Aids—Unsay Paglaom Alang sa Umaabot?
GAWAS pa sa kakulang sa mga medisina sa pagtambal o pagsanta sa HIV nga impeksiyon, ang ubang mga hinungdan mopugong sa pagsumpo sa sakit. Usa niini mao nga daghang tawo, nga dili andam nga mag-usab sa ilang estilo sa kinabuhi, andam nga magpameligro nga matakboyan. Pananglitan, sa Tinipong Bansa ang gidaghanon sa gitakboyan mao ra gihapon, bisan pa sa pag-us-os sa gidaghanon sa mga tawo nga dunay grabeng AIDS. Ang hinungdan nga gisugyot sa Associated Press mao nga “daghang tawo ang wala magpatalinghog sa mga pasidaan bahin sa pagsanta.”
Sa nagaugmad nga mga nasod sa kalibotan, diin gikataho nga anaa ang mga 93 porsiyento niadtong gitakboyan sa HIV, dunay dugang mga suliran sa pagsukol sa sakit. Daghan niining mga nasora kabos kaayo nga dili makatagana bisan sa sukaranang mga serbisyo sa pag-atiman sa panglawas. Bisan pag ang bag-ong mga medisina mabatonan nianang mga nasora—ug kasagarang dili—ang presyo sa usa ka tuig nga pagtambal mokantidad ug kapin kay sa kitaon sa daghang tawo sa tibuok kinabuhi!
Bisan pa niana, ibutang ta nga nahimo ang usa ka bag-o, barato nga medisina nga makaayo gayod sa sakit. Ang mao bang medisina makaabot sa tanan nga nagkinahanglan niana? Lagmit dili. Kada tuig, sumala sa United Nations Children’s Fund, mga upat ka milyong bata ang nangamatay gumikan sa lima ka sakit nga masanta pinaagi sa barato, naglungtad nga mga bakuna.
Komosta ang mga tawong gitakboyan nga nagpuyo sa mga nasod diin dili sila makakuha ug mga medisina alang sa pagtambal? Si Ruth Mota, sa International Health Programs sa Santa Cruz, California, mitabang sa pag-organisar ug mga programa sa pagsanta ug pag-atiman sa HIV diha sa daghang nagaugmad nga mga nasod. Siya nag-ingon: “Gikan sa akong kasinatian, ang positibong tinamdan sama ka hinungdanon sa pagkamabatonan sa tambal. Nakaila ko ug mga tawo nga nagkinabuhi uban sa HIV sulod sa 10 ngadto sa 15 ka tuig ug kinsa wala gayod makatomar ug tambal. Ang mga tambal mapuslanon, apan labaw pa ang nalangkit sa pagtambal kay sa pagpasulod ug mga kemikal sa imong lawas. Naglangkit kini sa tinamdan, pagpaluyo sa katilingban, espirituwalidad, ug nutrisyon.”
Duna Unyay Solusyon
Duna bay katarongan sa pagtuo nga ang AIDS mabuntog usa ka adlaw niana? Oo, aduna. Ang kinamaayohang paglaom anaa sa mga pulong sa gitawag sa daghan nga Pag-ampo sa Ginoo o ang Amahan Namo (Paternoster). Sa maong pag-ampo, nga gisulat diha sa basahon sa Bibliya sa Mateo, gipangayo nato nga ang kabubut-on sa Diyos matuman dinhi sa yuta maingon sa langit. (Mateo 6:9, 10) Dili kabubut-on sa Diyos nga ang mga tawo hasolon sa balatian sa walay kataposan. Ang Diyos magtubag nianang pag-ampoa. Sa paghimo niana, wagtangon niya dili lamang ang AIDS kondili ang tanang ubang mga sakit nga naghasol sa katawhan. Unya, “walay molupyo nga moingon: ‘Ako masakiton.’”—Isaias 33:24.
Kasamtangan, ang kinamaayohang estratehiya mao ang pagsanta. Alang sa daghang sakit, dunay duha ka kapilian: Masanta nimo kana o tingali matambalan kana. Sa HIV, walay ingon niana nga kapilian. Masanta kini, apan sa pagkakaron dili kini matambalan. Nganong magpameligro sa imong kinabuhi? Ang pagsanta tinong mas maayo kay sa walay tambal.
[Blurb sa panid 9]
“Labaw pa ang nalangkit sa pagtambal kay sa pagpasulod ug mga kemikal sa imong lawas. Naglangkit kini sa tinamdan, pagpaluyo sa katilingban, espirituwalidad, ug nutrisyon.”—Ruth Mota
[Kahon/Hulagway sa panid 9]
“Maayo Kaayo ang Kongregasyon”
Giawhag ni apostol Pablo ang kaubang mga Kristohanon: “Buhaton nato ang maayo ngadto sa tanan, apan ilabina kanilang iglabot nato sa pagtuo.” (Galacia 6:10) Ang inahan ni Karen, nga gihisgotan sa unang artikulo, nag-asoy kon sa unsang paagi ang lokal nga kongregasyon sa mga Saksi ni Jehova misanong sa dihang nahibaloan nila nga si Karen ug Bill nasakit sa HIV. Siya miingon: “Maayo kaayo ang kongregasyon. Sa dihang nataptan ug pulmonya si Bill, si Karen usab nasakit ug nanlimbasog sa pag-atiman kaniya ug sa mga bata. Ang mga igsoon nanglimpiyo sa ilang balay, nag-ayo sa ilang sakyanan, ug nanglaba sa ilang mga labhanan. Gitabangan nila sila sa pag-atiman sa legal nga mga kalihokan ug pagbalhin ngadto sa laing balay. Sila namalit ug nagluto ug pagkaon alang kanila. Dihay tinuod nga pagbaha sa emosyonal, espirituwal, ug materyal nga suportar.”
[Hulagway sa panid 8]
Ang pagkamaunongon sa kaminyoon makasanta sa pagtakboy sa HIV