Ang Pagpangayog Pasaylo sa Serip

Si Tom Will Lane mao ang serip nga giasoy ni Edward Michalec diha sa Disyembre 22, 1996, nga artikulo sa “Pagmata!” nga “Gipalig-on sa Pag-atubang sa mga Pagsulay sa Unahan.” Sa estorya, si Michalec misaysay:

“Ang serip sa Wharton, Texas, T.B.A., naglagot pag-ayo. Nagdala kanako sa bilanggoan sa ikaupat nga higayon, siya misinghag: ‘Nganong dili ka man mosunod sa mando?’

“‘Ako may bug-os nga katungod sa pagbuhat niini,’ ako mitubag dihadiha. Kini nagpasamot pa sa kalagot sa serip, ug siya nagbunal kanako pinaagig batuta. Ang ubang mga serip miduyog, naghapak kanako sa mga puloan sa ilang mga pistola.”

Dili pa dugay si Mary Perez, usa ka babaye nga nagtrabaho alang kang Serip Lane sa sayong bahin sa katuigang 1960, misulat: “Siya nahibalo nga ako usa sa mga Saksi ni Jehova. Iyang gisulti kanako kon sa unsang paagi iyang gilutos si Ed Michalec. Mihangyo siya kanako nga sultihan ang ubang mga Saksi nga siya nagbasol sa iyang mga binuhatan. Siya miingon nga siya walay alamag sa kamatuoran nga ang mga Saksi maoy buotan, masinundanon-sa-balaod nga mga tawo. Siya tim-os nga nagbasol.”

Midugang si Mary: “Bisan kon ang serip namatay pipila na ka tuig kanhi, ako naglaom nga kining sulata magpahayag sa iyang pagpangayog pasaylo.”

Dayon iyang gihubit kon sa unsang paagi siya nahimong usa ka Saksi: “Ang paglutos kang Igsoong Michalec nahitabo sa sayong bahin sa katuigang 1940. Tungod niini ako determinado nga maminaw sa mga Saksi sa dihang sila modangat sa akong pultahan. Wala magdugay among gisugdan ang pagtuon sa Bibliya. Ang akong bana ug ako nabawtismohan sa 1949.”

Kini mao lamay laing panig-ingnan nga naghulagway sa layog-abot nga epekto diha sa kinabuhi sa uban sa pagbarog sa usa ka tawo sa Kristohanong mga prinsipyo. Pila man, pananglitan, ang dulot nga natandog sa maisogong pagbarog ni Pedro ug sa ubang mga apostol sa unang siglo?​—Buhat 5:​17-29.

[Mga hulagway sa panid 31]

Si Ed Michalec ug Mary Perez, sa katuigang 1940