Magmapilion sa Kalingawan

Unsa ang epekto sa kalingawan diha sa kabataan? Si Alvin Poussaint, usa ka edukador ug doktor nga nakatrabaho uban sa mga bata sa mga 30 ka tuig, kombinsido nga ang pagtan-aw ug mga pelikula nga dunay sekso ug kapintasan nagtudlo sa mga batan-on nga normal ang maong paggawi. Iya usab nga gipaila ang lain pang kapeligrohan: “Akong nakita ang mga bata nga mopauli sa balay gikan sa maong mga sine nga nahimong mahadlokon​—o hilabihan ka agresibo. Nakita nako ang uban nga mibalik sa pagpangapyot o pagsupsop sa kumagko o pagpangihi sa higdaan.” Sumala niini nga doktor, ang mga eksperto nakadokumento sa ubang mga hitabo nga makapahinabo sa maong mga paggawi​—pisikal o seksuwal nga pag-abuso o pagpuyo sa usa ka dapit nga dunay gubat, sa paghisgot lamang sa pipila. “Walay usa kanato ang motuyo sa pagbutang sa usa ka bata sa maong mga kahimtang,” siya nagpatin-aw, “apan dili kita molihok sa pagpugong kanila sa pagtan-aw ug mga sine maylabot sa mga butang nga makapalisang kanato nga makita nila sa tinuod nga kinabuhi.”

Ang mga Kristohanon adunay maayong katarongan nga magmapilion ug maneguro nga ang kalingawan nga ilang pilion wala maglapas sa mga prinsipyo sa Bibliya. Pananglitan, ang Salmo 11:5 nag-ingon: “Si Jehova mismo nagsusi sa usa nga matarong maingon man usab sa usa nga daotan, ug ang bisan kinsa nga nahigugma sa kapintasan ginadumtan gayod sa Iyang kalag.” Ug ang Kristohanong apostol Pablo misulat: “Busa, patya ang inyong mga sangkap sa lawas nga anaa sa yuta maylabot sa pakighilawas, pagkadili-hinlo, seksuwal nga gana, makadaot nga tinguha, ug hakog nga pangibog . . . Isalikway gayod kining tanan gikan kaninyo, kapungot, kasuko, pagkadaotan, maabusohong sinultihan, ug law-ayng sulti gikan sa inyong baba.”​—Colosas 3:5, 8.

Busa, ang mga ginikanan angayng magmabinantayon nga ang kalingawan nga ilang pilion para sa ilang mga anak​—ug para sa ilang kaugalingon mismo​—wala magpasiugda sa “mga buhat sa unod.” (Galacia 5:19-21) Angay silang magmapilion, nga naghatag pagtagad sa kalidad ug gidaghanon sa ilang kalingawan.​—Efeso 5:15-17.