Ang Abilidad sa Pagdani

UNSAY tumong sa komersiyal nga panganunsiyo? Ang mga pamatigayon nag-ingon nga ang ilang panganunsiyo nagtagana ug serbisyo publiko tungod kay naghatag kini kanato ug impormasyon mahitungod sa ilang mga produkto. Ang International Advertising Association nag-ingon: “Aron tukmang mahibalo ang Tiggamit nagkinahanglag panganunsiyo. Ang may-kahibalong pagpili pinasikad sa impormasyon. Ang panganunsiyo​—sa kinasangkarang diwa niini​—mao ang hinungdanong paskinan sa maong impormasyon tali sa Tiggama ug sa Tiggamit.”

Siyempre, nasayod kitang tanan nga ang maong panganunsiyo labaw pag mahimo kay sa pagpahibalo lamang​—ang tuyo niini mao ang pagbaligya. Kini may gidapigan o dili neyutral. Ang malamposong mga anunsiyo mahanasong naglinga sa hunahuna sa tiggamit ug nagpalihok kaniya sa pagpalit sa produkto nga gianunsiyo.

Dugang pa, ang panganunsiyo wala lamang magbaligyag mga produkto; kini nagbaligyag mahalong mga etiketa. Kon ikaw usa ka dakong tiggama ug sabon, dili ka mogastog minilyong dolyar sa panganunsiyo sa pagdasig sa mga tawo nga mopalit ug bisan unsa lamang nga sabon. Buot nimong mopalit sila sa imong sabon. Buot nimo ang mga anunsiyo nga sa usa ka paagi makapakombinsir sa publiko nga ang imong mahalong marka sa sabon mas maayo kay sa uban.

Ang Gitumong nga mga Tawo

Aron mahimong epektibo, ang usa ka anunsiyo kasagarang mainampingong itumong sa usa ka pundok sa mga tawo, mga bata man, mga asawa, mga magpapatigayon, o uban pang grupo. Ang mensahe gidisenyo aron mapukaw ang labing gikaikagan sa maong pundok. Unya ang anunsiyo ipatik o isibya sa palaumagian sa balita nga labing epektibong makaabot kanila.

Sa dili pa disenyohon ang usa ka anunsiyo, himoon ang makuti nga panukiduki aron sa pagsusi kon unsang grupoha sa mga tawo ang kalagmitan kaayong mopalit ug mogamit sa produkto nga gianunsiyo. Ang mga tig-anunsiyo kinahanglang mahibalo kon kinsa kining mga tawhana, kon sa unsang paagi sila naghunahuna ug naggawi, kon unsay ilang gitinguha ug gipangandoy. Misulat ang usa ka propesyonal nga tig-anunsiyo: “Naningkamot kami pag-ayo sa pagsusi sa tukma kon kinsay among gitumong sa mga eslogan. Kon kinsa sila, kon hain sila magpuyo, kon unsay ilang ginapalit. Ug kon nganong gipalit nila ang produkto. Ang pagkahibalo niining tanan maghatag kanamo ug mga impormasyon nga magamit sa pagsulat ug makadaning mga mensahe sa pagbaligya. Ang mga tawo nga among gitumong mosanong sa pagdani; dili sila mosanong sa hinambog nga mga pulong, sa among kaugalingong mga intereses, o sa mga anunsiyo nga samag mga pulong nga gipana nga walay tumong ngadto sa hangin.”

Ang mga Elemento sa Pagdani

Sa paggama sa usa ka anunsiyo, ang mainampingong pagpahayag sa mga pulong maoy hinungdanon. Ang panglana, o hinobrang pagdayeg, maoy kasagaran. Ang usa ka sereal sa pamahaw giingon nga “primera klase,” ug ang usa ka kompaniya sa pahalipay nga kard nag-angkon nga ang mga tawo mopalit sa mga kard niini kon “buot nilang mopadala sa kinamaayohan.” Bisan tuod dili kanunayng sayon ang pag-ila sa kalainan tali sa paglana ug sa tinuyong pagpanglimbong, ang mga tig-anunsiyo kinahanglang mag-amping nga dili maghimog mga pangangkon nga ikapanghimakak sa kapamatud-ang mga impormasyon. Ang pipila ka gobyerno dunay mga balaod nga nagdili sa maong pagkadili-matinud-anon, ug ang mga pamatigayon mokiha dayon kon ang ilang mga intereses mameligro sa malimbongong mga anunsiyo sa mga kakompetensiya.

