Pagduaw sa Luok sa Naglugsong nga Dragon sa Vietnam
USA ka alingiing nga kabuntagon sa Hanoi, misakay kamig bus ug mibiyaheg 165 kilometros pasidlakan ngadto sa usa sa labing nindot nga mga dapit sa Vietnam, ang ilado sa kalibotan nga Luok sa Ha Long—o Luok sa Naglugsong nga Dragon. Kanunay na namong madunggan ang maanindot kaayo nga luok, ug karon, sa kataposan, amo na gayod kining makita.
Sa pagkaudto mihunong ang among bus sa daplin sa luok. Apan wala pa gayod kami makaabot sa among adtoan. Dili lamang ang berde-kaayong tubig niini ang nakapailado sa Luok sa Ha Long kondili ang kinaiyanhong katahom usab sa 3,000 ka isla nga nagkatagkatag sa kapin sa 1,500 kilometro kuwadrado nga luna niini. Sanglit talagsaon ang matag isla, buot namong duawon ang pipila niini. Busa nanakayan kami, ug sa wala madugay among nasinati ang di-mahikalimtang panaw.
Milawig kamig halos usa ka oras hangtod nakaabot kami sa usa ka matahom nga luok nga gilibotag gagmayng mga isla. Gihulog sa mga sakayanon ang angkla. Panahon na sa makapapreskong paglangoylangoy sa bugnaw berdeng katubigan! Sa wala madugay ang among pagtimpasaw nakadani sa grupo sa maukit-ukitong mga bata nga namugsay aron sa pagsugat kanamo sakay sa ilang mga baroto. Ang mga bata ug ang tanan nilang mga pamilya nagpuyo sa luok diha sa mga balay nga sakayan, o mga sampan.
Naghunahuna ka tingali nga ang mga molupyo sa Luok sa Ha Long maoy mga mananagat. Apan wala ka tingali maghunahuna nga hanas usab sila sa nagakahanaw nga arte—paggamag layag. Ang Moon Travel Handbook on Vietnam ni Michael Buckley nag-ingon: “Ang Halong maoy usa sa nahibiling mga dapit diin ang mga layag sa sampan gikinamot gihapon paghimo sa mga pamilyang tighimog mga layag. Ang mga panaptong baga gitahi sa sedang hilo, nga ang matag sinumpayan gikinamot pagtahi. Aron dili mogabok ug agup-opon, ang nahuman nga layag ihumol sa usa ka likido nga gikan sa samag-beetroot nga tanom nga iya sa pamilya sa ube. Ang layag ihumol ug paughon sa tulo o upat ka beses, usa ka proseso nga naghatag sa layag ug lugom nga pagkapulang kolor.”
Natingala ka ba kon nganong ginganlan kinig Luok sa Ha Long—Luok sa Naglugsong nga Dragon? Wala kamiy nakitang dragon sa among panaw! Hinunoa, among nasayran nga sumala sa estorya, ang mga isla sa Luok sa Ha Long gimugna sa usa ka dakong dragon nga nagpuyo sa kabukiran. Ang The Lonely Planet Guidebook on Vietnam nagsaysay: “Samtang [ang dragon] midulhog sa baybayon, ang naglambalambang ikog niini nakapormag mga walog ug mga bung-aw; sa dihang kini milusbog sa dagat, ang mga dapit nga nalungag sa ikog napuno ug tubig, nga nagbilin lamag pipila ka habog nga yuta.”
Siyempre, ang tinuod nga mga puwersa mao ang hangin ug tubig, nga maoy nakaumol niining mga islaha ngadto sa nagkalainlaing mga porma ug mga gidak-on. Pananglitan, kon imong handurawon, imong makita nga ang Hon Ga Choi, Fighting Cock Islet, morag duha ka nagsabong nga mga sunoy kon tan-awon.
Mibalik kami sa dunggoanan sa pagkasalumsom, nga naghinamhinam sa panaw sa sunod nga adlaw. Human sa pamahaw sa pagkabuntag, milawig kami aron tan-awon sa duol ang pipila ka mga langob, o mga groto, sa maong dapit. Ang luok napuno sa gabon, nga naghatag ug misteryosong katahom sa lugar. Among giadto ang daghang langob. Ang usa niini ginganlag Hang Dau Go—Groto sa Kahoyng mga Estaka. Kini dunay tulo ka lawak nga nakonektar pinaagi sa 90 ka ang-ang. Nganong ginganlag ingon niini ang langob? Ang librong The Lonely Planet Guidebook on Vietnam nagsaysay: “Ang langob nakabaton sa Vietnamese nga ngalan niini gikan sa ikatulo sa mga lawak, nga gikaingong gigamit panahon sa ika-13ng siglo sa pagtipig sa talinis nga mga lipak nga giugsok ni Tran Hung Dao [Vietnamese nga bayaning sundalo] sa Bach Dang River” sa pagsugpo sa misulong nga Kublai Khan.
Among gisaka ang langob ug milingi aron makita ang talan-awon sa ubos. Nindot kaayo ang among nakita. Dali, kuhaa ang kamera! Nga ang mga stalactite sa langob anaa sa among atubangan ug nagtuyatuya ang among sakayan sa asulong-berde nga luok sa luyo, seguradong nindot kaayo ang among letrato! Ang Luok sa Ha Long tinuod gayong paraiso sa usa ka letratista ug kalipay sa usa ka tigdibuho.
Sa pagkahapon, misakay kamig gamay nga sakayang de-motor aron tan-awon sa duol ang usa ka dakong isla. Mikalit lang ug kangitngit. Morag gilamoy kami sa bukid! Miagi kamig usa ka langob. Apan, sa wala madugay, nakaabot kami sa tabok. Sa katingalahan, diha na kami sa dakong lanaw. Dihay tag-as nga mga pangpang nga anapog sa matag kilid. Among nakita ang mga tanomtanom nga mikatay sa kilid sa bukid. Gipatay sa mga sakayanon ang makina. Ang kahilom natugaw lamang sa mga pagtuwit-tuwit sa kalanggaman. Ang mga panumdoman nianang malinawong gutlo magpabilin kanamo sa dugay nga panahon.
Sa wala madugay, miabot na ang panahon sa pagpauli sa Hanoi. Ang among ekskursiyon morag dali ra kaayo. Bisan pa niana, kami adunay daghang panumdoman nga among handomon—batoong mga tayuktok sa isla, naglawig nga mga sampan ug, ilabina, ang Luok sa Ha Long, nga usa lamang ka pananglitan sa katahom sa Vietnam.
Kami naglaom nga makakita sa ubang makaiikag nga mga dapit niining matahom nga nasod. Kami nagpasalamat sa Maglalalang, si Jehova nga Diyos, sa pagtagana sa maong kadaiyahan ug kaanindot sa kalalangan ug sa pagsaad nga sa umaabot ang tibuok yuta mahimong sama ka tahom sa Luok sa Ha Long.—Tinampo.