Gikan sa Among mga Magbabasa
Siyensiya Kasaligan? Ang inyong serye sa mga artikulong “Hangtod Asa nga Kasaligan ang Siyensiya?” (Marso 8, 1998) maoy nunot-sa-panahon nga pasidaan. Nakatabang kini kanako nga mahimong mas realistiko bahin sa mga imbento ug siyentipikanhong mga diskobre, nga daghan niini makapahinabog makadaot nga segundaryong mga epekto sa tawo ug sa iyang palibot. Sa samang panahon, ang serye nagpunting sa mga magbabasa ngadto sa Bibliya—usa ka butang nga kasaligan gayod.
A. I. B., Brazil
Ang Apache Kami interesado kaayo sa kasaysayan sa mga Indian ug nakabasag daghang libro bahin kanila. Busa buot namo kamong pasalamatan sa artikulong “Unsa nay Nahitabo sa mga Apache?” (Marso 8, 1998) Kini naghisgot bahin niining ulohana sa paagi nga tin-aw ug makapakombinsir.
G. C. ug R. S., Italya
Sistema sa Kasta Ako 12-anyos, ug gahapon lamang giasaynan akog trabaho sa eskuylahan bahin sa sistema sa kasta. Ako may dugong Indian. Karong adlawa akong nadawat ang inyong artikulong “Mga Kristohanon ug ang Kasta.” (Marso 8, 1998) Ang akong mga libro sa eskuylahan wala magpatin-aw niining ulohana nga sama ka bug-os sa inyong gihimo.
S. S. N., Tinipong Bansa
Pagsagubang sa Kahigwaos Nakabasa akog mga artikulo diha sa iladong mga magasin maylabot sa pagsagubang sa kakapoy, burnout, ug kaluya. Apan kini kanunayng makapahunahuna kanako kon ako himsog ba aron makalahutay! Nahimuot ako sa pagmatikod nga sa 15 sa inyong mga sugyot sa pagsagubang sa kahigwaos, walay sugyot sa paghunong ug sa pag-undang. (“Makahimo Ka Pagsagubang sa Kahigwaos!,” Marso 22, 1998) Hinunoa, gipakita niini kon sa unsang paagi makunhoran ang kahigwaos samtang nagpadayon ang usa sa iyang pagkinabuhi.
J. B., Bolivia
Ang mga artikulo miabot sa hustong panahon, sanglit nag-antos ako gumikan sa kahingawa. Ako usa ka bug-os-panahong ebanghelisador, ug ako naghunahuna nga dili ako angayng makabaton sa maong mga suliran. Samtang gibasa ko kining mga artikuloha, nanglugmaw ang mga luha sa akong mata. Nakaamgo ako nga si Jehova adunay malumong pagtagad sa iyang mga alagad ug nakasabot sa atong naagoman.
D. M., Italya
Mao gayod kini ang akong gikinahanglang basahon, sanglit nag-antos ako gumikan sa psoriasis, usa ka makapahigwaos nga kahimtang. Usahay akong bation nga dili ako hinungdanon kang Jehova, apan gipakita kanako sa inyong artikulo nga dili ingon niini ang kahimtang. Siya may pagtagad gayod kanako—hilabihan gayod nga siya nagtagana kanako sa tanang impormasyon nga akong gikinahanglan maylabot sa kahigwaos.
S. S., Brazil
Buot ko kamong pasalamatan sa bug-os kong kasingkasing alang sa kahon nga “PTSD—Normal nga Reaksiyon sa Dili-Normal nga Kasinatian.” Ako adunay masakit nga kasinatian sa pagkabata, ug bisan tuod ang miaging mga panumdoman maoy bahin gihapon sa akong kinabuhi, ang artikulo nakahatag kanakog tinuod nga kahupayan.
R. N., Tinipong Bansa
Akong nakaplagan ang mga artikulo nga makapalamdag kaayo. Sanglit ang mga pagpit-os gikan kang Satanas nagkadaghan, among gikinahanglan kining matanga sa impormasyon aron magpabilin diha sa pagtuo. Nakapaamgo kini kanako nga kamo adunay dulot nga interes sa among mga suliran ug nga kamo naghatag kanamo sa among gikinahanglan aron masagubang kini.
V. T., Fiji