Sa dihang ang usa ka produkto halos pareho sa lain, limitado ang mga pangangkon nga mahimo sa tig-anunsiyo, busa kasagarang diyutay ra o wala gayoy mensahe. Daghan ang nagpaila sa ilang mga produkto pinaagig makadani sa pagtagad nga mga eslogan. Pipila ka pananglitan: “Palita na lang kana” (usa ka mahalong marka sa sapatos nga gamiton sa pagdagan), “Pamahaw sa mga kampeyon” (usa ka sereal sa pamahaw), “Imo kanang kuwarta, pangayog de kalidad” (usa ka matang sa kotse), ug “Anaa ka sa maayong mga kamot” (usa ka kompaniya sa seguro).

Ang makitang mga mensahe, sa magasin man o sa telebisyon, dunay gamhanang mga sugyot nga saylo pa sa aktuwal nga giingon bahin sa produkto. Ang paagi nga ang usa ka produkto gipresentar mahimong magpasa sa ideya sama sa, ‘Kon mopalit ka niining reloha, tahoron ka sa mga tawo’ o ‘Kining maong marka sa karsones nga maong maghimo kanimong mas madanihon sa kaatbang nga sekso’ o ‘Kining kotseha makapasina sa imong mga silingan.’ Sa usa sa labing ilado ug labing malamposong mga kampanya sa panganunsiyo, usa ka kompaniya sa sigarilyo naglangkit sa mga kowboy sa produkto niini. Ang mga kowboy gihulagway ingong kusgan, matso, mga tawong may awtoridad. Ang wala isulting mensahe: Panigarilyo sa among sigarilyo, ug mahisama ka niining dinayeg nga mga tawo sa aksiyon.

Dugang pa sa inalistong mga pulong ug makitang mga hulagway, ang musika hinungdanon sa mga komersiyal sa radyo ug telebisyon. Kini magpukaw sa mga pagbati, magpanindot sa kahimtang sa usa ka anunsiyo, motabang sa paghimo nianang dili-makalimtan, ug magpauswag sa mga tinamdan sa tiggamit ngadto sa produkto.

Ang magasing World Watch nag-ingon: “Ang kinamaayohang pagkahimong mga anunsiyo maoy mga obra maestra​—nga nagkombinar sa makapahinganghang mga paghulagway, pagkilab lang, ug maagdahong paagi sa pagsulti aron sa pagtandog sa atong kinailadmang mga kahadlok ug mga kapritso. Ang mga komersiyal sa telebisyon sa oras sa gabii nga adunay kinadaghanang tumatan-aw sa industriyal nga mga nasod nagsiksik ug mas daghang sugyot sa usa ka minuto kay sa bisan unsang namugna kanhi.”

Pagpukaw sa Katarongan ug Galamhan

Ang mga anunsiyo mainampingong gidisenyo aron sa pagpukaw sa espesipikong mga tinguha ug mga prinsipyo sa gitumong nga tawo. Tingali ang usa ka anunsiyo magpukaw sa panginahanglan nga maglingawlingaw, sa kusganong tinguha sa kasegurohan, o sa pangandoy nga dawaton sa uban. Tingali ang anunsiyo itumong sa usa ka tinguha aron magpadayeg sa uban, nga mahimong hinlo, o mamatikdan nga lahi. Ang ubang mga anunsiyo nagduso sa ilang mga produkto pinaagi sa pagpukaw sa atong mga kahadlok. Pananglitan, usa ka kompaniya sa iglimugmog nagpasidaan bahin sa mga kapeligrohan sa bahong gininhawa: “Bisan ang imong kinasuorang higala dili mosulti kanimo” ug, “Kanunayng mahimong bridesmaid, dili gayod mahimong pangasaw-onon.”

