Gikan sa Among mga Magbabasa
Pagpauswag sa mga Grado Estudyante ako sa tunghaan, ug buot kong pasalamatan kamo tungod sa artikulong “Mga Batan-on Nangutana . . . Mapauswag ba Nako ang Akong Grado sa Tunghaan?” (Marso 22, 1998) Bisan tuod ang akong mga grado kanunayng labaw sa aberids, wala nako sukad masabti ang dakong rason nga pauswagon pa kini. Apan tungod niining makapaikag ug makapalihok nga artikulo, tin-aw kong nasabtan nga makapalampos pa akog dugang pinaagig pagpahilunag makataronganong mga tumong.
B. R., Tinipong Bansa
Ako 14 anyos, ug wala gayod ko sukad makasabot kon unsaon pagtuon. Ako nakahukom nga ang pipila ka butang dili ko magamit sa umaabot ug naghunahuna nga walay kapuslanan ang pagtuon niini. Ang pagbasa niining artikuloha nakapausab sa akong hunahuna. Usab, buot kong pasalamatan kamo sa pagsaysay diha sa praktikal kaayong paagi kon unsaon pagtuon!
K. F., Hapon
Nagapangagot nga Ngipon Ang artikulong “Nagapangagot Ka ba sa Imong Ngipon?” (Marso 22, 1998) mihaom sa akong mga panginahanglan. Tungod kay nag-antos ko niining sulirana, nakaplagan kong kini impormatibo kaayo ug makapadasig. Wala gayod ako maghunahuna nga magpatik kamo ug butang bahin niining ulohana. Uban sa maong nagkadaiyang impormasyon, inyong gitandog ang matag indibiduwal nga magbabasa.
A. M. N. C., Brazil
Kababayen-an Samtang akong gisugdan pagbasa ang mga serye nga “Kababayen-an—Unsang Kaugmaon ang Nagpaabot Kanila?,” sa Abril 8, 1998, nga Pagmata!, nanaligdig ang mga luha sa akong aping. Wala pa ako sukad matandog sa emosyonal nga paagi. Daghang salamat sa inyong pagdasig sa paglantaw sa umaabot sa dihang ang madaogdaogong pagtagad matapos.
C. J., Tinipong Bansa
Natandog ako sa lisod nga mga estilo sa kinabuhi sa daghang kababayen-an libot sa kalibotan. Nakahilak ako sa pagkadungog sa tanang butang nga ginahimo niining mga bayhana—nga sa daghang higayon nagpas-an sa luwan nga nag-inusara. Inahan ako sa duha ka bata, ug kanunay akong magbakho bahin sa daghang kalisdanan nga akong ginasagubang. Kining artikuloha nakatabang nako sa pagsabot nga ang kahimtang sa akong kinabuhi mas maayo pa kay sa daghan pang uban.
K. S., Tinipong Bansa
Pag-atubang sa Pagkabalo Buot kong ipahayag ang akong sinserong apresasyon sa asoy ni Barbara Schweizer, “Pagkaplag ug Paghupay Diha sa ‘Walog sa Baga nga Landong.’” (Abril 8, 1998) Wala ko kamatyig bana apan namatyag mga ginikanan ug usa ka igsoong lalaki sulod sa tulo ka tuig. Si Barbara Schweizer nag-ingon nga ang iyang “kasubo maoy butang nga modangat ug mobiya.” Mapasalamaton ako sa pagbasa nga dunay mibating sama kanako.
H. T., Hawaii
Usa ako ka 17-anyos nga bug-os-panahong ebanghelisador, ug bisan tuod wala akoy bisan unsang dagkong mga suliran, kining asoya nagdasig nako sa pagbaton ug malipayon ug determinadong espiritu. Nakapasabot kini kanako nga si Jehova nagpaluyo kanako ug dili gayod mobiya kanako.
T. C., Italya
“Orthodontics” Salamat sa artikulo diha sa Abril 8, 1998, nga isyung “‘Orthodontics’—Unsay Nalangkit?” Ako 12 anyos ug di pa dugayng misugod sa paggamit ug mga brace sa akong mga ngipon. Dili kaayo ko interesado sa ideya. Apan ang inyong artikulo nagsaysay kon sa unsang paagi kini makatabang kanako ug nga daghang tawo naggamit ug mga brace, ug busa dili ako angayng maulaw.
J. L., Canada
Nahimuot kaayo ako sa artikulo bahin sa orthodontics! Sukad pa sa pagkabata buot na akong makabaton ug nindot nga mga ngipon. Di pa dugay, usa sa akong mga ngipon sa atubangan natipak, ug ako kinahanglang magpagama ug dyaket sa ngipon, nga mahal kaayo. Dinhi sa Yugoslavia, ang mga dentista sagad walay kinahanglanong materyales alang sa ilang trabaho. Ug ang pribadong mga dentista mahal kaayo alang kanamong walay salapi. Di na ko kahulat sa panahon sa umaabot sa dihang kitang tanan makabaton ug hingpit nga mga ngipon!
B. E., Yugoslavia