregasyon ang nagtigom. Gipagawas nila sa tigomanan ang tibuok kongregasyon​—mga lalaki, mga babaye, ug mga bata. Gikompiskar nila ang ilang mga Bibliya ug gipalakaw sila ngadto sa hedkuwarter sa kasundalohan, diin sila gisukitsukit.

Pag-ikyas Ngadto sa Gresya

Niadtong panahona, giatiman ako sa usa ka pamilya sa mga Saksi nga halayo gikan sa nahitaboan sa kagubot. Usa ka bulan sa ulahi mibiya ako sa nasod padulong sa Gresya. Pag-abot didto, akong gipahinungod ang akong kinabuhi kang Jehova nga Diyos ug nabawtismohan ingong simbolo sa akong pahinungod.

Sa Gresya gibati nako ang mahigugmaong pag-atiman sa usa ka espirituwal nga panag-igsoonay nga naglakip sa mga tawo gikan sa ubay-ubayng nasyonalidad​—lakip sa mga Turk. Akong nasinati ang kamatuoran sa mga pulong ni Jesus: “Walay usa nga nagbiya ug balay o mga igsoong lalaki o mga igsoong babaye o inahan o amahan o mga anak o kaumahan tungod ug alang kanako ug tungod ug alang sa maayong balita nga dili makabaton ug usa ka gatos ka pilo karon niining yugtoa sa panahon, mga balay ug mga igsoong lalaki ug mga igsoong babaye ug mga inahan ug mga anak ug kaumahan, nga may mga paglutos, ug sa umaabot nga sistema sa mga butang kinabuhing walay-kataposan.”​—Marcos 10:​29, 30.

Sa misunod nga tulo ka tuig, nagpabilin ako sa Gresya. Bisan tuod misulat ako kang Papa sa makadaghan, wala gayod siya motubag. Sa ulahi giingnan ako nga kon ang mga higala mobisita ug mangomosta kaniya bahin kanako, siya moingon: “Wala akoy anak nga ingon niana ang ngalan.”

Pag-uliay Human sa Unom ka Tuig

Mibalik ako aron mopuyo sa Beirut sa 1992, human sa gubat. Pinaagi sa usa ka higala, akong gipahibalo ang akong amahan sa akong tinguha nga mopauli sa balay. Siya mitubag nga ako dawaton​—apan kon ako lamang talikdan ang akong relihiyon. Busa nagpuyo ako sa inabangang apartment sulod sa misunod nga tulo ka tuig. Unya, sa Nobyembre 1995, si Papa kalit lang misulod sa akong trabahoan ug mihangyo nga makigkita kanako. Wala ako didto niadtong panahona, busa nagbilin siya ug mensahe nga buot niyang mopauli ako sa balay. Sa sinugdan nalisdan ako sa pagtuo. Busa, nagpanuko kaayo, nakigkita ako kaniya. Tugob kadto sa pagbati nga pag-uliay. Siya miingon nga dili na siya mosupak sa akong pagka-Saksi ug buot niyang mopauli ako sa balay!

Karon nag-alagad ako ingong Kristohanong ansiyano ug usa ka bug-os-panahong ministro sa nagsultig-Armenian nga kongregasyon. Subsob akong makahibalag ug mga tawo nga sama sa akong amahan nga mosupak sa mga membro sa pamilya tungod kay sila buot moalagad kang Jehova. Akong naamgohan nga si Papa hugot nga nagtuo nga husto ang iyang gibuhat nga pagsupak sa akong pagsimba. Ang Bibliya nag-andam pa gani sa mga Kristohanon pinaagi sa pag-ingon nga madahom nila ang pagsupak sa pamilya.​—Mateo 10:​34-​37; 2 Timoteo 3:12.

Ako naglaom nga usa ka adlaw niana ang akong amahan ug ang uban pa sa akong pamilya makig-ambit sa akong paglaom sa Bibliya bahin sa umaabot nga mas maayong kalibotan. Unya wala nay gubat o mga masaker, ug ang mga tawo dili na abogon gikan sa ilang kaugalingong mga nasod o lutoson tungod sa pagkamatarong. (2 Pedro 3:13) Ug unya ang mga tawo dili na mamili tali sa duha ka butang nga gimahal pag-ayo sa ilang mga kasingkasing.​—Tinampo.