Usahay sayon ra ang pagtan-aw sa usa ka anunsiyo ug pag-analisar sa matang sa pangdani niini. Ang ubang mga anunsiyo gitumong ilabina sa nagahunahuna, nangatarongan, lohikong bahin sa atong mga kaisipan. Kini nagtanyag ug tin-awng impormasyon bahin sa usa ka produkto. Usa ka pananglitan mao ang karatula nga nagpahibalo kanimo nga ang isda sa pagkakaron ginabaligya nga katunga sa kanhing presyo niini. Ang laing pamaagi mao ang pagpresentar ug makadaning argumento. Kining matanga sa anunsiyo mangatarongan tingali nga dili ka lamang makadaginot ug salapi sa isda nga nagkantidad ug katunga sa kanhing presyo kondili kini laming kaonon ug magtaganag daghang sustansiya alang kanimo ug sa imong pamilya.

Ang ubang anunsiyo gidisenyo aron sa pagpukaw sa atong galamhan. Pananglitan, ang mga komersiyal nga nag-apektar sa pagbati nagpukaw sa galamhan pinaagi sa paglakip ug maanindot nga paghulagway diha sa produkto. Ang mga tiggama ug mga kosmetiko, sigarilyo, ug alkoholikong ilimnon nag-agad pag-ayo niining paagiha. Ang ubang mga komersiyal naggamit ug pagsublisubli. Kining agresibong paagi gipasikad sa panghinaot nga kon ang mga tawo makadungog ug mensahe sa igong gidaghanon, sila motuo niana ug mopalit sa produkto, bisan pag dili nila gusto ang anunsiyo mismo! Mao kiniy hinungdan kon nganong subsob natong makita ang mga anunsiyo nga balikbalik nga nagrekomendar sa mao gihapong produkto. Ang mga kompaniya sa tambal nga dili-kinahanglag reseta kasagarang naggamit niining paagiha.

Ang mga anunsiyo nga nagsugo magpukaw usab sa atong mga galamhan. Kini nga mga anunsiyo direktang nagsulti kanato sa pagbuhat ug usa ka butang: “Imna kini!” “Palit na karon!” Ang mga anunsiyo nga nagsugo gihunahunang mosaler pag-ayo sa mga produkto nga nahibaloan na ug nagustoan na sa mga tawo. Daghan kaayong anunsiyo ang nasakop sa lain pang kategoriya. Kini maoy mga anunsiyo nga nag-awhag nga sundogon, o naghatag ug mga pamatuod sa kaayohan niini. Kini nga mga anunsiyo nagpresentar sa ilado o madanihong mga tawo nga naggamit o nagrekomendar sa produkto nga buot sa tig-anunsiyo nga paliton nato. Kining maong pagpukaw sa galamhan gipasikad sa ideya nga buot natong mahisama sa mga tawo nga atong ginadayeg. Ang nanigarilyong kowboy maoy pananglitan niining matanga sa anunsiyo.

Makadani sa Pagtagad

Namatikdan ba nimo nga mahimong maanad ka na sa usa ka kanunayng-presente nga baho o kasaba nga halos wala na nimo kana mamatikdi? Ang susama nahitabo sa panganunsiyo.

Sumala sa magasing Business Week, ang ordinaryong Amerikano naladlad sa mga 3,000 ka komersiyal nga mga mensahe matag adlaw. Unsay sanong sa mga tawo? Dili sila manumbaling, sa literal o mental nga paagi. Sa kinamaayohang pagkasulti, kadaghanang tawo dili kaayo magtagad sa mga paanunsiyo.

Aron mabuntog ang pagkadili-matinagdanon sa tumatan-aw, ang mga paanunsiyo kinahanglang makapainteres kanato. Ang mga komersiyal sa telebisyon nagpasundayag ug makapahinganghang mga talan-awon. Naningkamot sila nga mahimong makalingaw, makapahinuklog, kataw-anan, makalibog, o emosyonal. Ilang gipasundayag ang iladong mga tawo ug maanindot nga mga karakter sa cartoon. Daghan ang naggamit sa pagbati aron makuha ang atong pagtagad, tingali pinaagi sa pagsentro sa pagtagad diha sa mga iring, mga itoy, o mga masuso.

Sa dihang ang usa ka tig-anunsiyo nakadani na sa atong pagtagad, kinahanglang makuha niya ang atong interes sa igong gidugayon aron makamatikod kita sa produkto nga ginatanyag. Ang malamposong mga anunsiyo dili lamang maglingaw; kini maningkamot sa pagdani kanato nga mopalit.

Kana, sa mubo, maoy paagi nga nagalihok ang panganunsiyo. Karon susihon nato ang gahom niini.

[Blurb sa panid 6]

Ang ordinaryong Amerikano naladlad sa mga 3,000 ka komersiyal nga mga mensahe matag adlaw

[Kahon sa panid 5]

Mga “Zapper,” “Zipper,” ug “Grazer”

Ang remote control sa telebisyon maoy galamiton batok sa mga paanunsiyo. Daghan ang mopalong (zap), o mopahilom, sa usa ka anunsiyo pinaagi sa pagpislit sa mute nga boton. Ang uban magrekord sa mga programa diha sa mga videotape ug sa dihang ipasalida kana pag-usab palabyon (zip) ang mga anunsiyo pinaagi sa pagpislit sa fast-forward nga boton. Ang uban magbalhinbalhin (graze), nga nagpasabot nga magbalhinbalhin sila gikan sa usa ka estasyon ngadto sa lain aron malikayan ang mga anunsiyo. Ang batid nga mga tigbalhinbalhin nahibalo kon unsa ka dugay ang paghunong sa salida alang sa komersiyal, ug mobalik sila sa programa nga ilang ginatan-aw sa dihang mahuman na ang anunsiyo.

Ang mga tig-anunsiyo naningkamot nga dili pagngon ang ilang mga anunsiyo pinaagi sa paghimog mga anunsiyo nga makadani sa pagtagad​—kadtong dihadiha makadani sa interes sa tumatan-aw ug makakuha niana. Ang laang sa pagmugnag mapasundayagong mga anunsiyo mao nga ang mga tawo mahinumdom tingali sa anunsiyo apan dili sa produkto nga gianunsiyo.

[Kahon sa panid 6]

Panganunsiyo nga Gitumong sa Wala-Maghunahunang Bahin sa Hunahuna

Sa ulahing bahin sa katuigang 1950, si James Vicary nangangkon nga naghimog pagtuon diha sa usa ka sinehan sa New Jersey, T.B.A., diin ang mga pulong nga “Inom ug Coca-Cola” ug “Kaon ug Popcorn” gipakita diha sa eskrin panahon sa salida. Ang mga mensahe makita nga wala pay usa ka segundo, nga mubo ra kaayo nga dili matisok diha sa nagahunahuna nga bahin sa hunahuna. Bisan pa niana, sumala kang Vicary, kini miresulta sa pagdaghan sa nahaling Coca-Cola ug popcorn. Kining maong pangangkon misangpot sa kaylap nga pagtuo nga ang mga tig-anunsiyo makapalihok sa mga tawo sa pagpalit sa mga butang pinaagi sa pagpagula ug “wala” makitang mga mensahe. Human gikataho nga mipirmag mga kontrata sa kantidad nga $4.5 milyon uban sa kinadak-ang mga tig-anunsiyo sa Amerika, si G. Vicary nahanaw. Ang mga tig-anunsiyo nabiktima sa usa ka panikas. Ang sunodsunod nga pagtuon nagyagyag sa kabakakan sa mga pangangkon ni Vicary.

Matod pa sa usa ka dugay nang ehekutibo sa panganunsiyo: “Dili mosaler ang panganunsiyo nga gitumong sa wala-maghunahunang bahin sa hunahuna. Kon misaler pa, gigamit unta namo kana.”

[Hulagway sa panid 7]

Ang mga komersiyal gidisenyo aron sa pagdani sa atong pagtagad